കാത്തിരിപ്പുകൾക്ക്​ വിട; രാജരഥമേറി ലിയോ

​സവോപോളോ: ലക്ഷം പേരെയെങ്കിലും കൊള്ളുന്ന മാറക്കാന ഓരോ ബ്രസീലുകാരന്‍റെയും സ്വപ്​നങ്ങളോളം വിശാലമായ മൈതാനമാണ്​. പതിറ്റാണ്ടുകൾക്കിടെ​ പലവട്ടം രാജ്യത്തെ വലിയ ഉയരങ്ങളേറാൻ കൈപിടിച്ച സ്​റ്റേഡിയം. പക്ഷേ, തോൽവി ഇടിത്തീയായി വന്നുവീണ 50കളിലെ അതേ ഓർമകളിലേക്ക്​ ഒരിക്കൽകൂടി സാംബ സംഘം മടങ്ങു​േമ്പാൾ ശരിക്കും ആഘോഷിച്ച്​ ഇപ്പുറത്ത്​ മെസ്സിയുണ്ട്​. ദേശീയ ജഴ്​സിയിൽ അരങ്ങേറി വർഷങ്ങളായിട്ടും കിരീടവരൾച്ച ശാപമായി തുടർന്നതിനൊടുവിൽ നീലക്കുപ്പായക്കാരുടെ വിജയനായകനും മിശിഹയുമായി സാക്ഷാൽ ലയണൽ മെസ്സി...

ഗോൾ സമ്പാദ്യം പരിഗണിച്ചാൽ അർജന്‍റീന നായകൻ ഒരു പടി മുന്നിലായിട്ടും ഫൈനൽ തുടങ്ങും മു​െമ്പ ടൂർണമെന്‍റിന്‍റെ താരങ്ങളായി മെസ്സിയെയും നെയ്​മറെയും കോപ തെരഞ്ഞെടുത്തിരുന്നു. ആറുകളികളിൽ നാലു ഗോളും അഞ്ച്​ അസിസ്റ്റുമായിരുന്നു ലിയോയുടെ സമ്പാദ്യമെങ്കിൽ നെയ്​മർ അഞ്ചു കളികളിൽ രണ്ടു ഗോളും മൂന്ന്​ അസിസ്റ്റുമായി തൊട്ടുപിറകിൽ നിന്നു. ടൂർണമെന്‍റിന്​ അവസാന വിസിൽ മുഴങ്ങി നീലക്കുപ്പായക്കാർ കപ്പുയർത്തു​േമ്പാൾ ഇനി എല്ലാം മെസ്സിമയം.

2005ലാണ്​ ദേശീയ ജഴ്​സിയിൽ മെസ്സി അരങ്ങേറുന്നത്​. പലവട്ടം ഫൗളിനിരയായാലും വീഴാൻ മടിച്ച്,​ അസാധ്യ ആംഗിളിൽനിന്ന്​ വല കുലുക്കുന്ന, ​​ഡ്രിബ്​ളിങ്ങിൽ നെഞ്ചു പിടക്കുന്ന കൃത്യതയും സൗകുമാര്യവുമായി, നാണംകുണുങ്ങിയായ പയ്യൻ അധികം കഴിയുംമു​െമ്പ അർജന്‍റീനക്ക്​ ഒളിമ്പിക്​സിൽ കിരീടം നൽകിയെങ്കിലും മറ്റു ചാമ്പ്യൻഷിപ്പുകൾ വഴിമാറി നിന്നു. ബാഴ്​സക്കൊപ്പം ലോകം കീഴടക്കിയപ്പോഴും നീലക്കുപ്പായത്തിൽ നിർഭാഗ്യം വേട്ടയാടി. കോപ 2020ന്​ കൊടിയിറങ്ങു​േമ്പാൾ പക്ഷേ, എല്ലാം മാറിയിരിക്കുന്നു.

ഇത്തവണ, ബ്രസീലും അർജന്‍റീനയും കരുത്തും കരുതലും കൂടെകൂട്ടിയാണ്​ ഫൈനൽ വരെയെത്തിയത്​. ആറു കളികളിൽ ഇരു ടീമും പൂർത്തിയാക്കിയത്​ അഞ്ച്​ ജയം. ബ്രസീൽ 12 ഗോൾ നേടിയപ്പോൾ അർജന്‍റീന ഒന്ന്​ കുറച്ച്​ 11 എണ്ണം എതിർവലയിലെത്തിച്ചു. അർജന്‍റീനയുടെ അധിക ഗോളുകൾക്ക്​ പിന്നിലും മെസ്സിയുണ്ടായിരുന്നു. ടീമിനെ ജയിപ്പിച്ച പ്രകടനം പരിഗണിച്ചാലും നെയ്​മറെക്കാൾ ഒരു പണത്തൂക്കം മുന്നിൽ ലിയോ തന്നെ നിന്നു. അവസാനം 1993നു ശേഷം ആദ്യമായി അർജന്‍റീന കപ്പുയർത്തു​േമ്പാൾ മൈതാനത്തും പുറത്തും നായകനായി അവതരിച്ചതും ആറുവട്ടം ബാലൻ ദി ഓർ നേടിയ സൂപർ ലിയോ...

2007, 2015, 2016 വർഷങ്ങളിൽ കപ്പിനും ചുണ്ടിനുമിടയിൽ കോപ നഷ്​ടമായതിന്‍റെയും 2014ൽ ലോകകപ്പ്​ പോയതിന്‍റെയും കടം വീട്ടാൻ അവസാനം കാനറികളുടെ ചിറകുതന്നെ അരിഞ്ഞ്​ പ്രതികാരം വീട്ടുന്ന സന്തോഷം കൂടിയുണ്ടാകും. കോപയുടെ ചരിത്രത്തിൽ ഉറുഗ്വായ്​ക്കു ഒപ്പം ഏറ്റവും കൂടുതൽ കിരീട​ സമ്പാദ്യം എന്ന റെക്കോഡും ഇതോടെ അർജന്‍റീന സ്വന്തമാക്കി. ഒമ്പതെണ്ണം സ്വന്തമാക്കിയ ബ്രസീലാണ്​ രണ്ടാമത്​​.

സ്വന്തം മണ്ണിൽ ഏറെയായി പരാജയപ്പെട്ടില്ലെന്ന റെക്കോഡുമായാണ്​ ഇന്ന്​ ബ്രസീൽ നീലക്കുപ്പായക്കാർക്കെതിരെ ഇറങ്ങിയിരുന്നത്​. 22ാം മിനിറ്റിൽ ഡി മരിയ എല്ലാം അവസാനിപ്പിച്ച്​ വല ചലിപ്പിച്ചപ്പോൾ മെസ്സിക്കൊപ്പം ലോകവും സന്തോഷിക്കുന്നുണ്ടാകും.