ചരിത്ര തീരുമാനവുമായി ഫിഫ; വനിത കളിക്കാർക്ക്​ പ്രസവാവധി

സൂറിച്ച്​: വനിത ഫുട്​ബാളർമാരുടെ ക്ഷേമത്തിനായി ചരിത്രപരമായ തീരുമാനവുമായി ഫിഫ. വനിത കളിക്കാർക്ക്​ ചുരുങ്ങിയത്​ 14 ആഴ്​ച പ്രസവാവധി നൽകാനുള്ള തീരുമാനത്തിന്​ ഫിഫ കൗൺസിൽ അംഗീകാരം നൽകി. പ്രസവത്തിന്​ ശേഷം ചുരുങ്ങിയത്​ എട്ടാഴ്​ചയാകും അവധി.

അവധി കഴിഞ്ഞെത്തുന്ന കളിക്കാരെ വീണ്ടും മത്സരങ്ങൾക്ക്​ സജ്ജമാക്കാൻ ആവശ്യമായ പിന്തുണ ക്ലബ്​ നൽകണമെന്ന്​ നിർദേശം നൽകി.

'കളിക്കാരാണ് കളിയിലെ താരങ്ങൾ, അവരാണ്​ കളിയുടെ ഏറ്റവും പ്രധാനപ്പെട്ട ഭാഗം. അവർക്ക് തിളങ്ങാൻ ഞങ്ങൾ വേദിയൊരുക്കിയിട്ടുണ്ടെന്ന് ഉറപ്പാക്കേണ്ടതുണ്ട്. വനിതാ കളിക്കാരുടെ കാര്യം വരുമ്പോൾ അവരുടെ കരിയറിൽ കൂടുതൽ സ്ഥിരത കൊണ്ടുവരണം. ഉദാഹരണത്തിന്, അവർക്ക് പ്രസവാവധി എടുക്കേണ്ടതുണ്ടെങ്കിൽ, അവർ വിഷമിക്കേണ്ടതില്ല' -ഫിഫ പ്രസിഡൻറ്​ ജിയാനി ഇൻഫാൻറീനോ ട്വിറ്റർ വിഡിയോയിലൂടെ വ്യക്തമാക്കി.

ഒരു വനിതാ കളിക്കാരിക്ക്​ പോലും ഒരിക്കലും ഗർഭധാരണത്തിൻെറ പേരിൽ ഏതെങ്കിലും തരത്തിലുള്ള പോരായ്മകൾ അനുഭവിക്കരുതെന്ന്​ ഫിഫ കൂട്ടിച്ചേർത്തു.

ഇതോടൊപ്പം തന്നെ പരിശീലകരുടെ ജോലി സ്​ഥിരതക്ക്​ ഉപകാരപ്രദമാകുന്ന പുതിയ നിയമങ്ങളും ഫിഫ ആവിഷ്​കരിക്കുന്നുണ്ട്​. നിലവിൽ നടക്കുന്ന രീതിയിൽ ഏഴ്​ ടീമുകളെ വെച്ച്​ ഫിഫ ക്ലബ്​ ലോകകപ്പ്​ 2021ൽ ജപ്പാനിൽ വെച്ച്​ നടക്കുമെന്നും തീരുമാനിച്ചു. ​