ടോട്ടനം പേജിൽ 'ദൃശ്യം' ഡയലോഗ്​; ആരാണീ അതിഭീകരനായ അഡ്മിൻ എന്ന്​ മലയാളികൾ

ലണ്ടൻ: വീണ്ടും മലയാളം ഡയലോഗുമായി ബ്രിട്ടനിലെ വിഖ്യാതമായ ടോട്ടനം ഹോട്‍സ്‌പർ ഫുബാൾ ക്ലബ്ബ്. ഇത്തവണ നവതരംഗമായ 'ദൃശ്യം 2'വിലെ ഡയലോഗാണ്​ ടോട്ടനം കടമെടുത്തിരിക്കുന്നത്​. ടോട്ടനത്തിന്‍റെ ദക്ഷിണ കൊറിയൻ താരം സൺ ഹ്യൂങ് മിന്നിന്‍റെ ചിത്രത്തിനൊപ്പം അവരുടെ എഫ്​ബി പേജിൽ കൊടുത്തിരിക്കുന്ന ഡയലോഗ്​ മലയാളികൾ ഹിറ്റാക്കിയിരിക്കുകയാണ്​.

'അയാൾ അയാളുടെ ടീമിനെ സഹായിക്കാൻ ഏതറ്റം വരെയും പോകും' എന്ന ഡയലോഗാണ്​ ടോട്ടനം നൽകിയിരിക്കുന്നത്​. He is a classic footballer എന്നും എഴുതിയിട്ടുണ്ട്​. Drishyam2, HeungMinSon എന്നീ ഹാഷ്​ടാഗുകളുമുണ്ട്. വെള്ളിയാഴ്ച പോസ്റ്റ് ചെയ്ത കുറിപ്പിന് ഇതുവരെ 8500ഓളം ലൈക്കുകൾ ലഭിച്ചിട്ടുണ്ട്​. ഇംഗ്ലിഷ് പ്രീമിയർ ലീഗിലെ പ്രമുഖ ക്ലബ്ബായ ടോട്ടനം ഇതിനുമുമ്പും മലയാളത്തിൽ സമൂഹമാധ്യമത്തിൽ പോസ്റ്റിട്ടിട്ടുണ്ട്​. അത​ുകൊണ്ടുതന്നെ 'ആരാണീ അതിഭീകരനായ മലയാളി അഡ്മിൻ?' എന്ന ചോദ്യം പല മലയാളി ആരാധകരും ചോദിച്ച്​ തുടങ്ങിയിട്ടുണ്ട്​.

പുതിയ പോസ്റ്റിന്​ ത​ാഴെയും മലയാളത്തിലുള്ള കമന്‍റുകളുടെ പെരുമഴയാണ്​. 'ആരാണീ അതിഭീകരനായ മലയാളി അഡ്മിൻ? അയാളെ കണ്ടെത്താൻ ഏതറ്റം വരെയും ഞങ്ങൾ പോകും, അത് ഹാക്കിങ് ആണെങ്കിൽ പോലും' എന്നാണ്​ ഒരാൾ കമന്‍റ്​ ചെയ്​തിരിക്കുന്നത്​. 'ഗ്രൗണ്ട് ഒന്ന് കുഴിച്ച് നോക്കിക്കോ...ഏതേലും ബോഡി കിട്ടിയാലോ...', 'അയ്സെരി...അയാൾ നമ്മളെ മരണം വരെ പിന്തുടരോ?' തുടങ്ങിയ കമന്‍റുകളുമുണ്ട്​. മമ്മൂട്ടിയുടെ 'ബിലാൽ' ഇറങ്ങ​ു​േമ്പാഴും ഇൗ സപ്പോർട്ട്​ വേണം, ഇല്ലെങ്കിൽ ക്ലബ്​ വെബ്​സൈറ്റ്​ ഹാക്ക്​ ചെയ്യും എന്ന്​ ഭീഷണി മുഴക്കിയവരുമുണ്ട്​. 'ദൃ​ശ്യ'ത്തിന്‍റെ നിർമാതാവ്​ ആന്‍റണി പെരുമ്പാവൂർ ടോട്ടനത്തെ വാങ്ങിയോ എന്നും ചിലർ ചോദിക്കുന്നു.

കേരള ബ്ലാസ്​റ്റേഴ്​സിന്‍റെ ദയനീയാവസ്​ഥ ചൂണ്ടിക്കാണിച്ചവരുമുണ്ട്​. 'അഡ്മിൻ സർ..ആകെ വശപിശക്കു ആയിട്ട് ഇരിക്കുവാണ് ഞങ്ങളുടെ കേരള ബ്ലാസ്റ്റേഴ്‌സ്... ഞങ്ങൾക്കു ആരാ സഹായിക്കാൻ എന്ന് പറഞ്ഞ് തരാമോ? എന്ന് ഒരു ഹത ഭാഗ്യനായ കേരള ബ്ലാസ്റ്റേഴ്‌സ് ആരാധകൻ' എന്നായിരുന്നു ഒരാളുടെ കമന്‍റ്​.