സതാംപ്​ടനെതിരെ ഗോൾവേട്ട; റെക്കോഡ്​ തൊട്ട്​ യുനൈറ്റഡ് വിജയം

ലണ്ടൻ: ഒമ്പതാളായി ചുരുങ്ങിയ സതാംപ്​ടണിനെതിരെ ഒമ്പതു ഗോൾ ജയവുമായി പ്രിമിയർ ലീഗിൽ മാഞ്ചസ്റ്റർ യുനൈറ്റഡിന്‍റെ തേരോട്ടം. ഓൾഡ്​ ട്രാഫോഡിൽ വിരുന്നെത്തിയ സതാംപ്​ടൺ നിരയിലെ അലക്​സാണ്ടർ ജാ​ൻകെവിറ്റ്​സ്​​ രണ്ടാം മിനിറ്റിൽ ചുവപ്പുകാർഡുമായി മടങ്ങിയ​താണ്​ റെക്കോഡിലേക്ക്​ ഗോളടിച്ചുകയറാൻ യുനൈറ്റഡിന്​ തുണയായത്​.

പ്രിമിയർ ലീഗിൽ മൂന്നാം തവണയാണ്​ ഒരു ടീം ഒമ്പതു ഗോൾ ജയം നേടുന്നത്​. യുനൈറ്റഡിനിത്​ രണ്ടാം തവണയും. 1995ൽ ഇപ്​സിഷിനെയാണ്​ യുനൈറ്റഡ്​ വീഴ്​ത്തിയിരുന്നത്​. 18ാം മിനിറ്റിൽ വാൻ ബിസാക്കയാണ്​ കളിയിലെയും സ്വന്തം കരിയറിലെയും സ്​കോറിങ്ങി​ന്​ തുടക്കമിട്ടത്​. മാർകസ്​ റാഷ്​ഫോഡ്​, എഡിൻസൺ കവാനി എന്നിവരും ഒന്നാം പകുതിയിൽ ലക്ഷ്യം കണ്ടു. സതാംപ്​ടൺ താരം ജാൻ ബെഡ്​നാരെക്​ വഴിമറന്ന്​ സെൽഫ്​ ഗോളുമായി പാര പണിത​പ്പോൾ ആദ്യ 45 മിനിറ്റിൽ തന്നെ സതാംപ്​ടൺ വലയിൽ വീണത്​ നാലു ഗോളുകൾ.

താളം പിന്മടങ്ങിയ രണ്ടാം പകുതിയിൽ ഗോൾ കൂടുതൽ അടിച്ചുകയറ്റാൻ യുനൈറ്റഡ്​ ആവേശം കാണിക്കാത്തത്​ തുടക്കത്തിൽ മന്ദത നൽകിയെങ്കിലും അവസാന 21 മിനിറ്റിനിടെ സതാംപ്​ടൺ വലയിൽവീണത്​ അഞ്ചു ഗോളുകൾ. എട്ടു കളികളിൽ ഗോൾ നേടാനാകാതെ വിഷമിച്ച ആന്‍റണി മാർഷ്യലും ഇന്നലെ ഗോൾ നേടി- അതും രണ്ടുവട്ടം. ബ്രൂണോ ഫെർണാണ്ടസ്​, മക്​ടോമിനെ, ജെയിംസ്​ എന്നിവരാണ്​ മറ്റു സ്​കോറർമാർ.

മറുവശത്ത്​, ആദ്യ പകുതിയിൽ സെൽഫ്​ ഗോൾ വഴങ്ങി ടീമിന്​ പണി നൽകിയ ബെഡ്​നാരെക്​ 87ാം മിനിറ്റിൽ ചുവപ്പുകാർഡ്​ കണ്ട്​ പുറത്തുപോകുകയും ചെയ്​തു. ഇതിനു ശേഷം മാത്രം സതാംപ്​ടൺ വലയിൽവീണത്​ രണ്ടു ഗോളുകൾ.

അവസാന നാലുകളികളിൽ ഒരു ജയം മാത്രം സമ്പാദ്യമെന്ന മോശം റെക്കോഡുമായി ഇന്നലെ മൈതാനത്തിറങ്ങിയ യുനൈറ്റഡ്​ എല്ലാം മറന്ന പ്രകടനമാണ്​ പുറത്തെടുത്തത്​. ഇതോടെ, പോയിന്‍റ്​ നിലയിൽ സിറ്റിക്ക്​ തൊട്ടു​പിറകിൽ ടീം രണ്ടാമതെത്തി. ഇരു ടീമുകൾക്കും 44 പോയിന്‍റാണെങ്കിലും ഗോൾ ശരാശരിയിലെ മികവാണ്​ സിറ്റിക്ക്​ തുണയാകുന്നത്​.

മറ്റൊരു നിർണായക മത്സരത്തിൽ കരുത്തരായ ഗണ്ണേഴ്​സ്​ നീണ്ട ഇടവേളക്കു ശേഷം അനാവശ്യ തോൽവി ഏറ്റുവാങ്ങി. വുൾവ്​സിനെതിരെയാണ്​ ആദ്യം ലീഡ്​ പിടിച്ചശേഷം രണ്ടു ഗോളും അത്രയും ചുവപ്പുകാർഡുകളും വാങ്ങി തോൽവിയുമായി ആഴ്സണൽ മടങ്ങിയത്​. വുൾവ്​സിന്​ ഒമ്പതു കളികൾക്കിടെ ആദ്യ ജയമായിരുന്നു​.

രണ്ടു തവണ ക്രോസ്​ബാറിൽ തൊട്ടുമടങ്ങുകയും ഒരു ഗോൾ റഫറി നിഷേധിക്കുകയും ​ചെയ്​ത ശേഷം നികൊളാസ്​ പെപെ ആഴ്​സണലിനായി ആദ്യം വല കുലുക്കി. പക്ഷേ, ഡേവിഡ്​ ലൂയിസ്​ വീണ്ടും ചുവപ്പുകാർഡ്​ കണ്ട്​ മടങ്ങിയതോടെ തളർന്ന ഗണ്ണേഴ്​സ്​ വലയിൽ തുടരെ രണ്ടുവട്ടം വലകുലുക്കി ഗണ്ണേഴ്​സ്​ വിജയംആഘോഷമാക്കി. നെവസ്​ (45ാംമിനിറ്റ്​), മൊട്ടീഞ്ഞോ (49) എന്നിവരാണ്​ സ്​കോറർമാർ. ലൂയിസിനു പുറമെ ​െലനോയും ഗണ്ണേഴ്​സ്​ നിരയിൽ ചുവപ്പുവാങ്ങി.