ജൂനിയര്‍ ഫുട്‌ബാൾ: മലപ്പുറം-എറണാകുളം ഫൈനല്‍ ബുധനാഴ്ച

കൊച്ചി: സംസ്ഥാന ജൂനിയര്‍ ഫുട്‌ബാള്‍ ചാമ്പ്യന്‍ഷിപ്പിന്റെ കലാശക്കളി ബുധനാഴ്ച. വൈകീട്ട് നാലിന് മഹാരാജാസ് കോളജ് ഗ്രൗണ്ടില്‍ നടക്കുന്ന കിരീടപോരാട്ടത്തില്‍ എറണാകുളത്തെ മലപ്പുറം നേരിടും.

ആദ്യസെമിയില്‍ കാസർകോടിനെ സഡന്‍ഡെത്തില്‍ (7-6) തോല്‍പിച്ചാണ് മലപ്പുറം തുടര്‍ച്ചയായ രണ്ടാം തവണയും കലാശക്കളിക്ക് യോഗ്യത നേടിയത്. ഒമ്പതാം മിനിറ്റില്‍ റിഹാന്‍ അബ്ദുല്‍ അസീസ് നേടിയ ഗോളില്‍ മുന്നിലെത്തിയ കാസർകോടിനെ 60ാം മിനിറ്റില്‍ അജ്‌സല്‍ റബീഹിന്റെ ഗോളില്‍ മലപ്പുറം ഒപ്പംപിടിച്ചു.

നിശ്ചിത സമയത്തും (1-1), ടൈബ്രേക്കറിലും (3-3) ഇരുടീമും തുല്യത പാലിച്ചു. രണ്ടാം സെമിയില്‍ അവസാന മിനിറ്റ് ഗോളിലാണ് എറണാകുളം തൃശൂരിനെ അട്ടിമറിച്ചത്. ജോഷ്വ വിജയഗോള്‍ നേടി.