നിയമിതനായിട്ട് രണ്ട് മാസം; ​പരിശീലകനെ പറഞ്ഞുവിട്ട് സെവിയ്യ

മാഡ്രിഡ്: നിയമിതനായി ഒമ്പതാഴ്ചക്കകം പരിശീലകനെ പുറത്താക്കി സ്പാനിഷ് ക്ലബ് സെവിയ്യ. 48കാരനായ ഉറുഗ്വെക്കാരൻ ഡീഗോ ​അലോൻസോയെയാണ് ടീമിന്റെ ദയനീയ പ്രകടനത്തെ തുടർന്ന് ക്ലബ് അധികൃതർ പറഞ്ഞുവിട്ടത്. കഴിഞ്ഞ സീസണിൽ ഏഴാം യൂറോപ്പ ലീഗ് കിരീടത്തിലേക്ക് ടീമിനെ എത്തിച്ച ജോസ് ലൂയിസ് മെൻഡിലിബാറി​ന് പകരം ഒക്ടോബർ 10നാണ് ഇദ്ദേഹം പരിശീലകനായെത്തിയത്. എന്നാൽ, ചാമ്പ്യൻസ് ലീഗിലെയും ലാലിഗയിലെയും ദയനീയ പ്രകടനം അദ്ദേഹത്തിന് പുറത്തേക്ക് വഴിയൊരുക്കുകയായിരുന്നു.

ചാമ്പ്യൻസ് ലീഗിൽ ഗ്രൂപ്പിലെ അവസാന സ്ഥാനക്കാരായ സെവിയ്യ ലാലിഗയിൽ 16ാമതാണ്. കഴിഞ്ഞ ദിവസം ഗെറ്റാഫെയോട് സ്വന്തം നാട്ടിൽ 3-0ത്തിന് നാണം കെട്ടതിന് പിന്നാലെയാണ് പുറത്താക്കൽ. അലോൻസോക്ക് കീഴിൽ കോപ ഡെൽ റേയിൽ ദുർബല എതിരാളികൾക്കെതിരെ ഒറ്റ ജയം മാത്രമാണ് ടീം നേടിയത്. ലാലിഗയിൽ അഞ്ച് സമനിലയിലും മൂന്ന് പരാജയവുമാണ് ടീം അലോൻസോക്ക് കീഴിൽ ഏറ്റുവാങ്ങിയത്.