പുതിയ റെക്കോർഡിട്ട്​ ക്രിസ്റ്റ്യാനോ റൊണാൾഡോ; ഖത്തറിനെ തകർത്ത്​ പോർച്ചുഗൽ

ലിസ്​ബൺ: അന്താരാഷ്​ട്ര ഫുട്​ബാളിൽ മറ്റൊരു റെക്കോർഡ്​ കൂടി തുന്നിച്ചേർത്ത്​ പോർച്ചുഗീസ്​ ഇതിഹാസം ക്രിസ്റ്റ്യാനോ റൊണാൾഡോ. ഖത്തറിനെതിരെ ശനിയാഴ്ച രാത്രി നടന്ന സൗഹൃദമത്സരത്തിൽ ബൂട്ട്​ കെട്ടിയതോടെ ഏറ്റവും കൂടുതൽ അന്താരാഷ്​ട്ര മത്സരങ്ങളിൽ കളത്തിലിറങ്ങുന്ന യൂറോപ്യൻ താരമെന്ന റെക്കോർഡ്​ റൊണാൾഡോ സ്വന്തം പേരിലാക്കി. 180 മത്സരങ്ങളിൽ സ്​പെയിനിനായി കളത്തിലിറങ്ങിയ സെർജിയോ റാമോസിന്‍റെ പേരിലുള്ള റെക്കോർഡാണ്​ 181ാമത്​ മത്സരത്തിനിറങ്ങി റൊണാൾഡോ പഴങ്കഥയാക്കിയത്​.

മത്സരത്തിൽ ഖത്തറിനെ പോർച്ചുഗൽ എതിരില്ലാത്ത മൂന്ന്​ ഗോളുകൾക്ക്​ തകർത്തു. മത്സരത്തിൽ ആദ്യ ഗോൾ നേടിയ റൊണാൾഡോ അന്താരാഷ്​ട്ര ഫുട്​ബാളിൽ തന്‍റെ ഗോൾനേട്ടം 112 ആയി ഉയർത്തി. പോയമാസം അയർലൻഡിനെതിരെ ഇരട്ടഗോളുകൾ നേടി ഇറാൻ താരം അലിദേയിയുടെ പേരിലുള്ള അന്താരാഷ്​ട്ര ഗോൾ റെക്കോർഡ്​ റൊണാൾഡോ മറികടന്നിരുന്നു.

മത്സരത്തിന്‍റെ 37ാം മിനിറ്റിലായിരുന്നു റൊണാൾഡോയുടെ ഗോൾ.ആദ്യ പകുതിക്ക്​ ശേഷം റൊണാൾഡോയെ മത്സരത്തിൽ നിന്നും പിൻവലിച്ചിരുന്നു. 48ാം മിനിറ്റിൽ ജോസ്​ ഫോണ്ടെ, 90ാം മിനിറ്റിൽ ആന്ദ്രേ സിൽവ എന്നിവരും പറങ്കികൾക്കായി ഗോൾ നേടി.