ഗോളിയെ പിടിച്ച്​ ഗോളി; യൂറോപ ലീഗ്​ കിരീടം സ്​പെയിനിലേക്ക്​

മഡ്രിഡ്​: പോളണ്ടിലെ ഗ്​ഡാൻസ്​കിൽ മീജെസ്​കി മൈതാനത്ത്​ മാരത്തണായി നീണ്ട പെനാൽറ്റി ഷൂട്ടൗട്ടിൽ അവസാനം ഗോളിക്കുതന്നെ പിഴച്ചപ്പോൾ ഇംഗ്ലീഷ്​ മോഹങ്ങൾക്ക്​ പൂട്ട്​. 21 പെനാൽറ്റികൾ വലക്കണ്ണികളിൽ മുത്തമിട്ട ശേഷം യുനൈറ്റഡ്​ കാവൽക്കാരൻ ഡേവിഡ്​ ഗീ എടുത്ത എടുത്ത ഷോട്ട്​ വിയ്യ റയൽ കാവൽക്കാരൻ ജെറോനിമോ റൂലി തടുത്തിട്ടതോടെയാണ്​ മാഞ്ചസ്​റ്റർ ടീമി​ന്​ എല്ലാം പിഴച്ചത്​.

ആദ്യ 90 മിനിറ്റും പിന്നീട്​ അധിക സമയമായ 30 മിനിറ്റും കഴിഞ്ഞിട്ടും വിജയി ഉറപ്പാകാതെ വന്ന മത്സരം പെനാൽറ്റി എളുപ്പം വിധിയെഴുതുമെന്ന്​ കരുതിയെങ്കിലും അതും നീളുകയായിരുന്നു. കളിയിൽ മേൽക്കൈ ഇംഗ്ലീഷ്​ ടീമിനായിരുന്നുവെങ്കിലും ഗോൾ ആദ്യം നേടിയ വിയ്യ റയൽ തന്നെ കപ്പുമായി മടങ്ങി. 29ാം മിനിറ്റിൽ മൊറേനൊയായിരുന്നു വിയ്യക്കായി ലക്ഷ്യം കണ്ടത്​. രണ്ടാം പകുതിയിൽ എഡിൽസൺ കവാനി ടീമിനെ ഒപ്പമെത്തിച്ചെങ്കിലും ഇരു ഭാഗവും കളിയും പ്രതിരോധവും തുല്യമായി കൊണ്ടുപോയപ്പോൾ ഗോളിമാർ കാഴ്​ചക്കാരായി. മൂന്നു ഷോട്ടുകൾ മാത്രമായിരുന്നു ഇരുവശത്തുമായി ഗോൾ ലക്ഷ്യമിട്ട്​ എത്തിയത്​.

120 മിനിറ്റും കളി കഴിഞ്ഞ്​ ​ഷൂട്ടൗട്ട്​ തീരുമാനിക്കുമെന്നായപ്പോൾ ഓരോ താരവും എടുത്ത കിക്ക്​ തുടരെ വലക്കണ്ണികൾ തുളച്ചപ്പോൾ പിന്നെയും കാത്തിരിപ്പ്​ നീണ്ടു. വിയ്യക്കായി 11ാം കിക്ക്​ എടുക്കുന്നത്​ കാവൽക്കാരൻ ജെറോനിമോ റൂലി. മനോഹരമായി അടിച്ച കിക്ക്​ പ്രയാസമൊന്നുമില്ലാതെ വലയിൽ. പിറകെ, മാഞ്ചസ്​റ്റർ ഗോളി പന്തുമായി പെനാൽറ്റി സ്​പോട്ടിൽ. എടുത്ത കിക്ക്​ പക്ഷേ, മുഴുനീളത്തിൽ ചാടിയ റൂലിയുടെ കൈകളിൽ തട്ടി മടങ്ങി.

ക്ലബ്​ ചരിത്രത്തിൽ ആദ്യമായാണ്​ വിയ്യ റയൽ യൂറോപ ലീഗിൽ മുത്തമിടുന്നത്​. നേരത്തെ ആഴ്​സണലിനൊപ്പമായിരുന്ന ടീം കോച്ച്​ ഉനൈ എമറിക്ക്​ ഇത്​ വിവിധ ക്ലബുകൾക്കൊപ്പം നാലാം കിരീടവും. മറുവശത്ത്​, തുടർച്ചയായ നാലാം വർഷവും വലിയ കിരീടങ്ങളൊന്നുമില്ലാത്ത ഒരു സീസൺ കൂടി പൂർത്തിയാക്കുകയാണ്​ യുനൈറ്റഡ്​. ചാമ്പ്യൻസ്​ ലീഗ്​ ഫൈനലിൽ മറ്റൊരു ഇംഗ്ലീഷ്​ ടീമുമായി അങ്കത്തിനിറങ്ങുന്ന മാഞ്ചസ്​റ്റർ സിറ്റി കിരീട​ം തൊട്ടാൽ അയൽക്കാർ വലിയ നേട്ടങ്ങളുടെ തമ്പുരാന്മാരായി വാഴുന്നത്​ നോക്കി വായിൽ വെള്ളമൂറുകയാകും സോൾഷ്യർ സംഘം ഇത്തവണയും.