മെസ്സിയും നെയ്​മറുമില്ലാതെ ഇറങ്ങിയിട്ടും ലീഗ്​ വണ്ണിൽ തകർപ്പൻ ജയവുമായി പി.എസ്​.ജി

പാരിസ്​: സൂപർ താരങ്ങളായ ലയണൽ ​െമസ്സി, നെയ്​മർ എന്നിവരെ കരക്കിരുത്തി ഇറങ്ങിയ പാരിസ്​ ​െസന്‍റ്​ ജെർമന്​ ഫ്രഞ്ച്​ ലീഗിൽ അനായാസ ജയം. ദുർബലരായ ബ്രെസ്റ്റിനെയാണ്​ രണ്ടിനെതിരെ നാലു ഗോളുകൾക്ക്​ എംബാപ്പെയും സംഘവും മുക്കിയത്​. ഇതോടെ, ഇതുവരെ കളിച്ച മൂന്നും ജയിച്ച്​ പി.എസ്​.ജി പട്ടികയിൽ ഒന്നാമ​തായി.

ആദ്യം ആൻറർ ഹെരേരയും പിറകെ കിലിയൻ എംബാപ്പെയുമാണ്​ പി.എസ്​.ജിയെ ആദ്യ പകുതിയിൽ മുന്നിലെത്തിച്ചത്​. ഫ്രാങ്ക്​ ഹൊനാററ്റ്​ ഒന്ന്​ മടക്കിയതോടെ കളിക്ക്​ ചൂടുപിടിച്ചെങ്കിലും രണ്ടാം പകുതിയിൽ ഇദ്​രിസ ഗയിയും എയ്​ഞ്ചൽ ഡി മരിയയും അവശേഷിച്ച ഗോളുകൾ കൂടി വലയിലെത്തിച്ച്​ പി.എസ്​.ജിയെ ബഹുദൂരം മുന്നിൽ നിർത്തി. അതിനിടെ മൂനിയിലൂടെ ബ്രെസ്റ്റ്​ ഒന്നുകൂടി മടക്കിയത്​ വൻതോൽവിക്കിടെ ആശ്വാസമായി.

ഈ മാസാദ്യം പി.എസ്​.ജിക്കൊപ്പം ചേർന്ന മെസ്സി അടുത്തയാഴ്ച ബൂട്ടുകെട്ടുമെന്നാണ്​ സൂചന. കോപ അമേരിക്ക ജയിച്ച അർജന്‍റീന ടീമിലെ സഹതാരം പരേഡെസും പി.എസ്​.ജി ജഴ്​സിയിൽ ഇന്നലെ ഇറങ്ങിയില്ല. സെർജിയോ റാമോസ്​, യൂറോ ജേതാക്കളായ ഇറ്റലിയ​ുടെ ഗോളി ജിയാൻലൂജി ഡോണറുമ്മ എന്നിവർക്കും കോച്ച്​ വിശ്രമം നൽകി.

അതേ സമയം, എംബാപ്പെക്കൊപ്പം അശ്​റഫ്​ ഹകീമി, ജോർജിനോ വിജ്​നാൾഡം, മാർകൊ വെറാറ്റി എന്നിവരെ ആദ്യ ഇലവനിൽ പരീക്ഷിച്ചു. നിലവിൽ യൂറോപിലെ ഏറ്റവും കരുത്തരായ ടീമുകള​ിലൊന്നാണ്​ പി.എസ്​.ജി.