സോസിദാദുമായി സമനിലക്കുരുക്കിൽ സിദാൻ സംഘം; ഇനി മഡ്രിഡ്​ നാട്ടങ്കം

മഡ്രിഡ്​: ലാ ലിഗയിൽ ഇനിയും കരുത്തരുടെ പട്ടികയിൽ ​ ഇരിപ്പുറക്കാത്ത റയൽ സോസിദാദിനെതിരെ അവസാന നിമിഷങ്ങളിൽ വിനീഷ്യസ്​ ജൂനിയർ നേടിയ ഗോളിന്​ സമനിലയുമായി രക്ഷപ്പെട്ട റയൽ മഡ്രിഡി​നെ ഇനി കാത്തിരിക്കുന്നത്​ നാട്ടങ്കം. ലാ ലിഗയിൽ ഒരു കളി കുറച്ചും അ​ഞ്ചു പോയിന്‍റ്​ കൂടുതലുമുള്ള അത്​ലറ്റികോ മഡ്രിഡുമായാണ്​ ഞായറാഴ്​ചത്തെ തീപാറും പോരാട്ടം.

റയൽ നിരയിൽ മൈതാനം നിറഞ്ഞ്​ മരിയാനോയും റാഫേൽ വരാനെയും പറന്നു നടന്നിട്ടും ഗോളൊഴിഞ്ഞ ആദ്യ പകുതി​ക്കു ശേഷം ആദ്യ വെടിപൊട്ടിച്ചത്​ റയൽ സോസിദാദ്​​. 55ാം മിനിറ്റിൽ പോർട്ടുവാണ്​ സന്ദർശകരെ മുന്നിലെത്തിച്ചത്​. മിടുക്കർ വേണ്ടുവോളമുള്ള റയൽ നിരക്ക്​ കൂടുതൽ കരുത്തുപകർന്ന്​ 61ാം മിനിറ്റിൽ വിനീഷ്യസ്​ എത്തിയതോടെ കളിക്കു വേഗം കൂടി. കളിയിൽ ആധിപത്യം കടുപ്പിച്ച റയൽ 89ാം മിനിറ്റിലാണെങ്കിലും വിനീഷ്യസ്​ നേടിയ വിലപ്പെട്ട ഗോളിൽ കളി ഒപ്പം പിടിച്ചു. ലുക്കാസ്​ വാസ്​ക്വേസായിരുന്നു ഗോളിൽ സഹായി.

ഇന്നലെയും കളി സമനിലയിൽ തീർന്നതോടെ ലാ ലിഗയിൽ ബാഴ്​സലോണയെ കടന്ന്​ രണ്ടാം സ്​ഥാനത്തേക്കു കയറാമെന്ന റയൽ മോഹം പിന്നെയും പാതിവഴിയിലായി. റയൽ സോസിദാദ്​ അഞ്ചാമതുണ്ട്​.

അതേ സമയം, സെർജിയോ റാമോസ്​, കരീം ബെൻസേമ എന്നിവർ പരിക്കുമായി ഇപ്പോഴും പുറത്തിരിക്കുന്ന റയൽ നിരയിൽ ​ഫെഡറികോ വെൽവേഡേ, റോഡ്രിഗോ, മാഴ്​സലോ എന്നിവർ പരിക്കുമാറി തിരിച്ചുവന്നത്​ സിദാന്​ ആശ്വാസമായി.