പി.എസ്​.ജി പകരം വീട്ടി; ജയിച്ചിട്ടും ബയേൺ സെമി കാണാതെ പുറത്ത്​

പാരിസ്​: രണ്ടാം പാദ മത്സരം തോറ്റെങ്കിലും എവേ ഗോളിന്‍റെ ബലത്തിൽ നിലവിലെ ജേതാക്കളായ ബയേൺ മ്യൂണിക്കിന്​ പു​റത്തേക്കുള്ള വഴി കാണിച്ച്​ പി.എസ്​.ജി ചാമ്പ്യൻസ്​ ലീഗ്​ സെമിഫൈനലിൽ കടന്നു.

രണ്ടാം പാദ ക്വാർട്ടറിൽ 1-0ത്തിനായിരുന്നു ബയേണിന്‍റെ ജയം. എന്നാൽ സ്വന്തം മൈതാനത്തിലേറ്റ 3-2ന്‍റെ തോൽവിയുടെ ക്ഷീണം തീർക്കാൻ ആ ജയം പോരായിരുന്നു. പോർചുഗീസ്​ ക്ലബായ എഫ്​.സി. പോർ​​ട്ടോയെ ഇരുപാദങ്ങളിലുമായി 2-1ന്​ വീഴ്​ത്തി ഇംഗ്ലീഷ്​ കരുത്തരായ ചെൽസിയും സെമിയിലെത്തി.

പകരം വീട്ടി പി.എസ്​.ജി

കഴിഞ്ഞ വർഷത്തെ ചാമ്പ്യൻസ്​ ലീഗ്​ ഫൈനലി​ലേറ്റ തോൽവിക്ക്​ പകരം വീട്ടുകയായിരുന്നു പി.എസ്​.ജി. ആദ്യപാദത്തിലെ തോൽവിയുടെ ഫലമായി ജർമൻ ജേതാക്കളായ ബയേണിന്​ രണ്ട്​ ഗോൾ മാർജിനിൽ ജയിക്കേണ്ടിയിരുന്നു. എന്നാൽ പാർക്​ ഡി പ്രിൻസസിൽ ഒരുഗോളിന്​ മാത്രമാണ്​ ബയേണിന്​ വിജയിക്കാനായത്​.

മത്സരത്തിൽ പി.എസ്​.ജിയുടെ ആധിപത്യമാണ്​ കണ്ടതെങ്കിലും 40ാം മിനിറ്റിൽ ചൂപോ മോട്ടിങ്​ ബയേണിനായി വലുകലക്കി. പി.എസ്​.ജി സൂപ്പർ താരം നെയ്​മറിന്‍റെ രണ്ട്​ ഗോൾ അവസരങ്ങൾ വിഫലമായി. അഗ്രിഗേറ്റ്​ സ്​കോർ 3-3 ആയതോടെ എവേ ഗോൾ ആനുകൂല്യത്തിൽ പി.എസ്​.ജി അവസാന നാലിലെത്തുകയായിരുന്നു.

മെഹ്​ദി തരേമിയുടെ വണ്ടർ ഗോളിലും രക്ഷയില്ലാതെ പോർ​ട്ടോ

ആദ്യ പാദ മത്സരത്തിൽ പോർ​ട്ടോക്കെതിരെ 2-0ത്തിനായിരുന്നു ചെൽസിയുടെ വിജയം. രണ്ടാം പാദ മത്സരത്തിന്‍റെ ഇഞ്ചുറി സമയത്ത്​ മെഹ്​ദി തരേമിയുടെ വണ്ടർ ഗോളിലൂടെ പോർ​ട്ടോ വിജയിച്ചെങ്കിലും ഇരുപാദങ്ങളിലുമായി 2-1ന്‍റെ മുൻതൂക്കത്തിൽ ചെൽസി മുന്നേറി.

ബൈസിക്കിൾ കിക്കിലൂടെയാണ് പോർട്ടോ താരം ലക്ഷ്യം കണ്ടത്​. 2014ന്​ ശേഷം ആദ്യമായാണ്​ ചെൽസി ചാമ്പ്യൻസ്​ ലീഗ്​ സെമിയിൽ കടക്കുന്നത്​.