ഒരു ഗോളിന്​ പിന്നിട്ടു നിന്ന്​ വമ്പൻ തിരിച്ചുവരവ്​; യുനൈറ്റഡ്​ ട്രാക്കിൽ

ലണ്ടൻ: 19ാം മിനിറ്റിൽ എവർട്ടൻ ഫോർവേഡ്​ ബെർനാഡ്​ മാഞ്ചസ്​റ്റർ യുനൈറ്റഡ്​ വലകുലുക്കിയപ്പോൾ, ചുകന്ന ചെകുത്താന്മാർക്ക്​ ഒരു മാറ്റവുമില്ലെന്ന്​ തറപ്പിച്ച്​ പറഞ്ഞവരുണ്ടായിരുന്നു.

എന്നാൽ, ഇനിയൊരു തോൽവികൂടിയുണ്ടായാൽ കോച്ച്​ സോൾഷെയറി​െൻറ തൊപ്പിതെറിക്കുമെന്ന്​ ഉറപ്പുണ്ടായിരുന്നതിനാൽ, മാഞ്ചസ്​റ്റർ താരങ്ങൾ തോൽക്കാൻ സന്നദ്ധമായിരുന്നില്ല. 15ാം സ്​ഥാനത്തു നിന്നും ഒരു ഉയർത്തെഴുന്നേൽപ്​ സ്വപ്​നം കണ്ട ചെമ്പട ഒന്നിച്ചുപൊരുതി. ഫലം ഇരുപകുതിയിലുമായി മൂന്ന്​ ഗോളുകൾ തിരിച്ചടിച്ച്​ മാഞ്ചസ്​റ്റർ യുനൈറ്റഡ്​ തിരിച്ചുവന്നു.

ആവേശം നിറഞ്ഞ വമ്പന്മാരുടെ പോരിൽ 3-1നാണ്​ മാഞ്ചസ്​റ്റർ യുനൈറ്റഡ്​ എവർട്ടനെ തോൽപിച്ചത്​.

ബെർനാഡി​െൻറ ആദ്യ മിനിറ്റിലെ ഗോളിന്​ ബ്രൂണോ ഫെർണാണ്ടസും (25, 32), പകരക്കാരനായി ഇറങ്ങിയ എഡിൻസൻ കവാനിയുമാണ്​ (95) ഗോൾ നേടിയത്​. കവാനിക്ക്​ മാഞ്ചസ്​റ്റർ യുനൈറ്റഡ്​ ജഴ്​സിയിൽ ആദ്യ ഗോളാണിത്​.

ഇതോടെ യുനൈറ്റഡ്​ ഒരു സ്​ഥാനം മെച്ചപ്പെടുത്തി 14ാം സ്​ഥാനത്തേക്ക്​ കയറി. നേരത്തെ, പോയൻറ്​ പട്ടികയിൽ ഒന്നാം സ്​ഥാനത്തുണ്ടായിരുന്ന എവർട്ടൻ തോൽവിയോടെ അഞ്ചാം സ്​ഥാനത്തേക്കിറങ്ങി. എവർട്ടന്​ തുടർച്ചയായ മൂന്നാം തോൽവിയാണിത്​.