ഫിഫ ദി ബെസ്റ്റ്: റോഡ്രിയെയും എംബാപ്പെയെയും പിന്തള്ളി വിനീഷ്യസ് മികച്ച പുരുഷ താരം, ബോൻമാതി മികച്ച വനിതാ താരം

ദോഹ: സീസണിലെ ലോകഫുട്ബാളി​ലെ മികച്ച താരത്തിനുള്ള ഫിഫ ദി ബെസ്റ്റ് പുരസ്കാരം റയൽ മഡ്രിഡിന്റെ ​ബ്രസീലിയൻ സൂപ്പർ താരം വിനീഷ്യസ് ജൂനിയറിന്. ദോഹയിൽ നടന്ന പുരസ്കാര ചടങ്ങിലാണ് 2024ലെ മികച്ച താരമായി 24കാരനായ താരത്തെ തെരഞ്ഞെടുത്തത്. 11 പേരുടെ ചുരുക്കപ്പട്ടികയിൽ ഇടം നേടിയ ​ബാലൺ ഡി ഓർ പുരസ്കാര ജേതാവ് മാഞ്ചസ്റ്റർ സിറ്റിയുടെ റോഡ്രി, റയൽ മഡ്രിഡിന്റെ കിലിയൻ എംബാപ്പെ, എർലിങ് ഹാളണ്ട് എന്നിവരെ പിന്തള്ളിയാണ് വിനീഷ്യസ് കരിയറിൽ ആദ്യമായി ഫിഫ ബെസ്റ്റ് പുരസ്കാരത്തിന് അവകാശിയായത്.

മികച്ച വനിതാ താരത്തിനുള്ള അവാർഡ് ബാഴ്സലോണയുടെ സ്പാനിഷ് താരം ഐതാന ബോൻമാതി സ്വന്തമാക്കി. ഏറ്റവും മികച്ച ഗോളിനുള്ള പുഷ്കാസ് പുരസ്കാരം മാഞ്ചസ്റ്റർ യുനൈറ്റഡിന്റെ അയലാന്ദ്രോ ഗർണാച്ചോ എവർട്ടനെതിരായ പ്രീമിയർ ലീഗ് മത്സരത്തിനിടെ നേടിയ ഗോൾ സ്വന്തമാക്കി. വനിതാ വിഭാഗത്തിലെ മികച്ച ഗോളിനായി ഏർപ്പെടുത്തിയ പ്രഥമ ‘ഫിഫ മാർത പുരസ്കാരം’ മാർത തന്നെ സ്വന്തമാക്കി മറ്റൊരു ചരിത്രവും കുറിച്ചു. ബ്രസീൽ കുപ്പായത്തിൽ ജമൈകക്കെതിരെ നേടിയ ഗോളാണ് പുരസ്കാരത്തിന് അർഹമായത്.

ബുധനാഴ്ച ഖത്തറിൽ നടക്കുന്ന ഫിഫ ഇന്റർകോണ്ടിനെന്റൽ മത്സരത്തിന് മുന്നോടിയായാണ് ദോഹ ആസ്പയർ അകാദമിയിൽ പുരസ്കാര പ്രഖ്യാപനം നടത്തിയത്. ഓൺലൈൻ വഴിയായിരുന്നു പ്രഖ്യാപനം. ഫിഫ പ്രസിഡന്റ് ജിയാനി ഇൻഫന്റിനോ, മുൻ ലോക ഫുട്ബാൾ താരങ്ങളായ ബെബറ്റോ, ലോതർ മതേവുസ്, പെപെ, ജിയാൻലൂയിജി ബുഫൺ, ആഴ്സൻ വെങ്ങർ എന്നിവർ പ​​ങ്കെടുത്തു.

മറ്റു പുരസ്കാരങ്ങൾ:

• മികച്ച കോച്ച്: കാർലോ ആഞ്ചലോട്ടി (റയൽ മഡ്രിഡ്)
• മികച്ച വനിതാ കോച്ച്: എമ്മ ഹെയ്സ് (ചെൽസി)
• മികച്ച പുരുഷ ഗോൾകീപ്പർ: എമിലിയാനോ മാർട്ടിനസ് (അർജന്റീന, ആസ്റ്റൻവില്ല)
• വനിതാ ഗോൾകീപ്പർ: അലിസ നാഹെർ (അമേരിക്ക)
• ഫെയർ​േപ്ല അവാർഡ്: തിയാഗോ മിയ (ബ്രസീൽ)