ലോകകപ്പ്​ ടിക്കറ്റിന്​ വൻ ഡിമാൻഡ്: ബുക്കിങ്​ 2.35 കോടി!

ദോഹ: ലോകകപ്പ്​ ഫുട്​ബാളിന്‍റെ രണ്ടാം ഘട്ട ടിക്കറ്റ്​ ബുക്കിങ്ങിന്​ ലോകമെങ്ങുമുള്ള ആരാധകരിൽ നിന്നും ആവേശകരമായ പ്രതികരണം. ഏപ്രിൽ 28 അവസാനിച്ച രണ്ടാം ഘട്ടത്തിൽ ടിക്കറ്റിനായി 2.35 കോടി ബുക്കിങ്​ നടന്നതായി ഫിഫ അറിയിച്ചു.

ആതിഥേയരായ ഖത്തറിൽ നിന്നും, ലോകഫുട്​ബാളിലെ പ്രധാന രാജ്യങ്ങളിൽ നിന്നുമാണ്​ ഇത്തവണ ടിക്കറ്റിന്​ ഏറെ പേരും അപേക്ഷിച്ചത്​. ഏപ്രിൽ അഞ്ചിന്​ ആരംഭിച്ച്​ 28ന്​ അവസാനിച്ച രണ്ടാം ഘട്ട ബുക്കിങ്ങിൽ നിന്നും റാൻഡം നറുക്കെടുപ്പിലൂടെയാണ്​ ടിക്കറ്റിന്​ അർഹരെ തെരഞ്ഞെടുക്കുക. മേയ്​ 31ന്​ ശേഷം റാൻഡം നറുക്കെടുപ്പ്​ ഫലം അറിയിക്കുന്നതിന്‍റെ അടിസ്ഥാനത്തിൽ പണമടച്ച്​ ടിക്കറ്റ്​ സ്വന്തമാക്കാം.

അർജന്‍റീന, ബ്രസീൽ, ഇംഗ്ലണ്ട്​, ഫ്രാൻസ്​, മെക്സികോ, ഖത്തർ, സൗദി അറേബ്യ, അമേരിക്ക രാജ്യങ്ങളിൽ നിന്നാണ്​ ഏറ്റവും കൂടുതൽ ബുക്കിങ്ങുള്ളത്​. ഖത്തറിൽ നിന്നും സ്വദേശികളും വിദേശികളും ഉൾപ്പെടെയുള്ള ഫുട്​ബാൾ ആരാധകർ വ്യാപകമായി ടിക്കറ്റിന്​ അപേക്ഷിച്ചിട്ടുണ്ട്​.

ഡിസംബർ 18ന്​ നടക്കുന്ന ലോകകപ്പിന്‍റെ ഫൈനലിനാണ്​ ഏറ്റവും കൂടുതൽ അപേക്ഷകരുള്ളത്​. അർജന്‍റീന - മെക്സികോ, അർജന്‍റീന -സൗദി അറേബ്യ, ഇംഗ്ലണ്ട്​ - അമേരിക്ക, പോളണ്ട്​ -അർജന്‍റീന മത്സരങ്ങൾക്കാണ്​ ഗ്രൂപ്പ്​ റൗണ്ടിൽ ഏറെ ആവശ്യക്കാരുള്ളത്​. അർജന്‍റീനയിൽ നിന്നും, ലോകത്തിന്‍റെ വിവിധ ഭാഗങ്ങളിൽ നിന്നുമായി ഏറെ ആരാധകർ താൽപര്യം പ്രകടിപ്പിക്കുന്നതും ലയണൽ മെസ്സിയുടെ അർജന്‍റീനയുടെ പോരാട്ടങ്ങൾക്ക്​ സാക്ഷ്യം വഹിക്കാനാണ്​.

ആദ്യ ഘട്ട വിൽപനയിൽ ഇന്ത്യയിൽ നിന്നുള്ള ഫുട്​ബാൾ ആരാധകർ മുൻനിരയിൽ ഇടം പിടിച്ചുവെങ്കിലും, രണ്ടാം ഘട്ടത്തിൽ ആദ്യ ഏഴ്​ രാജ്യങ്ങളുടെ പട്ടികയിൽ ഇന്ത്യയില്ല. എന്നാൽ, ഖത്തറിൽ നിന്നുള്ള ഇന്ത്യൻ പൗരന്മാർ കൂടുതലായി ടിക്കറ്റിന്​ ആവശ്യക്കരായുണ്ട്​.

ജനുവരി-ഫെബ്രുവരിയിൽ നടന്ന ആദ്യ ഘട്ട ടിക്കറ്റ്​ വിൽപനയിൽ 1.7 കോടി ടിക്കറ്റുകൾക്കാണ്​ അപേക്ഷിച്ചത്​. നറുക്കെടുപ്പിനൊടുവിൽ 8.4 ലക്ഷം ടിക്കറ്റുകൾ വിറ്റു. തുടർന്ന്​, ലോകകപ്പ്​ ഗ്രൂപ്പ്​ റൗണ്ട്​ മത്സരങ്ങളുടെ നറുക്കെടുപ്പ്​ കഴിഞ്ഞതിനു പിന്നാലെയാണ്​ ഏപ്രിലിൽ രണ്ടാം ഘട്ട ബുക്കിങ്ങ്​ ആരംഭിച്ചത്​.