നെയ്​മറിനു​ം ഡി മരിയക്കും കോവിഡ്​

പാരിസ്​: ലീഗ്​ വൺ മത്സരത്തിന്​ ഒരാഴ്​ച മാത്രം ബാക്കിയിരിക്കെ പി.എസ്​.ജിക്ക്​ തിരിച്ചടിയായി കോവിഡ്​. ടീമിലെ സൂപ്പർ താരങ്ങളായ നെയ്​മറിനും ഡിമരിയക്കുമാണ്​ കോവിഡ്​ സ്​ഥിരീകരിച്ചത്​. ഒപ്പം സഹതാരങ്ങളായ കെയ്​ലർ നവാസിനും ലിനാർഡോ പെരഡസിനും രോഗം ബാധിച്ചതായും സ്​ഥിരീകരിക്കാത്ത റിപ്പോർട്ടുകളുണ്ട്​.

ചാമ്പ്യൻസ്​ ലീഗിൽ ബയേൺ മ്യൂണിക്കിനോട്​ തോൽവി ഏറ്റുവാങ്ങി ആഴ്​ചകൾക്കുള്ളിലാണ്​ ടീമിന്​ മറ്റൊരു തിരിച്ചടികൂടിയേൽക്കുന്നത്​. ഇതോടെ ടീം താരങ്ങളെയെല്ലാം അടിയന്തര പരിശോധനക്ക്​ വിധേയമാക്കും.

ചാമ്പ്യൻസ്​ ലീഗ്​ ഫൈനലിനു ശേഷം നെയ്​മറും പെരഡസും ഇബിസ ദ്വീപിൽ അവധി ആഘോഷത്തിലായിരുന്നു.

ഫ്രഞ്ച്​ ലീഗ്​ മത്സരങ്ങൾ ആഗസ്​റ്റ്​ 21ന്​ തുടങ്ങിയിരുന്നെങ്കിലും ചാമ്പ്യൻസ്​ ലീഗുകാരണം ഈ മാസം പത്തിനാണ്​ പി.എസ്​.ജിയുടെ ആദ്യ മത്സരം.