‘വാറി’ലെ പിശകിൽ കളി മാറി; പ്രിമിയർ ലീഗിൽ റഫറിയെ മാറ്റിനിർത്തി

ശനിയാഴ്ച പ്രിമിയർ ലീഗിലെ നിർണായക മത്സരങ്ങളിൽ വിഡിയോ അസിസ്റ്റന്റ് റഫറി സംവിധാനത്തിലെ ഗുരുതര പിഴവിൽ ഗോൾ നിഷേധിക്കപ്പെട്ട സംഭവത്തിൽ നടപടി. ‘വാർ’ റഫറി ജോൺ ബ്രൂക്സിനെ തുടർന്നുള്ള മത്സരങ്ങളിൽനിന്ന് മാറ്റിനിർത്തി. ക്രിസ്റ്റൽ പാലസ്- ബ്രൈറ്റൺ മത്സരത്തിൽ പെർവിസ് എസ്റ്റൂപിനാൻ നേടിയ ഗോൾ ഓഫ്സൈഡ് വിളിച്ച് നിഷേധിക്കുകയായിരുന്നു. ശരിക്കും ഓഫ്സൈഡ് അല്ലാതിരുന്നിട്ടും ഗോൾ നിഷേധിച്ചതോടെ മത്സരം സമനിലയിൽ കലാശിച്ചു.

ജോൺ ബ്രൂക്സ് ‘വാർ’ റഫറിയായി എത്തേണ്ട ലിവർപൂൾ- എവർടൺ, ആഴ്സണൽ- മാഞ്ചസ്റ്റർ സിറ്റി മത്സരങ്ങളിൽനിന്നാണ് മാറ്റിനിർത്തിയത്. ശനിയാഴ്ച ഈ മത്സരത്തിനു പുറമെ ആഴ്സണൽ- ബ്രെന്റ്ഫോഡ് മത്സരത്തിലും ‘വാർ’ വില്ലനായിരുന്നു. ഓഫ്സൈഡായിരുന്ന ക്രിസ്റ്റ്യൻ നോർഗാർഡ് നൽകിയ പാസിലായിരുന്ന ഗണ്ണേഴ്സിനെ സമനിലയിലാക്കിയ ഗോൾ എത്തുന്നത്. ​റി​േപ്ലയിൽ എല്ലാം വ്യക്തമായിട്ടും റഫറി ഗോൾ അനുവദിച്ചു. ഇത് രണ്ടും തെറ്റായി സംഭവിച്ചതാണെന്ന് പിന്നീട് റഫറിമാരുടെ സംഘടന കുറ്റസമ്മതം നടത്തിയെങ്കിലും മത്സരഫലം അങ്ങനെ തന്നെ നിലനിൽക്കും. ഇതാകട്ടെ, ഇത്തവണ കിരീടം പ്രതീക്ഷിക്കുന്ന ആഴ്സണലിന് വിലപ്പെട്ട രണ്ടു പോയിന്റുകൾ നിഷേധിക്കുന്നതാകും.