വെംബ്ലിയിൽ ഇംഗ്ലീഷ്​ കണ്ണീർ; ഷൂട്ടൗട്ടിൽ യൂറോകിരീടം റോമിലേക്ക്​

ലണ്ടൻ: വെംബ്ലിയിൽ ശ്വാസമടക്കിപ്പിടിച്ച ഇംഗ്ലീഷ്​ കാണികളുടെ പ്രാർഥനയും ബെക്കിങ്​ഹാം പാലസിലെ എലിസബത്ത്​ രാജ്ഞിയുടെ ആശിർവാദവും പാഴായി. ഇംഗ്ലണ്ടുകാരുടെ കണ്ണീർവീണ്​ കുതിർന്ന മെതാനത്ത്​ വിജയാഹ്ലാദം ചവിട്ടി യൂറോകീരീടവുമായി അസൂറികൾ റോമിലേക്ക്​ പറക്കും. ഷൂട്ടൗട്ടിൽ ഇംഗ്ലണ്ടിന്‍റെ കൗമാര താരങ്ങളായ മാർകസ്​ റാഷ്​ഫോഡിന്‍റെയും ജേഡൻ സാഞ്ചോയുടേയും ബുകായി സാക്കയുടേയും കിക്കുകൾ പിഴച്ചതോടെയാണ്​ ഇറ്റലി യൂറോയിൽ രണ്ടാം മുത്തമിട്ടത്​. ഇറ്റലിയുടെ ബെലോട്ടിയുടേയും ജോർജീഞ്ഞോയുടേയും കിക്കുകൾ ഇംഗ്ലീഷ്​ ഗോൾകീപ്പർ ജോർദൻ പിക്​ഫോർഡ്​ തടുത്തിട്ടു.

രണ്ടാം മിനിറ്റിൽ ലൂക്​ ഷായുടെ വെടിക്കെട്ട്​ ഗോളിലൂടെ മുന്നിലെത്തിയ ഇംഗ്ലണ്ടിനെ 66ാം മിനിറ്റിൽ ബൊലൂചിയിലൂടെ ഇറ്റലി തളച്ചിരുന്നു. നിശ്ചിത സമയത്തും എക്​സ്​ട്രാ ടൈമിലും വിജയഗോളെത്തായതായതോടെ ഷൂട്ടൗട്ടിലേക്ക്​​ നീളുകയായിരുന്നു.

ഇരച്ചെത്തിയ ആയിരങ്ങളെ പ്രകമ്പനം കൊള്ളിച്ച്​ മത്സരത്തിന്‍റെ രണ്ടാം മിനിറ്റിൽ തന്നെ ഇറ്റാലിയൻ പോസ്റ്റിലേക്ക്​ ​നിറയൊഴിച്ച്​ ഇംഗ്ലണ്ട് ഏവരെയും ഞെട്ടിച്ചിരുന്നു​. ഇടം കാലുകൊണ്ട്​ അതിമനോഹരമായി പന്ത്​ ​േപ്ലസ്​ ചെയ്​ത ലൂക്​ ഷായാണ്​ ഇംഗ്ലീഷുകാരെ സ്വപ്​നങ്ങളുടെ പറുദീസയിലെത്തിച്ചത്​. ചടുലതാളത്തിൽ മുന്നേറിയ കൗണ്ടർ അറ്റാക്കിലൂടെയാണ്​ ഇംഗ്ലീഷ്​ ഗോൾ പിറന്നത്​. പന്ത്​ വലയിൽ ചുംബിച്ച നിമിഷത്തിൽ ഗാലറി ഉന്മാദത്താൽ തുള്ളിച്ചാടി.

യൂറോപ്യൻ ഫുട്​ബാളിന്‍റെ വേഗവും ചടുലതയും ആവോളം പ്രകടിപ്പിച്ചാണ്​ മത്സരം തുടങ്ങിയത്​​. പന്തടക്കത്തിൽ ഇറ്റലി ബഹുദൂരം മുന്നിലായിരുന്നെങ്കിലും അപ്രതീക്ഷിത മുന്നേറ്റങ്ങളായിരുന്നു​ ഇംഗ്ലണ്ടിന്‍റെ കരുത്ത്​. ഇംഗ്ലീഷ്​ ഗോൾമുഖം ലക്ഷ്യമാക്കി അസൂറികൾ പലകുറി പാഞ്ഞടുത്തെങ്കിലും മുന്നിൽ വട്ടമിട്ട പ്രതിരോധ നിര തങ്ങളുടെ ജോലി വൃത്തിയായി നിർവഹിച്ചു.

36ാം മിനിറ്റിൽ ലൂക്​ ഷായുടെ ഇറ്റാലിയൻ ഗോൾമുഖം ലക്ഷ്യമാക്കി നീട്ടിയ അളന്നുമുറിച്ച ക്രോസ്​ ഏറ്റുവാങ്ങാൻ ആരുമുണ്ടായില്ല. 45ാം മിനിറ്റിൽ ഇമൊബിൽ തൊടുത്ത പെനൽറ്റി ബോക്​സിൽ നിന്നും തൊടുത്ത കനമുള്ള ഷോട്ടിന്​ വിലങ്ങിട്ട്​ ജോൺ സ്​റ്റോൺസ്​ ഇംഗ്ലീഷുകാരുടെ രക്ഷക്കെത്തി.

രണ്ടാംപകുതിയിൽ കൂടുതൽ ശക്തരായി കളം പിടിക്കുന്ന ഇറ്റലിയെയാണ്​ മൈതാനം കണ്ടത്​. ഒടുവിൽ ഇറ്റാലിയൻ ആരാധകർ സംഭവിക്കാനായും ഇംഗ്ലീഷുകാർ സംഭവിക്കരുതേയെന്നും ​പ്രാർഥിച്ച നിമിഷമെത്തി. 66ാം മിനിറ്റിൽ കോർണർകിക്കിൽ നിന്നും ഉടലെടുത്ത കൂട്ടപ്പൊരിച്ചിലിനൊടുവിൽ പോസ്റ്റിൽ തട്ടിമടങ്ങിയ പന്ത്​ ബൊലൂചി വലയിലെത്തിക്കുകയായിരുന്നു. ഗോൾവീണതോടെ മാനസികമായി തകർന്ന ഇംഗ്ലണ്ടിനെ ഗ്രൗണ്ടിൽ കാഴ്ചക്കാരാക്കി ഇറ്റലി നിറഞ്ഞാടി. പ്രതിരോധ നിരയിലെ ബലവും ഗോൾകീപ്പർ ജോർഡൻ പിക്​ഫോർഡിന്‍റെ ഞൊടിയിട സേവുകളുമാണ്​ ഇംഗ്ലീഷുകാരുടെ ആയുസ്​ ​നീട്ടിയത്​.