പീറ്റർ ചെക്കിന്​ ശേഷം​ ചെൽസിക്ക്​ ലഭിച്ച 'മിസ്​റ്റർ ക്ലീൻ' -എഡ്വേർഡോ മെൻഡി

ലണ്ടൻ: ​ആഫ്രിക്കൻ ഫുട്​ബാളി​െൻറ നഴ്​സറിയായ സെനഗാളിൽനിന്നുള്ള പുത്തൻ താരോദയമാണ്​ ചെൽസി ഗോൾ കീപ്പർ എഡ്വേർഡോ മെൻഡി. ചാമ്പ്യൻസ്​ ലീഗ്​ സെമിയുടെ രണ്ടാം പാദത്തിൽ കരിം ബെൻസേമയുടെ ഗോളെന്നുറപ്പിച്ച ഒരു ഹെഡർ പറന്നുയർന്ന്​ ഒറ്റകൈകൊണ്ട്​ തട്ടിത്തെറിപ്പിച്ച മെൻഡിയുടെ നീക്കത്തിൽതന്നെയുണ്ട്​ പ്രതിഭയുടെ വിസ്​മയം.

കഴിഞ്ഞ ഏതാനും മാസങ്ങളായി ​ഇംഗ്ലീഷ്​ ഫുട്​ബാളിലെ ചുറ്റുവട്ടങ്ങളിൽ ഉയർന്നു കേൾക്കുന്നുണ്ട്​ മെൻഡിയുടെ കഥകൾ. കെപ അരിസബലാഗയും, വില്ലി കബല്ലെറോയും കാത്തുസൂ​ക്ഷിച്ച വലക്ക്​ മുന്നിലേക്കാണ്​ ഇൗ 29കാരൻ ഫ്രാൻസിൽനിന്നും പറന്നിറങ്ങുന്നത്​.

ഫ്രഞ്ച്​ ലീഗ്​ ക്ലബ്​ റെന്നസിൽനിന്നും കഴിഞ്ഞ സെപ്​റ്റംബറിൽ മാത്രം ചെൽസിയിലെത്തിയ മെൻഡിക്ക്​ ലീഗ്​ കപ്പിലായിരുന്നു തുടക്കം. ആദ്യ കളിയിൽ പെനാൽറ്റിയിൽ തോറ്റെങ്കിലും അടുത്ത മാസം പ്രീമിയർ ലീഗിൽ അര​േങ്ങറ്റം കുറിച്ചു. തുടർന്ന്​ തുടർച്ചയായി മൂന്ന്​ ലീഗ്​ മാച്ചിൽ ക്ലീൻ ഷീറ്റ്​. 2004ൽ പീറ്റർ ചെക്കിനു​ ശേഷം ചെൽസിയിൽ അതൊരു ആദ്യ സംഭവമായിരുന്നു.

ചാമ്പ്യൻസ്​ ലീഗിലും അതേ പ്രകടനം തുടർന്നു. പതിറ്റാണ്ടിനിടെ അഞ്ചു​ കളിയിൽ ചെൽസിയുടെ ക്ലീൻഷീറ്റുമായി എഡ്വേർഡോ മെൻഡി ബെഞ്ചിൽനിന്ന്​ കയറി മുൻനിരയിലായി. അരിസബലാഗയും വില്ലി ക​ബല്ലെറോയും കോച്ചി​െൻറ ഗുഡ്​ബുക്കിന്​ പുറത്ത്​.

പൊതുവെ ആഫ്രിക്കൻ ഗോൾകീപ്പർമാരിൽ വിശ്വാസമില്ലാത്ത ഇംഗ്ലണ്ടിൽ മെൻഡിയുടെ വരവും പ്രകടനവും സംഭവബഹുലംതന്നെയായി. ഇപ്പോൾ ചെൽസി ​ചാമ്പ്യൻസ്​ ലീഗ്​ ഫൈനലിലെത്തു​േമ്പാൾ 11 കളിയിൽ എട്ട്​ ക്ലീൻഷീറ്റുകളാണ്​ മെൻഡിയുടെ നേട്ടം.

അതാവ​െട്ട, ഇംഗ്ലീഷ്​ ക്ലബുകളുടെ കാര്യത്തിൽ റെക്കോഡും. വഴങ്ങിയതാവ​െട്ട വെറും മൂന്ന്​ ഗോളുകൾ മാത്രം. ഇനി ഫൈനലിൽ മാഞ്ചസ്​റ്റർ സിറ്റി നേരിടുന്ന ഏറ്റവും വലിയ തലവേദനയും ഗോൾപോസ്​റ്റിനു കീഴെ വന്മതിൽ പോലെ പടർന്നു നിൽക്കുന്ന ഇൗ ആറടി ആറിഞ്ചുകാരൻ തന്നെയാവും.

മുൻ ചെൽസി ഗോൾ കീപ്പറും ടെക്​നിക്കൽ അഡ്വൈസറുമായ പീറ്റർ ചെക്കാണ്​ റെന്നസിൽ നിന്നും ഇൗ സെനഗാളുകാരനെ ചെൽസിയിലെത്തിക്കുന്നത്​.