അർജന്‍റീന- ബ്രസീൽ കോപ ഫൈനലിൽ വിസിലൂതാൻ ഉറുഗ്വായ്​ റഫറി ഒസ്​റ്റോയിച്ച്​

സവോപോളോ: ആവേശം പരകോടിയിലെത്തിച്ച്​ കോപ അമേരിക്ക കലാശപ്പോരിൽ അർജന്‍റീനയും ബ്രസീലും മുഖാമുഖം നിൽക്കു​േമ്പാൾ വിസിൽ മുഴക്കി മൈതാനം ഭരിക്കുക ഉറുഗ്വായ്​ റഫറി. ശനിയാഴ്ച മാറക്കാന സ്​റ്റേഡിയത്തിലാണ്​ ഫൈനൽ മത്സരം. എസ്​തബാൻ ഒസ്​റ്റോയിച്ചിനെ സഹായിച്ച്​​ നാട്ടുകാരായ കാർലോസ്​ ബരേരോ, മാർട്ടിൻ സോപ്പി എന്നിവരുമുണ്ടാകും. പെറുവിൽനിന്നുള്ള ഡീഗോ ഹാരോ ആയിരിക്കും ഫോർത്ത്​ ഒഫീഷ്യൽ. 'വാർ' പരിശോധനക്ക്​ ഉറുഗ്വായിയുടെ തന്നെ ആ​ൻഡ്രേ കുൻഹക്കാണ്​ ചുമതല.

മൂന്നാം സ്​ഥാനക്കാരെ കണ്ടെത്താനുള്ള കൊളംബിയ- പെറു ലൂസേഴ്​സ്​ ഫൈനലിൽ ബ്രസീലിയൻ റഫറി റാഫേൽ ​േക്ലാസാകും വിസിൽ മുഴക്കുക.

2013ൽ ഉറുഗ്വായ്​ ദേശീയ മത്സരങ്ങൾ നിയന്ത്രിച്ച്​ പേരെടുത്ത ഒസ്​റ്റോയിച്ച്​ 2016ലാണ്​ ഫിഫ പട്ടികയിലെത്തുന്നത്​. 2018ൽ അർജന്‍റീന- മെക്​സിക്കോ പോരാട്ടം നിയന്ത്രിച്ച്​ രാജ്യാന്തര മത്സരങ്ങളിൽ അരങ്ങേറി. 2019ൽ ബ്രസീലി​ലെ കോപ അമേരിക്കയിൽ ഗ്രൂപ്​ മത്സരങ്ങളും നിയന്ത്രിച്ചു. പിന്നീട്​ നിരവധി രാജ്യാന്തര മത്സരങ്ങളിലും ശ്രദ്ധേയ സാന്നിധ്യമായി.