'ഫുട്​ബാളിൽ ചെയ്യാൻ പാടില്ലാത്തതെല്ലാം ലിവർപൂൾ ചെയ്​തു'

ലണ്ടൻ: ലിവർപൂളിന്​ ദുസ്വപ്​നം പോലെയൊരു രാവായിരുന്നു ഇന്നലത്തേത്​. വിജയങ്ങളുടെ കൊടുമുടിയിൽ നിന്നും അപമാനത്തി​െൻറ പാതാളത്തിലേക്കുള്ള വീഴ്​ച. രണ്ടിനെതിരെ ഏഴുഗോളുകൾക്കാണ്​ ആസ്​റ്റൺ വില്ല നിലവിലെ ചാമ്പ്യൻമാരായ ലിവർപൂളിനെ തകർത്തുവിട്ടത്​. 1963ൽ ടോട്ടൻഹാം ഹോട്​സ്​പറിനെതി​രെ ഏഴുഗോളുകൾ വഴങ്ങിയ ശേഷം ഇതാദ്യമായാണ്​ ഇത്രയുമൊരു വമ്പൻ തോൽവി ലിവർപൂളിന്​ സംഭവിക്കുന്നത്​.

ടീമി​െൻറ വിജയങ്ങളിലും പരാജയങ്ങളിലും ടീമംഗങ്ങളുടെ കൂടെ നിൽക്കുന്ന കോച്ച്​ യുറുഗൻ​​​ േക്ലാപ്പും ഇക്കുറി പരസ്യമായിത്തന്നെ വിമർശിച്ചു

''ഫുട്​​ബാളിൽ ​എന്തെല്ലാമാണോ ചെയ്യാൻ പാടില്ലാത്തത്​, അതെല്ലാം ലിവർപൂൾ ചെയ്​തു. എല്ലാ ക്രെഡിറ്റും ആസ്​റ്റൺ വില്ലക്കാണ്​. അവർ ഞങ്ങളെ അതെല്ലാം ചെയ്യാൻ നിർബന്ധിതരാക്കി.

ഞങ്ങൾ കളിച്ചതെല്ലാം അവരുടെ കൈകളിലേക്കാണ്​. അതോടെ മത്സരത്തി​െൻറ ദിശമാറി. ആദ്യം ഗോളടിക്കുന്നവർക്ക്​ മത്സരത്തെ സ്വാധീനിക്കാനാകും. പക്ഷേ അത്​ അനുവദിക്കരുത്​. ഞങ്ങൾ കഴിഞ്ഞ കാലങ്ങളിലും ആദ്യം ഗോളുകൾ വഴങ്ങിയിട്ടുണ്ട്​. പക്ഷേ ഇക്കുറി പ്രത്യാക്രമണം നന്നായില്ല. അതോടെ മത്സരം കൈവിട്ടു.

കുറച്ച്​ നല്ല നിമിഷങ്ങൾ ഞങ്ങൾക്കുണ്ടായിരുന്നു. പക്ഷേ മുഹമ്മദ്​ സലാഹി​െൻറ രണ്ടുഗോളുകൾ എന്നതിനപ്പുറത്തേക്ക്​ അത്​ ഒന്നുമായില്ല.

ഇന്നത്തേത്​ അശ്രദ്ധമാത്രമായിരുന്നില്ല. തികച്ചും മോശമായിരുന്നു. അടുത്ത രണ്ടുദിവസങ്ങളിലായുള്ള ​പരിശീലന സെഷനുകളൽ പ്രശ്​നങ്ങൾ ചർച്ചചെയ്യും. താരങ്ങൾ അന്താരാഷ്​ട്ര മത്സരങ്ങൾക്കായി മടങ്ങുകയാണ്​. എല്ലാവരും ആരോഗ്യവാൻമാരായി മടങ്ങിവരുമെന്നാണ്​ പ്രതീക്ഷിക്കുന്നത്''- ​​േക്ലാപ്പ്​ മത്സര ശേഷം മാധ്യമങ്ങളോട്​ പ്രതികരിച്ചു.

ഒല്ലി വാറ്റ്കിന്‍സി​െൻറ ഹാട്രിക്കും ജാക്ക് ഗ്രീലിഷി​െൻറ ഇരട്ടഗോളുമാണ് ലിവര്‍പൂളി​െൻറ കഥ കഴിച്ചത്. ജോൺ മക്ഗിന്‍, റോസ് ബാർക്​ലി എന്നിവരും ആസ്​റ്റൺ വില്ലക്കായി സ്​കോർ ചെയ്​തതോടെ ലിവർപൂളി​െൻറ കരളുതകർന്നു. ലീഗില്‍ ആസ്റ്റണ്‍ വില്ലയുടെ തുടര്‍ച്ചയായ മൂന്നാം ജയമാണിത്. ഇതുവരെ ഒരു മത്സരവും അവർ പരാജയപ്പെട്ടിട്ടില്ല.

തോളിന് പരിക്കേറ്റ സ്ഥിരം ഗോള്‍ കീപ്പര്‍ അലിസണ്‍ ബെക്കറില്ലാതെയാണ് ലിവര്‍പൂള്‍ ഇറങ്ങിയത്. അതിന്​ ടീം വലിയ വില​ കൊടുക്കേണ്ടി വന്നു. പകരമിറങ്ങിയ അഡ്രിയാ​െൻറ പിഴവിലാണ് ഗോള്‍വേട്ടയ്ക്ക് തുടക്കമായത്.