നാണംകെട്ട്​ റയൽ, തലതാഴ്​ത്തി ആഴ്​സനൽ

മഡ്രിഡ്​: റയൽ മഡ്രിഡിന്​ തൊട്ടതെല്ലാം പിഴച്ച ദിനം. മൂന്നു​ പെനാൽറ്റിയും ഒരു സെൽഫ്​ ​േഗാളും വഴങ്ങി വലൻസിയക്ക്​ മുന്നിൽ 4-1ന്​ തോറ്റമ്പിയ റയൽ മഡ്രിഡ്​ ഒരു ചരിത്രവും കുറിച്ചു. ഇതാദ്യമായാണ്​ റയൽ ഒരു മത്സരത്തിൽ മൂന്ന്​ പെനാൽറ്റി വഴങ്ങുന്നത്​.

കളിയുടെ 23ാം മിനിറ്റിൽ കരിം ബെൻസേമയുടെ ഗോളിലൂടെ റയലി​െൻറ ലീഡോടെയാണ്​ കളി തുടങ്ങിയത്​. എന്നാൽ, പിന്നീട്​ ചിത്രം മാറി. ഹാൻഡ്​ബാളും സെൽഫ്​ ഗോളുമായി ചാമ്പ്യന്മാർക്ക്​ അബദ്ധങ്ങൾ ആവർത്തിച്ചപ്പോൾ, വലൻസിയ അവസരങ്ങളൊന്നും പാഴാക്കിയുമില്ല. പെനാൽറ്റികൊണ്ട്​ ഹാട്രിക്​ തികയ്​ക്കുകയെന്ന അപൂർവ നേട്ടവുമായി വലൻസിയയുടെ കാർലോസ്​ സോളർ റയലിനെ കുഴിച്ചുമൂടി.

ലൂകാസ്​ വാസ്​ക്വസ്​, സെർജിയോ റാമോസ്​ എന്നിവരുടെ ഹാൻഡ്​ബാളും, മാഴ്​സലോയുടെ ടാക്ലിങ്ങുമാണ്​ ​വലൻസിയക്ക്​ മൂന്നു​ പെനാൽറ്റിക്ക്​ അവസരമൊരുക്കിയത്​ (35, 54, 63 മിനിറ്റ്​). ഇതിനിടയിൽ 43ാം മിനിറ്റിൽ റാഫേൽ വറാനെയുടെ ഗോ​ൾസേവിനുള്ള ശ്രമം പന്തിനെ സ്വന്തം വലയിൽ തന്നെയെത്തിച്ചു.

ആഴ്​സനലിനെ ചുരുട്ടിക്കെട്ടി വില്ല

ലണ്ടൻ: കരുത്തരായ ആഴ്​സനലിനെയും തകർത്ത്​​ ആസ്​റ്റൻവില്ലയുടെ പടയോട്ടം തുടരുന്നു. പ്രീമിയർ ലീഗിലെ അവസാന മത്സരത്തിൽ മാഞ്ചസ്​റ്റർ യുനൈറ്റഡിനെ വീഴ്​ത്തിയ ആത്മവിശ്വാസത്തോടെ സ്വന്തം ഗ്രൗണ്ടിലിറങ്ങിയ ആഴ്​സനലിനെ മറുപടിയില്ലാത്ത മൂന്നു​ ഗോളിനാണ്​ ആസ്​റ്റൻവില്ല നിശ്ശബ്​ദരാക്കിയത്​. ഒബുമെയാങ്​, വില്യൻ, അലക്​സാണ്ടർ ലകസെറ്റ തുടങ്ങിയ വമ്പന്മാരെല്ലാം അണിനിരന്നിട്ടും, നിറഞ്ഞു കളിച്ച വില്ലക്കെതിരെ കണ്ണുരുട്ടാൻപോലും കഴിഞ്ഞില്ല.

കളിയുടെ 25ാം മിനിറ്റിൽ ആഴ്​സനൽ താരം ബുകായോ സാക നൽകിയ സെൽഫ്​ ഗോളിലാണ്​ വില്ല മുന്നിലെത്തിയത്​. ഒരു ഗോളി​െൻറ ലീഡിൽ ആദ്യ പകുതി അവസാനിച്ചു.രണ്ടാം പകുതിയിൽ സുപ്രധാന മാറ്റങ്ങളുമായി ആഴ്​സനൽ തിരിച്ചുവരവിന്​ ശ്രമിച്ചെങ്കിലും മൂന്ന്​ മിനിറ്റ്​ ഇടവേളയിൽ (72, 75) വാറ്റ്​കിൻസ്​ നേടിയ ഇരട്ട ഗോളിൽ പീരങ്കിപ്പടയുടെ കഥകഴിഞ്ഞു.