'കളത്തിന്​ പുറത്തെ പ്രവർത്തിയുടെ ഉത്തരവാദിത്വം കളിക്കാർക്ക്​'- ക്രിസ്റ്റ്യാനോയുടെ വിവാദ നടപടിയിൽ പ്രതികരണവുമായി പിർലോ

ടൂറിൻ: കാമുകി ജോർജിന റോഡ്രിഗസിന്‍റെ പിറന്നാൾ ആഘോഷങ്ങൾക്കായി ടൂറിൻ നഗരം വിട്ട്​ അനുമതിയില്ലാതെ വിനോദസഞ്ചാര കേ​ന്ദ്രത്തിലെത്തിയ യുവന്‍റസിന്‍റെ പോർചുഗീസ്​ സൂപ്പർ താരം ക്രിസ്റ്റ്യാനോ റൊണാൾഡോയുടെ നടപടി വിവാദമായിരുന്നു. എന്നാൽ ഇക്കാര്യത്തിൽ പ്രതികരണവുമായി രംഗത്തെത്തിയിരിക്കുകയാണ്​​ യുവന്‍റസ്​ പരിശീലകനായ ആന്ദ്രേ പിർലോ.

'റൊണാൾഡോക്ക്​ ഒരു അവധി ദിവസം ലഭിച്ചു, തന്‍റെ സ്വകാര്യ ജീവിതത്തിൽ അദ്ദേഹത്തിന്​ എന്ത്​ വേണമെങ്കിലു​ം ചെയ്യാമല്ലോ' -പിർലോ പറഞ്ഞതായി ഇറ്റാലിയൻ മാധ്യമങ്ങൾ റി​പ്പോർട്ട്​ ചെയ്​തു. 'കളിക്കളത്തിന്​ പുറത്ത്​ അവർ സ്വതന്ത്ര പൗരൻമാരാണ്​. തങ്ങളുടെ പ്രവർത്തിയുടെ ഉത്തരവാദിത്വം ഓരോരുത്തർക്കുമാണ്' -പിർലോ പറഞ്ഞു​.

ഒരു പ്രവിശ്യയില്‍ നിന്ന് മറ്റൊരു പ്രവിശ്യയിലേക്ക് അനുമതിയില്ലാതെ യാത്ര ചെയ്യാന്‍ പാടില്ലെന്നിരിക്കെ കാമുകിയുടെ പിറന്നാള്‍ ആഘോഷത്തിനായി കോവിഡ്​ ചട്ടം ലംഘിച്ച്​ താരം കുടുംബസമേതം പീഡ്‌മോന്‍റില്‍ നിന്ന് വലെ ഡി ഓസ്റ്റയിലെ വിനോദസഞ്ചാര കേ​​ന്ദ്രത്തിലെത്തിയെന്നായിരുന്നു റിപ്പോർട്ടുകൾ.

ഇവിടെ നിന്ന്​ പിറന്നാൾ ആഘോഷ ചടങ്ങുകൾക്കിടെ പകർത്തിയ ചിത്രങ്ങൾ താരം സമൂഹ മാധ്യമങ്ങളിൽ പങ്കുവെക്കുകയും ചെയ്​തിരുന്നു. സംഭവം വിവാദമായതോടെ താരം പോസ്റ്റ്​ പിൻവലിച്ചെങ്കിലും ജോർജിനോയുടെ ഇൻസ്റ്റഗ്രാം അക്കൗണ്ടിൽ ചിത്രം ഇപ്പോഴുമുണ്ട്​.

ക്രിസ്റ്റ്യാനോ താമസിച്ചതുമായി ബന്ധപ്പെട്ട രേഖകൾ റിസോർട്ടിൽ നിന്നും പൊലീസ്​ ശേഖരിച്ച്​ വരികയാണ്​. കുറ്റക്കാരാണെന്ന്​ തെളിഞ്ഞാൽ ക്രിസ്റ്റ്യാനോയും കാമുകിയും 400 യൂറോ പിഴയായി ഒടുക്കേണ്ടി വരും. സാമൂഹിക സേവനമടക്കമുള്ള മറ്റ്​ നടപടികളും നേരിടേണ്ടി വരും.

കഴിഞ്ഞ ഒക്​ടോബറിൽ യുവന്‍റസ്​ ടീമിലെ രണ്ട്​ താരങ്ങൾ കോവിഡ്​ ബാധിതരായ സാഹചര്യത്തിൽ​ ടീം മൊത്തം നിരീക്ഷണത്തിൽ കഴിയവേ അനുമതിയില്ലാതെ സ്വന്തം നാടായ പോർചുഗലിലേക്ക്​ പോയ ക്രിസ്​റ്റ്യാനോ മുമ്പും വിവാദം സൃഷ്​ടിച്ചിരുന്നു.