മൂന്നടിച്ച് അക്രം; ഏഷ്യൻ കപ്പിൽ വീണ്ടും ഖത്തർ മുത്തം

ദോഹ: ലുസൈലിലെ ഗാലറിപ്പടവുകളിൽ കടലിരമ്പംപോലെ ഒത്തുചേർന്ന ഒരു ലക്ഷത്തിനടുത്ത്​ ആരാധകർക്കു നടുവിൽ ഏഷ്യയുടെ ഫുട്​ബാൾ രാജകിരീടത്തിൽ വീണ്ടും ഖത്തറിന്റെ മുത്തം. ആവേശകരമായ ഫൈനലിൽ ജോർഡനെ 3-1ന്​ വീഴ്​ത്തിയാണ്​ സ്വന്തം മണ്ണിൽ കപ്പുയർത്തി​ ഹസൻ അൽ ഹൈദോസും കൂട്ടുകാരും വീണ്ടും ഏഷ്യൻ ഫുട്​ബാളിലെ ​വല്യേട്ടന്മാരായത്​.

നീളൻചുരുൾമുടിയുമായി കളിമൈതാനം അടക്കിവാണ സൂപ്പർതാരം അക്രം അഫീഫ്​ ഹാട്രിക്കുമായി ഫൈനലിലും ആതിഥേയരുടെ വിജയനായകനായി. കളിയുടെ ഇരു പകുതികളിലുമായി മൂന്നു​ ഗോളുകളും പെനാൽറ്റിയിലൂടെയാണ്​ ഖത്തർ ലക്ഷ്യത്തി​ലെത്തിച്ചതെന്നതും പ്രത്യേകതയാണ്​. 22, 73, 95 മിനിറ്റുകളിൽ എതിർ ബോക്​സുകളിലെ ഫൗളുകൾ പെനാൽറ്റിയായി മാറിയപ്പോൾ അക്രം അഫീഫിന്റെ ഷോട്ടുകളൊന്നും പിഴച്ചില്ല. 67ാം മിനിറ്റിൽ യാസൻ അൽ നയ്​മതിന്റെ വകയായിരുന്നു ജോർഡന്റെ ആശ്വാസ ഗോൾ​.

ഫൈനലിലെ ഹാട്രിക്കുമായി എട്ടു​ ഗോളുകളുമായി അക്രം അഫീഫ്​ ടൂർണമെൻറിലെ ഗോൾഡൻ ബൂട്ടിനും അവകാശിയായി.

2019ൽ യു.എ.ഇയിൽ നടന്ന ഏഷ്യൻ കപ്പിലൂടെ കന്നിക്കിരീടമണിഞ്ഞ ഖത്തർ ഇത്തവണ സ്വന്തം മണ്ണിൽ ഒരു കളിപോലും തോൽക്കാതെയാണ്​ കിരീടത്തിലെത്തിയത്​. ജോർഡന്റെ ആദ്യ ഫൈനൽ പ്രവേശനമായിരുന്നു.

-​മൂന്ന്​ പെനാൽറ്റിയിൽ കിരീടം

സെമിയിൽ ഇറാനെ വീഴ്​ത്തിയ ഇലവനിൽ ചെറിയ മാറ്റങ്ങളുമായാണ്​ ഖത്തർ ഇറങ്ങിയതെങ്കിലും തന്ത്രം പഴയതുതന്നെയായിരുന്നു. പന്തെടുത്ത്​ ആ​ക്രമിച്ചുകയറുക. ആദ്യ മിനിറ്റു​ മുതൽ തുടങ്ങിയ നിരന്തര മുന്നേറ്റങ്ങൾ 22ാം മിനിറ്റിൽ പെനാൽറ്റി നേടിയെടുക്കുന്നതിലാണ്​ അവസാനിച്ചത്​. പ്രതിരോധനിര താരം ലൂകാസ്​ മെൻഡിസിൽ തുടങ്ങിയ നീക്കവുമായി എതിർ ബോക്​സിലേക്ക്​ ഓടിക്കയറിയ സൂപ്പർതാരം അക്രം അഫീഫിനെ പ്രതിരോധതാരം അബ്​ദുല്ല നാസിബ്​ ഫൗൾ ചെയ്​തു വീഴ്​ത്തിയപ്പോൾ റഫറിയുടെ വിരലുകൾ പെനാൽറ്റി സ്​പോട്ടിലേക്കു​ നീണ്ടു. കിക്കെടുത്ത അക്രം അഫീഫിന്റെ വലങ്കാലൻ ഷോട്ട്​ വലയുടെ ഇടതുമൂലയിൽ ലാൻഡ്​ ചെയ്​തപ്പോൾ ഗാലറി ആരവങ്ങളാൽ ഇളകി.

ആദ്യ പകുതിയിൽ ഖത്തർ നേടിയ ഗോളിന്​ രണ്ടാം പകുതിയിലെ 67ാം മിനിറ്റിലായിരുന്നു ജോർഡന്റെ മറുപടി. വിങ്ങിൽനിന്ന് ഇഹ്​സാൻ ഹദ്ദാദിന്റെ ​ക്രോസ്​ ബോക്​സിനുള്ളിലെത്തു​മ്പോൾ ഖത്തർ പ്രതിരോധക്കാരുടെ ട്രാപ്പിൽ പെടാതെ ഒഴിഞ്ഞുനിന്ന യസാൻ അൽ നയ്​മത്​ സ്വീകരിച്ച്​ തൊടുത്ത ഇടങ്കാലൻ ഷോട്ട്​ വലയിൽ പതിച്ചു. ഇരമ്പിയാർത്ത ജോർഡൻ ആരവങ്ങളെ സുനാമി തിരമാല കണക്കെ ഉയർത്തുന്നതായിരുന്നു സമനില ഗോൾ.

എന്നാൽ, അതുവരെ കാത്ത പ്രതിരോധത്തിലെ അപ്രതീക്ഷിത വീഴ്​ചക്ക്​ കനത്ത വില നൽകേണ്ടിവന്ന ഖത്തർ തളർന്നില്ല. 73ാം മിനിറ്റിൽ ഇസ്​മാഇൽ മുഹമ്മദിനെ ബോക്​സിനുള്ളിൽ വീഴ്​ത്തിയത്​ ‘വാർ’ പരിശോധനയിൽ പെനാൽറ്റിയായി മാറിയപ്പോൾ കിക്കെടുക്കാൻ വീണ്ടും അക്രം അഫീഫ്​ തന്നെയെത്തി. ഒടുവിൽ ഇഞ്ചുറി ടൈമിൽ ജോർഡൻ ആക്രമണം ശക്തമാക്കുന്നതിനിടെ ലഭിച്ച പന്തുമായി കുതിച്ച അക്രം അഫീഫിനെ ജോർഡൻ ഗോളി യസീദ്​ അബുലൈ വീഴ്​ത്തിയതിനും പെനാൽറ്റി ലഭിച്ചപ്പോൾ ഖത്തറിന്റെ വിജയം ഉറപ്പിച്ചു