ആദ്യം റെഡിയായി, പിന്നെ റെഡിയായില്ല; ബ്ലാസ്​റ്റേഴ്​സിനെ മലർത്തിയടിച്ച്​ എ.ടി.കെ

മത്സരത്തിലുണ്ടായിരുന്ന മുൻതൂക്കം ഒരിക്കൽകൂടി കേരള ബ്ലാസ്​റ്റേഴ്​സ്​ കളഞ്ഞുകുളിച്ചു. എ.ടി.കെ മോഹൻ ബഗാനെതിരെ രണ്ട​ുഗോളിന്​ മുന്നിട്ടുനിന്ന്​ ആവേശപ്പരകോടിയിലെത്തിച്ച ശേഷം രണ്ടാം പകുതിയിൽ മൂന്നെണ്ണം വഴങ്ങി ആരാധകരെ ബ്ലാസ്​റ്റേഴ്​സ്​ നിരാശയിലേക്ക്​ തള്ളിവിട്ടു.

14ാം മിനുറ്റിൽ ഗാരിഹൂപ്പറിന്‍റെ തകർപ്പൻ ലോങ്​റേഞ്ചറിലൂടെ ബ്ലാസ്​റ്റേഴ്​സ്​ സ്വപ്​നതുല്യമായാണ്​ തുടങ്ങിയത്​. ജാംഷഡ്​പൂരിനെതിരായ കഴിഞ്ഞ മത്സരത്തിൽ ഗോൾവര കടന്നിട്ടും നൽകാത്ത തന്‍റെ 'ഗോളിന്​' സമാനമായൊരു ഷോട്ടിലൂടെ ​ഹൂപ്പർ ഇക്കുറിമറുപടി പറയുകയായിരുന്നു. ഒത്തിണ​ക്കത്തോടെ പന്തുതട്ടിയ ബ്ലാസ്​റ്റേഴ്​സിനെ പിടിച്ചുകെട്ടാൻ എ.ടി.കെ പാടു​പെട്ടു.

51ാം മിനുറ്റിൽ എ.ടി.കെ ഗോൾപോസ്റ്റിനുമുമ്പിൽ നടന്ന കൂട്ടപ്പൊരിച്ചിലിനൊടുവിൽ പന്ത്​ വലയിലേക്ക്​ തള്ളിവിട്ട്​ കോസ്റ്റ ബ്ലാസ്​റ്റേഴ്​സിന്‍റെ വിജയ പ്രതീക്ഷകൾ മാനത്തെത്തിച്ചു. എന്നാൽ മത്സരത്തിലേക്ക്​ പതിയെ തിരിച്ചുവന്ന എ.ടി.കെ 69ാം മിനുറ്റിൽ ആദ്യ ഗോൾ നേടി. ബ്ലാസ്​റ്റേഴ്​സ്​ ​പ്രതിരോധനിരയെ മറികടന്ന്​ മുന്നേറിയ മാഴ്​സലീന്യോ പന്ത്​ വലയിലേക്ക്​ തിരിച്ചുവിടുകയായിരുന്നു. വൈകാതെ എ.ടി.കെയുടെ സമനില ഗോളുമെത്തി. പെനൽറ്റിബോക്​സിൽ വെച്ച്​ മൻവീറിന്‍റെ ഹെഡർ ബ്ലാസ്​റ്റേഴ്​സ്​ ​പ്രതിരോധനിരയിലെ ജെസലിന്‍റെ കൈകളിലുരസിയത്​ റഫറിയുടെ കണ്ണിൽപ്പെട്ടു. ബ്ലാസ്​റ്റേഴ്​സ്​ താരങ്ങളുടെ വാദം റഫറി വിലക്കെടുത്തില്ല. കിക്കെടുക്കാനെത്തിയ റോയ്​ കൃഷ്​ണക്ക്​ പിഴച്ചില്ല. സ്​കോർ (2-2).

തുടർന്ന്​ വിജയഗോളിനായി ഇരുടീമുകളും കിണഞ്ഞ്​ പരിശ്രമിച്ചെങ്കിലും ഫലമെത്തിയില്ല. ഒടുവിൽ നിശ്ചിത സമയത്തിന്​ മിനുറ്റുകൾക്ക്​ മു​േമ്പ ബ്ലാസ്​റ്റേഴ്​സിന്‍റെ ഹൃദയം തുളച്ച്​ റോയ്​കൃഷ്​ണയുടെ രണ്ടാംഗോളും എ.ടി.കെയുടെ വിജയഗോളും പിറന്നു. സീസണിലെ ഉദ്​ഘാടനമത്സരത്തിൽ ബ്ലാസ​്​റ്റേഴ്​സിനെതിരെ വിജയഗോൾ കുറിച്ചതും റോയ്​കൃഷ്​ണയായിരുന്നു.

തോൽവിയോടെ ആദ്യ നാലിലിടം പിടിക്കാനുള്ള ബ്ലാസ്​റ്റേഴ്​സിന്‍റെ മോഹങ്ങൾക്ക്​ മങ്ങലേറ്റു. 15 കളികളിൽ നിന്നും 15 പോയന്‍റുമായി ബ്ലാസ്​റ്റേഴ്​സ്​ 9ാം സ്ഥാനത്താണ്​. 14 മത്സരങ്ങളിൽ നിന്നും 27 പോയന്‍റുള്ള എ.ടി.കെ രണ്ടാംസ്ഥാനം ഭദ്രമാക്കി. ഫെബ്രുവരി 3ന്​ കരുത്തരായ മുംബൈ സിറ്റിക്കെതിരെയാണ്​ ബ്ലാസ്​റ്റേഴ്​സ​​ിന്‍റെ അടുത്ത മത്സരം.