യൂറോ കപ്പിലെ പ്രകടനം വിനയായി; കോച്ചിനെ പുറത്താക്കി റഷ്യൻ ഫുട്​ബാൾ ടീം

യൂറോ കപ്പിലെ ദയനീയ പ്രകടനത്തിന്​ പിന്നാലെ റഷ്യൻ ദേശീയ ഫുട്​ബോൾ ടീം ഹെഡ്​ കോച്ച്​ സ്ഥാനത്ത്​ നിന്നും സ്റ്റാനിസ്ലാവ് ചെർച്ചെസോവ്​ പുറത്തേക്ക്​. റഷ്യൻ ഫുട്​ബാൾ യൂണിയനെ ഉദ്ധരിച്ചുകൊണ്ട്​ ആർ.​െഎ.എ ന്യൂസാണ്​ വാർത്ത പുറത്തുവിട്ടത്​. 57കാരനായ ചെർച്ചെസോവുമായുള്ള കരാർ അവസാനിപ്പിക്കാൻ തങ്ങൾ സംയുക്​ത തീരുമാനമെടുത്തതായും പകരക്കാരനെ തേടാൻ ആരംഭിച്ചതായും റഷ്യൻ ഫുട്​ബാൾ യൂണിയൻ അറിയിച്ചിട്ടുണ്ട്​.

പകരക്കാരനായി കോച്ചുകളിലൊരാളുമായി ധാരണയിലെത്തിയതിനെത്തുടർന്ന് ആർ.‌എഫ്‌.യു ചെർച്ചെസോവുമായുള്ള കരാർ അവസാനിപ്പിക്കാൻ പോകുന്നതായി കഴിഞ്ഞ ദിവസങ്ങളിൽ റിപ്പോർട്ടുകൾ വന്നിരുന്നു. ജർമനിയുടെ മെൻറർ ജോക്കിം ലോ, സ്വിസ് ദേശീയ​ ടീമി​െൻറ ഹെഡ്​ കോച്ച്​ വ്​ളാദിമിർ പെറ്റ്​കോവിച്​, ജർമൻ യൂത്ത്​ ടീമിൽ ജോലി ചെയ്യുന്ന സ്​റ്റെഫാൻ കുൻറ്​സ്​ എന്നിവരുടെ പേരുകളാണ്​ അതുമായി ബന്ധപ്പെട്ട്​ ഉയർന്നുവന്നിരുന്നത്​.

2016 മുതൽ റഷ്യൻ ദേശീയ ടീമിനെ കളി പഠിപ്പിച്ചുവരികയായിരുന്നു ചെർച്ചെസോവ്​. അദ്ദേഹത്തി​െൻറ നേതൃത്വത്തിൽ 2018 ലോകകപ്പിൽ റഷ്യ ക്വാർട്ടർ ഫൈനൽ വരെ എത്തിയിരുന്നു. എന്നാൽ, ഇത്തവണത്തെ യൂറോകപ്പിൽ ഗ്രൂപ്പ്​ ഘട്ടം പോലും മറികടക്കാൻ അവർക്കായില്ല. ഗ്രൂപ്പ്​ ബിയിൽ ഏറ്റവും അവസാന സ്ഥാനക്കാരായാണ്​ അവർ ഫിനിഷ്​ ചെയ്​തത്​.