ചുവന്ന വസന്തം വരണ്ട വേനലായി; ലിവർപൂളിന്​ നാണക്കേടിന്‍റെ റെക്കോർഡുകൾ

ലണ്ടൻ: വസന്തത്തിനിപ്പുറം ഒരു വരണ്ട വേനലുണ്ടെന്ന്​ പറയുന്നത്​ ഇതിനാകുമോ?. ഇംഗ്ലീഷ്​ പ്രീമിയർ ലീഗിൽ കഴിഞ്ഞ സീസണിൽ പടർന്നുകയറി ഇംഗ്ലണ്ടിലാകെ ചുവന്ന വസന്തം വിരിയിച്ച ലിവർപൂളിന്​ ഇക്കുറി കഷ്​ടകാലം തീരുന്നില്ല. മേഴ്​സിസൈഡ്​ ഡെർബിയിൽ അയൽക്കാരായ എവർട്ടണിനോടേറ്റ​ 2-0ത്തിന്‍റെ തോൽവിയോടെ നാണക്കേടിന്‍റെ ഒരുപിടി റെക്കോർഡുകളും ലിവർപൂളിന്‍റെ പേരിലായി.

പതിവുപോലെ പന്തടക്കത്തിലും പാസിങ്ങിലുമെല്ലാം മുന്നിട്ടുനിന്നാണ്​ ലിവർപൂൾ എവർട്ടണോടും കീഴടങ്ങിയത്​. മൂന്നാംമിനുറ്റിൽ റിച്ചാർലിസന്‍റെ ഗോളിൽ മുന്നിൽക്കയറിയ എവർട്ടണ്​ തുണയായി 83ാം മിനുറ്റിൽ ഗിൽഫി സിഗുറോസന്‍റെ പെനൽറ്റിഗോളുമെത്തി. പെനൽറ്റി സാധ്യത 50-50 ആയ അവസരത്തിൽ റഫറി എവർട്ടണൊപ്പം നിന്നതോടെ എവർട്ടൺ കാലങ്ങളായി കാത്തിരുന്ന വിജയമെത്തുകയായിരുന്നു.

1999ന്​ ശേഷം ആദ്യമായാണ്​ ആൻഫീൽഡിൽ എവർട്ടൺ വിജയമണിയുന്നത്​. എവർട്ടണോട്​ തോൽക്കാത്ത 22 മത്സരങ്ങളുടെ റെക്കോർഡും ലിവർപൂളിന്​ നഷ്​ടമായി. ആൻഫീൽഡിൽ തുടർച്ചയായി നാലുമത്സരങ്ങളിൽ ലിവർപൂൾ തോൽവിയറിയുന്നത്​ 1923ന്​ ശേഷം ആദ്യമായാണെന്ന്​ അറിയു​േമ്പാഴാണ്​ ലിവർപൂൾ പതനത്തിന്‍റെ ആഴമറിയുക.

ചാമ്പ്യൻസ്​ ലീഗിൽ ലൈപ്​സിഷിനെതിരെ വിജയിച്ച ശേഷമാണ്​ പ്രീമിയർലീഗിലെത്തു​േമ്പാൾ ലിവർപൂളിന്​ വീണ്ടും ചുവട്​ പിഴക്കുന്നത്​. 2003ന്​ ശേഷം മാഞ്ചസ്റ്റർ സിറ്റി ആദ്യമായി ആൻഫീൽഡിൽ വിജയിച്ചിട്ട്​ ദിവസങ്ങളാകുന്നതേയുള്ളൂ. എന്തായാലും കോച്ച്​ യുർഗൻ​ ​േക്ലാപ്പ്​ എതിരാളികളോട്​ ആത്മവിശ്വാസത്തോടെയും അഹങ്കാരത്തോടെയും പറയുന്ന 'വെൽക്കം ടു ആൻഫീൽഡ്​' ഇനി പറയാനിടയില്ല. 25 മത്സരങ്ങൾ പൂർത്തിയാക്കിയ ലിവർപൂൾ 40 പോയന്‍റുമായി ആറാമതാണിപ്പോൾ.