14ാം വയസിൽ മറഡോണ​ക്കൊപ്പം എടുത്ത ഫോ​േട്ടാ പങ്കുവെച്ച്​ നെയ്​മർ

അർജൻറീനൻ ഇതിഹാസം ഡീഗോ മറഡോണ മരണപെ​ട്ടപ്പോൾ, മഹാനായ ആ കളിക്കാരനോടൊപ്പമുള്ള ചിത്രങ്ങൾ ലോക ഫുട്​ബാളിലെ നിരവധി താരങ്ങൾ പുറത്തുവിട്ടിരുന്നു. മറഡോണക്ക്​ മരണമില്ലെന്ന്​ ആശംസിച്ച്​ ആ ഇതിഹാസ നായകനെ ലോകം സ്​മരിച്ചു.

ബ്രസീലിയൻ താരം നെയ്​മർ 14ാം വയസിൽ​ ഡീഗോയോടൊപ്പം നിൽക്കുന്ന ചിത്രമാണ്​ ഇപ്പോൾ ഫുട്​ബാൾ പ്രേമികൾ അത്ഭുത​േ​ത്താടെ നോക്കുന്നത്​. അർജൻറീന-ബ്രസീൽ സൗഹൃദ ഫുട്​സാൽ മത്സരത്തിലെത്തിയ ഡീഗോയോടൊപ്പം നെയ്​മർ ചേർന്ന്​ നിൽക്കുന്ന ചിത്രമാണ്​ പങ്കുവെച്ചത്​.

''മറഡോണയോടൊപ്പം പലതവണ ചെലവഴിച്ചിട്ടുണ്ട്​. അതിൽ ഒാർമയിൽ മായാതെയുള്ളത്​ എനിക്ക്​ പതിമൂന്നോ പതിനാലോ വയസുള്ളപ്പോൾ അദ്ദേഹത്തെ നേരിട്ടുക​ണ്ടതാണ്​. ഫോ​​​േട്ടാക്ക്​ അനുവാദം ചോദിച്ചപ്പോൾ യാ​തൊരു മടിയുമില്ലാതെ ചേർത്തുവച്ചു''- നെയ്​മർ കുറിച്ചു.

'' അർജൻറീന-ബ്രസീൽ ലെജൻഡ്​ മത്സരത്തിന്​ ബ്രസീലിൽ എത്തിയതായിരുന്നു അദ്ദേഹം. പ്രദർശന മത്സരം കാണാൻ കുറച്ച്​ കുട്ടികൾക്ക്​ അവസരം ലഭിച്ചപ്പോൾ അതിൽ ഞാനും ഉണ്ടായിരുന്നു. ബ്രസീൽ താരങ്ങൾ സഞ്ചരിച്ച ബസിൽ സീറ്റില്ലാത്തതിനാൽ അർജൻറീനൻ താരങ്ങളുടെ ബസിൽ എനിക്ക്​ കയറാൻ പറ്റി. ബസിൽ അർജൻറീനയുടെ ഒഫീഷ്യലുകളുമായി സൗഹൃദത്തിലായി​. അവരാണ്​ മറഡോണയെ പരിചയപ്പെടുത്തിത്തരുന്നത്​''- നെയ്​മർ ഒാർത്തു.

മറഡോണയുടെ സംസ്​കാര ചടങ്ങുകൾക്ക്​ ശേഷം പി.എസ്​.ജിക്കായുള്ള പരിശീലന​ സമയത്ത്​ നെയ്​മറും എംബാപ്പെയും സഹതാരങ്ങളും മറഡോണക്ക്​ ആദരവ്​ അർപ്പിച്ച്​ ജഴ്​സി അണിഞ്ഞിരുന്നു.