'മലപ്പുറംകത്തി, മെഷീന്‍ഗണ്ണ്, ക്രിസ്റ്റ്യാനോ റൊണാൾഡോ' !; ഒടുവിൽ ​വാറ്റ്ഫോഡിന്‍റെ​ തട്ടകത്തിലും പറയിപ്പിച്ച്​ മാഞ്ചസ്റ്റർ യുനൈറ്റഡ്​

ലണ്ടൻ: ''എന്തൊക്കെയായിരുന്നു വീരവാദം... മലപ്പുറം കത്തി, അമ്പും വില്ലും, മെഷീന്‍ഗണ്ണ്, ഒലക്കേടെ മൂട്...ഒടുവില്‍ പവനായി ശവമായി...'' ശ്രീനിവാസന്‍റെ രചനയിൽ വിരിഞ്ഞ​ നാടോടിക്കാറ്റ്​ സിനിമയിലെ ഈ ഡയലോഗ്​​ ഇംഗ്ലീഷ്​ പ്രീമിയർ ലീഗിലെ വാറ്റ്​ഫോഡ്-​ മാഞ്ചസ്റ്റർ യുനൈറ്റഡ്​ മത്സരം കണ്ടവർ ഓർക്കാതിരിക്കില്ല. പഴയ പടക്കുതിരയായ ക്രിസ്റ്റ്യാനോ റൊണാൾഡോയെ രാഗിമിനുക്കിയെടുത്ത്​ മൂർച്ച കൂട്ടി മാഞ്ചസ്റ്റർ യു​നൈറ്റഡ്​ പുനരവതരിപ്പിച്ചപ്പോൾ ഇനി 'ശരിക്കുമുള്ള കളി കണ്ടോളൂ' എന്നായിരുന്നു ആരാധകരുടെ വെല്ലുവിളി.

എന്നാൽ, ടീം ഇതുവരെ സെറ്റായില്ലെന്ന്​ ഒരിക്കൽ കൂടി തെളിഞ്ഞു. ആടിയും ഉലഞ്ഞു നീങ്ങിയ മാഞ്ചസ്റ്റർ കപ്പൽ ഒടുവിൽ വാറ്റ്​ഫോഡിനു മുന്നിലും വീണു. അന്തരാഷ്​ട്ര മത്സരങ്ങളു​െട ഇടവേള കഴിഞ്ഞ്​ തിരിച്ചെത്തിയ താരങ്ങൾ 'കബ്ല്​ മൂഡിലേക്ക്'​ മാറുന്നതിനു മുന്നെയാണ്​ വാറ്റ്​ഫോഡ്​ തട്ടകത്തിലെത്തി 4-1ന്​ തോറ്റത്​​. മാഞ്ചസ്റ്റർ സിറ്റിയോട് 2-0ത്തിന്​​ തോറ്റതിനു പിന്നാലെയാണ്​ ഗ്ലാമർ സംഘം വാറ്റ്​ഫോഡിനോടും തോറ്റത്​.

ദുർബല​ ടീമെന്ന്​ കരുതി ബൂട്ടുകെട്ടിയ സോൾഷ്യെയർ സംഘത്തിന്​ മുൻ ചാമ്പ്യൻ കോച്ച്​ ക്ലൗഡിയോ റെനിയേരി പരിശീലിപ്പിച്ച വാറ്റ്​ഫോഡിന്‍റെ​ പോരാട്ടവീര്യം അളക്കാനായില്ലെന്നതാണ്​ നേര്​. ടെക്​നിക്കൽ മികവും ഒത്തിണക്കവും കൗണ്ടർ അറ്റാക്കുമെല്ലാം ചേർന്ന വാറ്റ്​ഫോഡ്​ ടീം ആർത്തിരമ്പിക്കളിച്ചപ്പോൾ അവർക്കു മുന്നിൽ യുനൈറ്റഡിന്‍റെ കേളി​േകട്ട താരങ്ങളെല്ലാം ഒന്നുമല്ലാതായി.

9,11 മിനിറ്റുകളിൽ തന്നെ വാറ്റ്​ഫോഡ്​ യുനൈറ്റഡിനെ ​പേടിപ്പിച്ച്​ തങ്ങളുടെ മേധാവിത്വം അറിയിച്ചിരുന്നു. ആദ്യം വാറിൽ ഗോൾ നിഷേധിക്കപ്പെട്ടപ്പോൾ, 11ാം മിനിറ്റിലെ പെനാൽറ്റിയും ലക്ഷ്യത്തിലെത്തിയില്ല. മാഞ്ചസ്റ്റർ ഗോൾ കീപ്പർ ഡേവിഡ്​ ഡിഹിയയുടെ മിന്നു സേവാണ്​ യുനൈറ്റഡിനെ കാത്തത്​. എങ്കിലും വാറ്റ്​ഫോഡ്​ താരങ്ങൾ നിരാശരായില്ല.

തന്ത്രങ്ങൾ മാറ്റിപ്പിടിച്ച്​ കളിച്ച വാറ്റ്​ഫോഡ്​ ഇരു പകുതിയിലുമായി രണ്ടു ഗോൾ വീതം അടിച്ചു. 28ാം മിനിറ്റിൽ ജോഷ്വ കിങ്ങും 44ാം മിനിറ്റിൽ ഇസ്​മയില സാറും. രണ്ടാം പകുതിയുടെ ഇഞ്ചുറി സമയം ​ജായോ പെഡ്രോയും(92), ഇമാനുവൽ ഡെന്നിസും(96) കൂടി ഗോൾ നേടിയതോടെ യുനൈറ്റഡ്​ പൂർണമായി തകർന്നു.

50ാം മിനിറ്റിൽ ക്രിസ്റ്റ്യാനോ റൊണാൾഡോയുടെ പാസിൽ നിന്നും ഡോണി വാൻ ഡി ബീക്കാണ്​ യുനൈറ്റഡിന്‍റെ ആശ്വാസ ഗോൾ നേടിയത്​. 69ാം മിനിറ്റിൽ ഹാരി മ​ഗ്വെയറിന്​ രണ്ടാം മഞ്ഞകാർഡ്​ കണ്ട്​ പുറത്തുപോവേണ്ടി വന്നതും യുനൈറ്റഡിന്​ തിരിച്ചടിയായി.

ഏഴാം സ്​ഥാനത്തേക്ക്​ പിന്തള്ളപ്പെട്ടതോടെ കോച്ച്​ ഒലെ ഗണ്ണർ സോൾഷ്യെയറിന്‍റെ കസേര തെറിക്കാൻ സാധ്യത ഏറെയായി.