മതേവൂസിന്‍റെ ഓർമയിൽ ഡീഗോക്കൊപ്പം കളിച്ച ഫൈനലുകൾ

ഏറ്റവും കൂടുതൽ ലോകകപ്പ് പങ്കാളിത്തമുള്ള താരമാണ് ജർമൻ ഇതിഹാസം ലോഥർ മതേവൂസ്. അഞ്ചു ലോകകപ്പ് ചാമ്പ്യൻഷിപ്പുകളിൽ ബൂട്ട് കെട്ടിയവർ മൂന്നേ മൂന്ന് ഫുട്ബാൾ താരങ്ങളിൽ ഒരാൾ. 25 മത്സരങ്ങളിൽ കളിച്ച പരിചയം. 1990 ഇറ്റലി ലോകകപ്പിൽ കിരീടം ചൂടിയ ജർമൻപടയുടെ നായകൻ. ലോകകപ്പിന്‍റെ മുറ്റങ്ങളിൽ ചിരപരിചിതനാണ് ഈ മിഡ്ഫീൽഡ് മാർഷൽ.

1982ൽ കരിയറിലെ ആദ്യ ലോകകപ്പ് കളിക്കുമ്പോൾ 21 ആയിരുന്നു പ്രായം. അന്ന് കാൾ ഹെൻസ് റുമിനിഷും ക്ലോസ് ഫിഷറും വാണ ജർമൻ ടീമിൽ റിസർവ് ബെഞ്ചിലായിരുന്നു ഏറെയും സ്ഥാനം. ഫൈനലിൽ ഇറ്റലിയോട് തോറ്റ് ജർമനി മടങ്ങി. 1986 മെക്സികോയിൽ മറഡോണ തേരോട്ടം നടത്തിയപ്പോൾ ടീമിലെ പ്രധാനിയായിരുന്നു. 1990 ഇറ്റലിയിലെത്തിയപ്പോൾ വീണ്ടും മറഡോണയുടെ സംഘവുമായി കോർത്തപ്പോൾ കിരീടവിജയവുമായി മതേവൂസ് താരമായി. പിന്നീട് 1994 ഇറ്റാലിയയിലും 1998 ഫ്രാൻസിലും കളിച്ച് 150 മത്സരങ്ങളുടെ അനുഭവ സമ്പത്തുമായാണ് പടിയിറങ്ങുന്നത്. ലോകകപ്പിലെ ഏറ്റവും മികച്ച ഓർമകളായി ജർമൻ താരം എപ്പോഴും പങ്കുവെച്ചത് ഡീഗോ മറഡോണക്കെതിരെ പന്തു തട്ടിയ നിമിഷങ്ങളാണ്. രണ്ടു ലോകകപ്പ് ഫൈനലുകളിലായിരുന്നു ഇരുവരും മുഖാമുഖം മാറ്റുരച്ചത്.

ഇക്കഴിഞ്ഞ ജൂണിൽ ഡീഗോയുടെ 1986ലെ കിരീട വിജയത്തിന്‍റെ 36ാം വാർഷികത്തിലായിരുന്നു ലോതർ മതേവൂസ് ഈ ഓർമകൾ പങ്കുവെച്ചത്. കളത്തിൽ എതിരാളികളായിരുന്നുവെങ്കിലും ഡീഗോയുമായി വലിയൊരു സൗഹൃദം എന്നും നിലനിർത്തിയതായി ജർമൻ താരം ഓർക്കുന്നു. 1986, 1990 ഫൈനലിൽ തങ്ങളുടെ ടീമുകൾ മുഖാമുഖം മാറ്റുരച്ചും ആദ്യം മറഡോണ കിരീടമണിഞ്ഞതും അടുത്ത ഫൈനലിൽ തന്‍റെ ടീം കിരീടമണിഞ്ഞതും ജീവിതത്തിലെ ഏറ്റവും വലിയ മുഹൂർത്തങ്ങളായി അദ്ദേഹം പങ്കുവെക്കുന്നു. 'ഞങ്ങൾ ഇരുവരും രണ്ടു ലോകകപ്പ് ഫൈനലുകളിൽ ഏറ്റുമുട്ടി. ഇറ്റലിയിലെ സീരി 'എ' ചാമ്പ്യൻഷിപ്പിൽ ഞങ്ങൾ ഇന്‍റർമിലാൻ-നാപോളി ടീമുകളിലായി ഏറെ മത്സരങ്ങളിൽ മാറ്റുരച്ചിരുന്നു. അതിലുപരി വലിയൊരു സൗഹൃദവും കാത്തുസൂക്ഷിച്ചു. പരസ്പര ബഹുമാനത്തോടെയുള്ള സൗഹൃദം. കളത്തിൽ പലതവണ കൊമ്പുകോർത്തെങ്കിലും രാത്രികളിൽ ഒന്നിച്ച് വെളുക്കുവോളം ഏറെ ആഘോഷമാക്കിയിരുന്നു' -മതേവൂസ് ഓർക്കുന്നു.

ലോ​ക​താ​ര​ങ്ങ​ളും ഇ​ന്ത്യ​ൻ ഫു​ട്​​ബാ​ൾ ഇ​തി​ഹാ​സ​ങ്ങളും ലോകകപ്പ്​ ഫുട്​ബാൾ ഓ​ർ​മ​പുതുക്കുന്ന 'മെ​മ്മ​റി കി​ക്കി​ൽ​' ഖ​ത്ത​റി​ലെ വാ​യ​ന​ക്കാ​ർ​ക്കും തങ്ങളുടെ ഓ​ർ​മ​യി​ലെ ലോ​ക​ക​പ്പ്​ നി​മി​ഷ​ങ്ങ​ൾ പ​ങ്കു​വെ​ക്കാം. ലോ​ക​ക​പ്പ്​ ഓ​ർ​മ എ​ഴു​തി 'മെ​മ്മ​റി കി​ക്കി​ലേ​ക്ക്​' അയക്കാം. (ഇ മെയിൽ: qatar@gulfmadhyamam.net, വാട്​സാപ്​: 5528 4913)