'നിഷ്​കളങ്കരെ കൊല്ലുന്നത്​ നിർത്താൻ ലോകനേതാക്കൾ ഇടപെടൂ'​; ഫലസ്​തീന്​ ഐക്യദാർഢ്യവുമായി സലാഹും മെഹ്​റസും

ലണ്ടൻ: ഫലസ്​തീൻ പൗരൻമാർക്കെതിരെയുള്ള ഇസ്രായേൽ ആക്രമണം തുടരുന്നതിനിടെ ഐക്യദാർഢ്യവുമായി ഫുട്​ബാൾ താരങ്ങൾ. ലിവർപൂളിന്‍റെ ഈജിപ്​ഷ്യൻ സൂപ്പർ താരം മുഹമ്മദ്​ സലാഹ്​, മാഞ്ചസ്റ്റർ സിറ്റിയുടെ അൾജീരിയൻ താരം റിയാദ്​ മെഹ്​റസ്​, ഇന്‍റർ മിലാന്‍റെ മൊ​റോക്കൻ താരം അഷ്​റഫ്​ ഹാക്കിമി എന്നിവരാണ്​ ഐക്യദാർഢ്യം പ്രഖ്യാപിച്ചത്​.

''ഞാൻ നാലുവർഷമായി ജീവിക്കുന്ന രാജ്യത്തെ പ്രധാനമന്ത്രിയടക്കമുള്ള ലോക നേതാക്കളോട്​ ഞാൻ ആവശ്യപ്പെടുന്നു. നിഷ്​കളങ്കരായ മനുഷ്യ​ർക്ക്​ നേരെയുള്ള ആക്രമണങ്ങളും കൊലപാതകവും നിർത്താനായി നിങ്ങ​ളുടെ എല്ലാ അധികാരവും ഉപയോഗിക്കൂ. ഇത്​ മതിയാക്കാം.'' -ബ്രിട്ടീഷ്​ പ്രധാനമന്ത്രി ബോറിസ്​ ജോൺസ​നെ ടാഗ്​ ചെയ്​ത്​ സലാഹ്​ പറഞ്ഞു. മസ്​ജിദുൽ അഖ്​സക്ക്​ മുന്നിൽ നിൽക്കുന്ന ചിത്രവും സലാഹ്​ മറ്റൊരു പോസ്റ്റിൽ പങ്കുവെച്ചു.

മാഞ്ചസ്റ്റർ സിറ്റി താരം മെഹ്​റസ്​ ​സേവ്​ ഷെയ്​ഖ്​ ജറ്​റാഹ്​ എന്ന പോസ്റ്റർ പങ്കുവെച്ച്​ ഫലസ്​തീന്​ ഐക്യദാർഢ്യമർപ്പിച്ചു. ഫ്രീ ഫലസ്​തീൻ എന്ന തലക്കെ​ട്ടോടെ ഫലസ്​തീൻ വനിതയുടെ വിഡിയോ പങ്കുവെച്ചാണ്​ ഹാക്കിമി ഐക്യദാർഢ്യം പ്രഖ്യാപിച്ചത്​.

ക്രിക്കറ്റ്​ താരങ്ങളായ ഇർഫാൻ പത്താൻ, ഷാഹിദ്​ അഫ്രീദി, യു.എഫ്​.സി താരം ഖബീബ് നുര്‍മഗദോവ് എന്നിവരും ഫലസ്​തീന്​ പിന്തുണയർപ്പിച്ചിരുന്നു.