ഫിഫ അറബ്​ കപ്പ്​: മൂന്നാം ജയത്തോടെ ഖത്തർ; ഒമാൻ ക്വാർട്ടറിൽ

ദോഹ: അൽബെയ്​ത്​ സ്​റ്റേഡിയത്തിൽ നടന്ന ഫിഫ അറബ്​ കപ്പിലെ അവസാന ഗ്രൂപ്പ്​ മത്സരത്തിൽ റിസർവ്​ ബെഞ്ചിനെ ഇറക്കി ഇറാഖിനെ പിടിച്ചുകെട്ടാമെന്ന ഖത്തർ​ കോച്ച്​ ഫെലിക്​സ്​ സാഞ്ചസിൻെറ തന്ത്രങ്ങളൊന്നും ഏശിയില്ല. ഒടുവിൽ, നായകൻ ഹസൻ ഹൈദോസും, മുന്നേറ്റത്തിലെ പടക്കുതിരയായ അൽ മുഈസ്​ അലിയും,​ ​സൂപ്പർഹീറോ അക്രം അഫീഫിയും ഉൾപ്പെടെയുള്ള ഒന്നാം നമ്പർ നിരതന്നെ വേണ്ടിവന്നു ഖത്തറിന്​ ജയം ഒരുക്കാൻ. മൂവരും നേടിയ ഗോളിലൂടെ 3-0ത്തിന്‍റെ ജയവുമായി ഖത്തറിൻെറ ഉത്സവരാവ്​​.

കളിയുടെ 69ാം മിനിറ്റിലാണ്​ ടീമിനെ അടിമുടി അഴിച്ചുപണിത്​ കോച്ച്​ സാഞ്ചസ്​ സബ്​സ്​റ്റിറ്റ്യൂഷൻ നടത്തിയത്​. സീനിയേഴ്​സ്​ എത്തിയതോടെ കളിയുടെ മൂഡും മാറി. ഖത്തറിൻെർ മുന്നേറ്റത്തിന്​ വേഗവും മൂർച്ചയും കൂടിയ നിമിഷങ്ങൾ. അതിൻെറ ഫലവും വൈകാതെ പിറന്നു. 81ാം മിനിറ്റിൽ അൽ മുഈസ്​ അലിയും, 84ാം മിനിറ്റിൽ അക്രം അഫീഫിയും കുറിച്ച ഗോളിലൂടെ ഖത്തറിന്​ ജയം. കളത്തിലിറങ്ങി ഒരു മിനിറ്റിനുള്ളിലായിരുന്നു അഫിഫി സ്​കോർ ചെയ്​ത്​ ജയം ഉറപ്പാക്കിയത്​. ഇഞ്ചുറി ടൈമിലെ മൂന്നാം മിനിറ്റിൽ ഹസൻ ഹൈദോസ്​ കൂടി സ്​കോർ ചെയ്​ത്​ പട്ടിക തികച്ചു.

ക്വാർട്ടർ പ്രവേശനത്തിന്​ ജയം അനിവാര്യമായ ഇറാഖിനാവ​ട്ടെ ഇരു പകുതികളിലുമായി ലഭിച്ച അവസരങ്ങൾ ക്രോസ്​ ബാറിന്​ പുറത്തേക്ക്​ അടിച്ചകറ്റുന്നതിലായിരുന്നു മിടുക്ക്​.

അതേസമയം, അൽ ജനൂബ്​ സ്​റ്റേഡിയത്തിൽ നടന്ന മത്സരത്തിൽ ഒമാൻ ബഹ്​റൈനെ 3-0ത്തിന്​ വീഴ്​ത്തി. ഇറാഖിന്‍റെ തോൽവി കൂടിയായതോടെ ഗ്രൂപ്പിൽ നിന്നും രണ്ടാം സ്​ഥാനക്കാരായി ഒമാൻ ഫിഫ അറബ്​ കപ്പ്​ ക്വാർട്ടറിൽ ഇടം ഉറപ്പിച്ചു.