പ്രതിരോധം കാക്കാൻ ബോസ്​നിയൻ കരുത്തനെ ടീമിലെത്തിച്ച്​ ബ്ലാസ്​റ്റേഴ്​സ്​

കഴിഞ്ഞ സീസണിൽ ചെന്നൈയിൻ എഫ്​.സിക്ക്​ വേണ്ടി ഉജ്ജ്വല ​പ്രകടനം നടത്തിയ പ്രതിരോധ താരമായ എനെസ് ​ സിപോവിച്ചിനെ റാഞ്ചി കേരളാ ബ്ലാസ്​റ്റേഴ്​സ്​. ബോസ്നിയ ഹെര്‍സഗോവിനയുടെ സെന്‍ട്രല്‍ ഡിഫന്‍ഡറായ ഇൗ 30കാരൻ ഇക്കുറി ചെന്നൈയിനിൽ തുടരില്ലെന്ന്​ ഏതാണ്ട്​ ഉറപ്പുണ്ടായിരുന്നു. എന്നാൽ, ബ്ലാസ്​റ്റേഴ്​സ്​ താരത്തെ നോട്ടമിട്ടിരുന്നതായി ആരും പ്രതീക്ഷിച്ചിരുന്നില്ല.

കേരള ബ്ലാസ്റ്റേഴ്സിനായി കളിക്കുന്ന ആദ്യ ബോസ്നിയന്‍ താരമാവും സിപോവിച്ച്. അതിശയകരമായ ആരാധക കൂട്ടായ്മയുള്ള, ഇന്ത്യയിലെ ഏറ്റവും വലിയ ക്ലബുകളിലൊന്നില്‍ ചേരുന്നതില്‍ ഏറെ സന്തോഷമുണ്ടെന്ന് സിപോവിച്ച് പ്രതികരിച്ചു. ബ്ലാസ്റ്റേഴ്‌സി​െൻറ ഇത്തവണത്തെ രണ്ടാമത്തെ വിദേശ സൈനിങ്ങാണ്​ സിപോവിച്ചി​െൻറത്​. നേരത്തെ ഉറുഗ്വെ താരമായ അഡ്രിയാന്‍ ലൂണയെ മഞ്ഞപ്പട ടീമിലെത്തിച്ചിരുന്നു. മെല്‍ബണ്‍ സിറ്റിയില്‍ നിന്നാണ് 29കാരനായ ലൂണ ബ്ലാസ്റ്റേഴ്‌സിലേക്ക് എത്തിയത്.

ബോസ്​നിയ കൂടാതെ റൊമാനിയ, ബെൽജിയം, മൊറോക്കോ തുടങ്ങിയ രാജ്യങ്ങളിൽ കളിച്ച പരിചയസമ്പത്തുമായാണ്​ സിപോവിച്ച്​ കഴിഞ്ഞ സീസണിൽ ഇന്ത്യൻ സൂപ്പർ ലീഗിലേക്കെത്തിയത്​. റൊമാനിയന്‍ ക്ലബ്ബായ എസ്സി ഒടെലുല്‍ ഗലാറ്റിക്കൊപ്പം അരങ്ങേറ്റ സീസണില്‍ തന്നെ 2010-11 റൊമാനിയന്‍ ടോപ്പ് ഡിവിഷന്‍ ചാമ്പ്യന്‍ഷിപ്പ് കിരീടം നേടി. ഒടെലുല്‍ ഗലാറ്റിയിലെ വിജയകരമായ ആറ് സീസണുകള്‍ക്ക് ശേഷം, കെ.വി.സി വെസ്റ്റര്‍ലോ (ബെല്‍ജിയം), ഇത്തിഹാദ് ടാംഗര്‍ & ആര്‍എസ് ബെര്‍ക്കെയ്ന്‍ (മൊറോക്കോ), ഒഹോദ് ക്ലബ് (സൗദി അറേബ്യ) എന്നീ ക്ലബ്ബുകള്‍ക്കായി ബൂട്ടു കെട്ടി. പിന്നീട് ബാല്യകാല ക്ലബ്ബായ എഫ് കെ സെല്‍ജെസ്നികറിലേക്ക് തന്നെ മടങ്ങുകയും ചെയ്​തിരുന്നു.

കഴിഞ്ഞ സീസണില്‍ ചെന്നൈയിന്‍ എഫ് സിയില്‍ ചേരുന്നതിന് മുമ്പ്, ഖത്തറിലെ ഉമ്മു സലാലിന് വേണ്ടി കളിച്ചിരുന്നു. കഴിഞ്ഞ ഐ.എസ്.എല്‍ സീസണില്‍, 18 മത്സരങ്ങളിലായി ചെന്നൈയിന്‍ ജഴ്സിയണിഞ്ഞ താരം ടീമിലെ സ്ഥിരസാനിധ്യവുമായിരുന്നു. ബോസ്നിയ ഹെര്‍സഗോവിനയുടെ അണ്ടര്‍ 21 ദേശീയ ടീം താരമായിരുന്നു.