ഇന്ത്യൻ ഫുട്ബോൾ താരം കമലാദേവി വിരമിച്ചു

ഇന്ത്യൻ ഫുട്ബോൾതാരം യുംനം കമലാ ദേവി വിരമിച്ചു. 36 രാജ്യാന്തര മത്സരങ്ങളിൽ നിന്ന് 33 ഗോളുകൾ നേടിയിട്ടുള്ള താരമാണ് കമലാ ദേവി. ദേശീയ വനിത ഫുട്ബോൾ ടീമിൽ മിഡ്ഫീൽഡറായിരുന്നു 29കാരിയായ യുനംകമലാ ദേവി. ബുധനാഴ്ചയാണ് ഇവർ വിരമിക്കൽ തീരുമാനം പ്രഖ്യാപിച്ചത്. ഏറെ പ്രയാസപ്പെട്ടാണ് വിരമിക്കുന്ന തീരുമാനം എടുത്തതെന്ന് കമലാ ദേവി പറഞ്ഞു.

2010ലാണ് കമലാ ദേവി ഇന്ത്യൻ ടീമിൽ അരങ്ങേറിയത്. 2012 സാഫ് ചാമ്പ്യൻഷിപ്പിലെ ഏറ്റവും മികച്ച താരമായിരുന്നു കമലാദേവി. അറ്റാക്കിംഗ് മിഡ്‌ഫീൽഡറായ ഇവർ 2010, 12, 14 വർഷങ്ങളിൽ സാഫ് ചാമ്പ്യൻഷിപ്പ് വിജയിച്ച ടീമിൽ ഉൾപ്പെട്ടിരുന്നു.

2016 സൗത്ത് ഏഷ്യൻ ഗെയിംസിൽ ടോപ് സ്കോറർ ആയിരുന്നു. അക്കൊല്ലം തന്നെ നടന്ന പ്രഥമ ഇന്ത്യൻ വനിതാ ലീഗിൽ ഈസ്റ്റേൺ സ്പോർട്ടിംഗ് യൂണിയനുമായി കരാറൊപ്പിട്ട താരം 10 മത്സരങ്ങളിൽ നിന്ന് 15 ഗോളുകൾ നേടി ടോപ്പ് സ്കോററായി.