ട്വിസ്​റ്റുണ്ടായില്ല; ആഴ്​സനലിനെ തകർത്ത്​ ലിവർപൂൾ

ലണ്ടൻ: മില്ല്യൺ കണക്കിന്​ പണം പൊട്ടിച്ചിട്ടും ആഴ്​സനലിന്​ കാര്യമുണ്ടായില്ല. പുതിയ സീസണിലെ സൂപ്പർ പോരാട്ടത്തിൽ ചാമ്പ്യന്മാരെ തോൽപിച്ച്​ കുതിക്കാമെന്ന ഗണ്ണേഴ്​സിൻെറ മോഹത്തിന്​ അവസാനം.

കഴിഞ്ഞ സീസണിലെ അതേ വീര്യം നിലനിർത്തി യുറുഗൻ ക്ലോപ്പിൻെറ ചുണക്കുട്ടികൾ വിയർത്തു കളിച്ചപ്പോൾ ഗണ്ണേഴ്​സിൻെറ കോട്ടകൊത്തളങ്ങൾ 3-1ന്​ തകർന്നു. ഒരു ഗോളിനു പിന്നിട്ടു നിന്നതിനു ശേഷമാണ്​ ലിവർപൂൾ തിരിച്ചുവന്നത്​.

അലക്​സാണ്ടർ ലാകസറ്റെയുടെ(25) ഗോളിൽ മുന്നിലെത്തിയാണ്​ ആഴ്​സനൽ തുടങ്ങിയത്​. എന്നാൽ, ലിവർപൂൾ ഉൾവലിഞ്ഞില്ല. ആദ്യ പകുതി തന്നെ രണ്ടു ഗോളും അവസാനത്തിൽ ഒരു ഗോളും തിരിച്ചടിച്ച്​ ലിവർപൂൾ മേധാവിത്തം അറിയിച്ചു. സാദിയോ മാ​നെ(28), ആഡ്ര്യൂ റോബേർട്​സൺ(34), ഡീഗോ ജോട്ട(88) എന്നിവരാണ്​ ഗോൾ നേടിയത്​. വോൾവർഹാംപ്​റ്റണിൽ നിന്ന്​ എത്തിയ ജോട്ടക്ക്​ അരങ്ങേറ്റത്തിൽ തന്നെ ഗോൾ നേടാനായി.

ആദ്യ രണ്ടു മത്സരങ്ങളിൽ ലീഡ്​സിനെയും ചെൽസിയേയും തോൽപിച്ചു തുടങ്ങിയ ലിവർപൂളിന്​ ഇതോടെ നൂറു ശതമാനം വിജയമായി.