'മതി, വയറുനിറഞ്ഞു'; സ്​പെയിനിനെതിരെ ആറുഗോളിൻെറ റെക്കോർഡ്​ തോൽവി വഴങ്ങി ജർമനി

പുകൾ പെറ്റ ജർമൻ ഫുട്​ബാളിന്​ നാണക്കേടിൻെറ ദിനം. സ്​പാനിഷ്​ ടാങ്കറിന് ഒട്ടും​ കനിവ്​ തോന്നിയില്ല, എതിരില്ലാത്ത ആറുഗോളുകൾക്ക്​ സ്​പെയിൻ ജർമനിയെ തുരത്തിയോടിച്ചു. 1931ൽ ഓസ്​ട്രിയക്തെിരെ 6-0ത്തിന്​ പരാജയപ്പെട്ട ശേഷമുള്ള ജർമനിയുടെ ഏറ്റവും വലിയ തോൽവിയാണതിത്​.

ജയത്തോടെ ഗ്രൂപ്പ്​ നാലിൽ നിന്നും 11 പോയൻറുമായി സ്​പെയിൻ യുവേഫ നേഷൻസ്​ ലീഗ്​ ഫൈനൽസിലേക്ക്​ കടന്നു. പന്തടക്കത്തിലും അവസരങ്ങൾ തുറക്കുന്നതിലും മുന്നിട്ടു നിന്ന സ്​പെയിനെതിരെ കളത്തിൽ ഒരിക്കൽ പോലും പൊരുതാനാകാതെയാണ്​ ജർമനി കീഴടങ്ങിയത്​​.

17ാം മിനുറ്റിൽ അൽവാരോ ​മൊറോട്ടയുടെ ഹെഡർ ഗോളിലൂടെ സ്​പെയിൻ മുന്നിൽക്കയറി. 33ാം മിനുട്ടിൽ ക്രോസ്​ബാറിൽ തട്ടി കാലിലെത്തിയ പന്ത്​ വലയിലെത്തിച്ച്​ ഫെറാൻ ടോറസ്​ ലീഡുയർത്തി. ആഘാതത്തിൽ നിൽക്കുന്ന ജർമനിയെ അഞ്ച്​ മിനുറ്റിന്​ ശേഷം റോഡ്രി ഹെഡർ ഗോൾനേടി ഞെട്ടിച്ചു.

രണ്ടാം പകുതിയിലും മാറ്റമൊന്നുമുണ്ടായില്ല. 55ാം മിനുറ്റിൽ ടോറസ്​ വീണ്ടും ഗോളടിച്ചു. 71ാം മിനുറ്റിൽ പെനൽറ്റി ബോക്​സിനുവെളിയിൽ നിന്നും കാലിലെത്തിയ പന്ത്​ ​നിറയൊഴിച്ച്​ ടോറസ്​ ഹാട്രിക്​ പൂർത്തിയാക്കി. 89ാം മിനുറ്റിൽ മെക്കൽ ഒയർസബായ്​ ആറാംഗോളും നേടിയതോടെ കഥ പൂർണമായി.

സ്​പാനിഷ്​ മുന്നേറ്റങ്ങൾക്ക്​ കാഴ്​ചക്കാരായി നിൽക്കുക മാത്രമായിരുന്നു ജർമൻ പടയുടെ ജോലി. സ്​പെയിനിൻെറ കുറിയ പാസുകളും പ്ലാൻ ചെയ്​തുള്ള മുന്നേറ്റങ്ങളും തടുക്കാനാകാതെ പോയ ജർമനി മികച്ച മത്സരം കാണാമെന്ന്​ പ്രതീക്ഷിച്ച ഫുട്​ബാൾ ആരാധകരെക്കൂടി നിരാശ​പ്പെടുത്തിയാണ്​ കളം വിട്ടത്​.