പൊറുക്കാനാവാത്ത പിഴവുകളുമായി പിൻനിര; ബ്ലാസ്​റ്റേഴ്​സിന്​ നാലുഗോളിന്‍റെ നാണംകെട്ട തോൽവി

മഡ്​ഗാവ്​: പ്രതീക്ഷകൾ വീണുടഞ്ഞ കളിയരങ്ങിൽ തിരിച്ചടികളുടെ തുടർക്കഥകൾക്ക്​ അറുതിവരുത്താനുള്ള അവസാനശ്രമങ്ങളിലും കാലിടറി കേരള ബ്ലാസ്​റ്റേഴ്​സ്​. ഇന്ത്യൻ സൂപ്പർ ലീഗിലെ 18ാം റൗണ്ട്​ മത്സരത്തിൽ ഹൈദരാബാദ്​ എഫ്​.സിക്കെതിരെ ബൂട്ടുകെട്ടിയിറങ്ങിയ മലയാളത്തിന്‍റെ കൊമ്പന്മാർ മറുപടിയില്ലാത്ത നാലുഗോളുകൾക്ക്​ മൂക്കുകുത്തിവീണു. കളിമറന്ന ബ്ലാസ്​റ്റേഴ്​സ്​ അ​േമ്പ നിരാശപ്പെടുത്തിയ മത്സരത്തിൽ രണ്ടാം പകുതിയിലായിരുന്നു ഹൈദരാബാദിന്‍റെ മുഴുവൻ ഗോളുകളും. ​പ്രതിരോധനിരയുടെ പാളിച്ചകളിൽനിന്നാണ്​ നാലു തവണയും ഹൈദരാബാദുകാർ വല കുലുക്കിയതെന്നത്​ ബ്ലാസ്​റ്റേഴ്​സിനെ നാണം കെടുത്തുന്നതായി.

പ്രതിരോധനിരയുടെ ക്ലിയറൻസിൽ പിഴച്ച്​ ആദ്യ രണ്ടവസരങ്ങൾ ബ്ലാസ്​റ്റേഴ്​സ് തളികയിലെന്നവണ്ണം വെച്ചുനീട്ടിയപ്പോൾ ​ഫ്രാൻ സൻഡാസയാണ്​ ഇരുവട്ടവും വല കുലുക്കിയത്​. 58ാം മിനിറ്റിൽ കോനെ നെഞ്ചിലെടുത്ത്​ നിയന്ത്രിക്കാൻ ശ്രമിച്ച പന്ത്​ തട്ടിത്തെറിച്ചപ്പോൾ വീണുകിടന്ന്​ ചിയാനീസ്​ തട്ടിനീക്കിയത്​ സൻഡാസക്ക്​. ഗോളിക്ക്​ പിടികൊടുക്കാതെ പന്ത്​ ഉടനടി വലയിൽ. നാലു മിനിറ്റിനുശേഷം കോനെയുടെ കണക്കുകൂട്ടൽ പിഴച്ച ബാക്ക്​പാസ് ചിയാനീസ്​ തട്ടിയെടുത്തു. ഹൈദരാബാദ്​ താരത്തെ വീഴ്​ത്തി ആൽബിനോ ഗോമസ്​ പ്രതിരോധിക്കാൻ ശ്രമിച്ചപ്പോൾ റഫറി വിരൽ ചൂണ്ടിയത്​ പെനാൽറ്റി സ്​പോട്ടി​േലക്ക്​. അനായാസം സൻഡാസയുടെ രണ്ടാംഗോൾ.

86ാം മിനിറ്റിൽ ഫ്രീകിക്കിൽ അരിഡേൻ സൻഡാന ഹെഡറിലൂടെ ഗോൾ നേട്ടം മൂന്നാക്കി. ഇഞ്ചുറിടൈമിൽ ജേ​ാവോ വിക്​ടറിന്‍റെ ഗോളും ഫ്രീകിക്കിൽനിന്നുവന്ന നീക്കത്തിൽനിന്നായിരുന്നു. രണ്ടുതവണയും ബ്ലാസ്​റ്റേഴ്​സ്​ പ്രതിരോധം മാർക്കിങ്ങിൽ വരുത്തിയ അലംഭാവമാണ്​ ഹൈദരാബാദുകാർക്ക്​ മിന്നും ജയത്തിലേക്ക്​ വീണ്ടും ഗോളുകളൊരുക്കിയത്​.

ജയത്തോടെ 18 കളിയിൽ 27പോയന്‍റുമായി മൂന്നാം സ്​ഥാനത്തേക്ക്​ കയറിയ ഹൈദരാബാദ്​ സെമി പ്രതീക്ഷകൾ സജീവമാക്കി. 18 കളിയിൽ 16 പോയന്‍റ്​ മാത്രമുള്ള ബ്ലാസ്​റ്റേഴ്​സ്​ പത്താം സ്​ഥാനത്തുതന്നെ തുടരുന്നു.