ഇന്ന്​ അൽ ബിദ്ദയിൽ ടെസ്​റ്റ്​ ഇവൻറ്​; ഹയ്യാ കാർഡുള്ളവർക്ക്​ അഞ്ചുമുതൽ പ്രവേശനം

ദോഹ: ലോകകപ്പ്​ ഫുട്​ബാളിന്റെ ആവേശക്കളരിയാവാൻ ഒരുങ്ങുന്ന അൽ ബിദ്ദ പാർക്കിലെ ഫിഫ ഫാൻ ഫെസ്​റ്റിവൽ വേദിയിലേക്ക്​ കാൽപന്ത്​ ആരാധകർക്ക്​ സ്വാഗതം. ഒരുക്കങ്ങളെല്ലാം പൂർത്തിയാക്കി കളിയുത്സവത്തിന്​ വി​രുന്നൊരുക്കാൻ കാത്തിരിക്കുന്ന ഫാൻ ഫെസ്​റ്റിവൽ വേദിക്ക്​ ഇന്ന്​ ടെസ്​റ്റ്​ ഡേയാണ്​.

40,000 പേർക്ക്​ ഒരേസമയം കളികാണാൻ അവസരമൊരുക്കുന്ന അൽ ബിദ്ദയിലെ ഫാൻ ഫെസ്​റ്റിവൽവേദി നിർമാണങ്ങളെല്ലാം പൂർത്തിയായി ലോകകപ്പിനെ വരവേൽക്കാൻ സജ്ജമായിക്കഴിഞ്ഞു. അതിന്​ മുന്നോടിയായാണ്​ ടെസ്​റ്റ്​ ഇവൻറ്​ സംഘടിപ്പിക്കുന്നത്​. ഹയ്യാ കാർഡുള്ളവർ​ക്കായിരിക്കും പരീക്ഷണ പരിപാടിയിലേക്ക്​ പ്രവേശനം. ലോകകപ്പിന്​ മുമ്പായി ഫെസ്​റ്റിവൽ വേദിയുടെ അവസാന റ​ിഹേഴ്​സൽ കൂടിയാണിത്​. 20ന്​ കിക്കോഫ്​ കുറിക്കുന്ന ലോകകപ്പിന്​ തലേദിനം തന്നെ ഫാൻഫെസ്​റ്റിവൽ വേദി ആരാധകർക്കായി തുറന്നുനൽകും. ശേഷം, ഫൈനൽ ദിനമായ ഡിസംബർ 18 വരെ കാണികളുടെ പ്രധാന ആഘോഷവേദി കൂടിയാണ്​ അൽ ബിദ്ദ പാർക്ക്​.

വിവിധ കലാവിരുന്നുകൾ ഒരുക്കിയാണ്​ 16 ബുധനാഴ്ച ഫാൻ ഫെസ്​റ്റവലിലെ ടെസ്​റ്റ്​ റൺ സംഘടിപ്പിക്കുന്നത്​. വൈകീട്ട് അഞ്ചോടെ ഗേറ്റുകൾ തുറന്നുനൽകും. രാത്രി 10 വരെയാണ്​ ഷോ. ഏഴുമുതൽ ലഘുപാനീയങ്ങളും മറ്റും വിതരണം ചെയ്യുന്ന കൗണ്ടറുകളും തുറക്കം. രാത്രി 9.30 വരെയായിരിക്കും ഓർഡറുകൾ സ്വീകരിക്കുകയെന്ന്​ അധികൃതർ അറിയിച്ചു. പ്രാദേശിക കലാകാരന്മാർകൂടി അണിനിരക്കുന്ന ഡി​.ജെ, മൈക്കൽ ജാക്​സൻ ഷോ എന്നിവയാണ്​ തയാറാക്കിയത്​. രാത്രി 11 വരെ മാത്രമേ സന്ദർശകർക്ക്​ ബിദ്ദ പാർക്കിൽ നിലനിൽക്കാൻ അനുവദിക്കൂ. ​ദോഹ മെട്രോ പുലർച്ച മൂന്നു വരെ സർവിസ്​ നടത്തും.