കളിച്ചിട്ടും ഗോളടിക്കാതെ തുർക്കി; ഇരട്ടഗോളിൽ വിജയരഥമേറി വെയ്​ൽസ്​

ബാകു (അസർ ബൈജാൻ): കളിയുടെ ഏറിയ പങ്കും പന്ത്​ കൈവശം വെച്ചിട്ടും മത്സരം വെയ്​ൽസിന്​ മുമ്പിൽ തുർക്കി അടിയറവ്​ വെച്ചു. 42ാം മിനുറ്റിൽ ആരോൺ റംസി നേടിയ ഗോളിന്‍റെ ബലത്തിൽ മുന്നേറിയ വെയിൽസിന്​ നിറച്ചാർത്തായി ഇഞ്ച്വറി ടൈമിൽ കാനർ റോബട്​സിന്‍റെ രണ്ടാം ഗോളുമെത്തുകയായിരുന്നു. ജയത്തോടെ വെയിൽസ്​ നോക്കൗട്ട്​ പ്രതീക്ഷകൾ നിലനിർത്തി. ആദ്യ രണ്ടു മത്സരങ്ങളും പരാജയപ്പെട്ട തുർക്കിയുടെ നോക്കൗട്ട്​ പ്രതീക്ഷകൾ ഏറെക്കുറെ അസ്​തമിച്ചു. മത്സരത്തിൽ വെയിൽസിനനുകൂലമായി ലഭിച്ച പെനൽറ്റി സൂപ്പർ താരം ഗാരെത്​ ബെയ്​ൽ പുറത്തേക്കടിച്ചു.

ആദ്യം ലഭിച്ച രണ്ട്​ സുവർണാവസരങ്ങളും പാഴാക്കിയതിന്​​ പ്രായശ്ചിത്തമായി 42ാം മിനിറ്റിലാണ്​ ആരോൺ റംസിയുടെ ഗോളെത്തിയത്​. ഗാരെത്​ ബെയ്​ലിന്‍റെ അളന്നുമുറിച്ചുള്ള അസിസ്റ്റിന്​ കൃത്യമായി ഓടിയെത്തിയാണ്​ റംസി ​വലകുലുക്കിയത്​. ആദ്യ ഗോൾ വഴങ്ങിയ ശേഷം ഉണർന്നെണീറ്റ തുർക്കി പ്രത്യാക്രമണത്തിന്​ മൂർച്ചകൂട്ടി.

പതിയെ കളം പിടിച്ച തുർക്കിക്ക്​ മുന്നേറ്റങ്ങൾ ആവിഷ്​കരിക്കാനായെങ്കിലും ഗോളിലേക്ക്​ നിറയൊഴിക്കാനോ ഗോൾകീപ്പറെ പരീക്ഷിക്കാനോ ആയില്ല. 59ാം മിനിറ്റിൽ ഗാരെത്​ ബെയ്​ലിനെ വീഴ്​ത്തിയതിന്​ വെയിൽസിന്​ അനുകൂലമായി പെനൽറ്റി വിധിച്ചു. പക്ഷേ കിക്കെടുക്കാനെത്തിയ ബെയ്​ൽ അവിശ്വസനീയമാം വിധം പന്ത്​ പുറത്തേക്കടിക്കുകയായിരുന്നു.

ഇഞ്ച്വറി ടൈമിൽ വെയിൽസ്​ പെനൽറ്റി ബോക്​സിൽ വെച്ചുണ്ടായ കൈയ്യാങ്കളിക്ക്​ ഇരുടീമിലേയും രണ്ടുതാരങ്ങൾക്ക്​ വീതം മഞ്ഞക്കാർഡ്​ നൽകിയാണ് റഫറി​ പ്രശ്​നം പരിഹരിച്ചത്​. 94ാം മിനിറ്റിൽ വിസിൽ മുഴങ്ങാനിരിക്കേയായിരുന്നു റോബർട്​സിന്‍റെ ഗോൾ. ബെയ്​ലിന്‍റെ തന്നെയായിരുന്നു അസിസ്റ്റ്​. രണ്ട്​ ഗോളിനും വഴിയൊരുക്കിയ ബെയ്​ൽ തന്നെയാണ്​ കളിയിലെ താരം.