എംബാപെക്ക്​ നൂറാം ഗോൾ; പി.എസ്​.ജിക്ക്​ ജയം, ബഹുദൂരം മുന്നിൽ

ക്ലബിനായി ഗോൾ സെഞ്ച്വറി തികച്ച സൂപ്പർ സ്​ട്രൈക്കർ കിലിയൻ എംബാപെയുടെ കരുത്തിൽ ലീഗ്​ വണിലെ മുമ്പന്മാരായ പി.എസ്​.ജി വിജയക്കുതിപ്പ്​ തുടരുന്നു. എംബാപെയുടെ ഇരട്ട ഗോൾ മികവിൽ 2-0ത്തിന്​ എ.എസ്​ മോണകോ​യെയാണ്​ പി.എസ്​.ജി തോൽപിച്ചത്​.

പെനാൽറ്റിയിൽനിന്നും (12) ലയണൽ മെസ്സിയുടെ അസിസ്​റ്റിൽനിന്നും (45) ആയിരുന്നു എംബാപെയുടെ ഗോളുകൾ. 22 വർഷവും 357 ദിവസവും പ്രായമുള്ളപ്പോൾ നൂറുഗോൾ തികച്ച എംബാപെ ഫ്രഞ്ച്​ ലീഗിൽ ആ നേട്ടം കൈവരിക്കുന്ന പ്രായം കുറഞ്ഞ താരമാണ്​.

18 കളികളിൽ 45 പോയൻറുള്ള പി.എസ്​.ജി ഒന്നാംസ്ഥാനത്ത്​ ബഹുദൂരം മുന്നിലാണ്​. രണ്ടാമതുള്ള ഒളിമ്പിക്​ മാ​ഴ്​സെക്ക്​ 32 പോയൻറാണുള്ളത്​. മാഴ്​സെ 2-0ത്തിന്​ സ്​ട്രാസ്​ബർഗിനെ തോൽപിച്ചു.

തകർപ്പൻ ജയവുമായി ഇൻറർ മുന്നിൽ

ഇറ്റാലിയൻ സീരി എയിൽ നിലവിലെ ജേതാക്കളായ ഇൻറർ മിലാൻ സീസണിലാദ്യമായി മുന്നിലെത്തി. 17ാം റൗണ്ടിൽ കാഗ്ലിയാരിയെ 4-0ത്തിന്​ തകർത്ത ഇൻററിന്​ മുന്നിലുണ്ടായിരുന്ന എ.സി മിലാൻ സമനിലയിൽ കുടുങ്ങിയതും നേട്ടമായി. ഉദിനീസാണ്​ മിലാനെ 1-1ന്​ തളച്ചത്​. ഇൻററിന്​ 40ഉം മിലാന്​ 39ഉം പോയൻറാണുള്ളത്​.

മൂന്നാമതുണ്ടായിരുന്ന നാപോളി 1-0ത്തിന്​ എംപോളിയോട്​ തോറ്റപ്പോൾ വെറോണയെ 2-1ന്​ കീഴടക്കിയ അത്​ലാൻറ മൂന്നാം സ്ഥാനത്തേക്ക്​ കയറി. അത്​ലാൻറക്ക്​ 37ഉം നാപോളിക്ക്​ 36ഉം പോയൻറുണ്ട്​. ഒരുഘട്ടത്തിൽ പോയൻറ്​ പട്ടികയിൽ തലപ്പത്തുണ്ടായിരുന്ന നാപോളിക്ക്​ അവസാന അഞ്ചു മത്സരങ്ങളിൽ മൂന്നു തോൽവിയും ഒരു സമനിലയും വഴങ്ങേണ്ടിവന്നതാണ്​ വിനയായത്​.

കാഗ്ലിയാരിക്കെതിരെ ലൗതാറോ മാർട്ടിനെസ്​ (2), അലക്​സിസ്​ സാഞ്ചസ്​, ഹകാൻ ചൽഹാനോഗ്​ലു എന്നിവരാണ്​ ഇൻററിനായി സ്​കോർ ചെയ്​തത്​. ബെറ്റോയുടെ ഗോളിൽ മുന്നിലെത്തിയ ഉദിനീസിനെതിരെ ഇഞ്ചുറി സമയത്ത്​ സ്ലാറ്റൻ ഇബ്രാഹിമോവിചി​െൻറ ഗോളിലാണ്​ മിലാൻ സമനില പിടിച്ചത്​.

മ​ഡ്രിഡ്​ പോരിൽ ജയം; കുതിപ്പ്​ തുടർന്ന്​ റയൽ

സ്​പാനിഷ്​ ലാ ലിഗയിൽ റയൽ മഡ്രിഡ്​ വിജയക്കുതിപ്പ്​ തുടരുന്നു. മഡ്രിഡ്​ നഗരപോരിൽ അത്​ലറ്റികോ മഡ്രിഡി​െൻറ വെല്ലുവിളി 2-0ത്തിന്​ മറികടന്ന റയൽ മഡ്രിഡ്​ ഒന്നാം സ്ഥാനത്ത്​ ലീഡ്​ എട്ടു പോയൻറാക്കി ഉയർത്തി. 17 മത്സരങ്ങളിൽ റയലിന്​ 42 പോയൻറായപ്പോൾ രണ്ടാമതുള്ള സെവിയ്യക്ക്​ 16 കളികളിൽ 34 പോയൻറാണുള്ളത്​. റയൽ ബെറ്റിസ്​ (33), അത്​ലറ്റികോ മഡ്രിഡ്​ (29), റയൽ സോസിഡാഡ്​ (29) ടീമുകളാണ്​ അഞ്ചു വരെ സ്ഥാനത്ത്​. കഴിഞ്ഞദിവസം ഒസാസുനയോട്​ 2-2 സമനില വഴങ്ങിയ ബാഴ്​സലോണ 24 പോയൻറുമായി എട്ടാംസ്ഥാനത്താണ്​.

നഗരവൈരികളായ അത്​ലറ്റികോക്കെതിരെ ഇരുപകുതികളിലായി സൂപ്പർ സ്​ട്രൈക്കർ കരീം ബെൻസേമ (16), മാർകോ അസെൻസിയോ (57) എന്നിവരാണ്​ റയലി​െൻറ ഗോളുകൾ നേടിയത്​. ടോപ്​സ്​കോറർ സ്ഥാനത്തുള്ള ബെൻസേമയുടെ 13ാം ഗോളാണിത്​. വിനീഷ്യസ്​ ജൂനിയറാണ്​ രണ്ടു ഗോളുകൾ​ക്കും വഴിയൊരുക്കിയത്​. 10 ഗോളുമായി ബെൻസേമക്കുപിന്നിൽ രണ്ടാമതുണ്ട്​ വിനീഷ്യസ്​. അസിസ്​റ്റ്​ കണക്കിലും ഏഴെണ്ണവുമായി ബെൻസേമ മുന്നിലുണ്ട്​. വിനീഷ്യസിനും നാല്​ അസിസ്​റ്റുണ്ട്​. ബെൻസേമ-വിനീഷ്യസ്​ ജോടിയുടെ മികച്ച ഫോമാണ്​ സീസണി​ൽ റയലി​െൻറ കുതിപ്പിനുപിന്നിലെ പ്രധാന ഊർജം.

രണ്ടു തവണ ലീഡ്​ നേടിയ ശേഷമാണ്​ ബാഴ്​സ ഒസാസുനയോട്​ സമനില വഴങ്ങിയത്​. ബാഴ്​സക്കായി നികോ ഗോൺസാലസ്​, അബ്​ദുസ്സമദ്​ അസ്സൽസൗലി എന്നിവരാണ്​ സ്​കോർ ചെയ്​തത്​. ഡേവിഡ്​ ഗാർഷ്യയും എസക്വീൽ ആവിലയും ഒസാസുനക്കായി സ്​കോർ ചെയ്​തു. റയൽ ബെറ്റിസ്​ 4-0ത്തിന്​ റയൽ സോസിഡാഡിനെയും സെവിയ്യ 1-0ത്തിന്​ അത്​ലറ്റികോ ബിൽബാവോയെയും വിയ്യാറയൽ 2-0ത്തിന്​ റയോ വയ്യെകാനോയെയും തോൽപിച്ചു.