ഡ്യൂറൻഡ് കപ്പ്: ചെന്നൈയിനെ തകർത്ത് എഫ്.സി ഗോവ സെമിയിൽ

ഗുവാഹതി: ചെന്നൈയിൻ എഫ്.സിയെ ഒന്നിനെതിരെ നാലു ഗോളിന് തോൽപിച്ച് എഫ്.സി ഗോവ ഡ്യൂറൻഡ് കപ്പ് ഫുട്ബാൾ സെമിഫൈനലിൽ കടന്നു.

ക്വാർട്ടർ ഫൈനൽ മത്സരത്തിന്റെ ഒമ്പതാം മിനിറ്റിൽ ബികാഷ് യുംനത്തിലൂടെ മുന്നിലെത്തിയ ചെന്നൈയിന്റെ പോസ്റ്റിൽ 30ാം മിനിറ്റു മുതലാണ് ഗോവക്കാർ ഗോളടി തുടങ്ങിയത്. കാൾ മച്ചുഗ് (30), കാർലോസ് മാർട്ടിനെസ് (37) എന്നിവർ ചേർന്ന് ആദ്യ പകുതിയിൽത്തന്നെ ലീഡ് സമ്മാനിച്ചു. കളി തീരാൻ നേരം നോഹ സദൂയിയും (90+1) വിക്ടർ റോഡ്രിഗസും (90+3) സ്കോർ ചെയ്തതോടെ 4-1ന് ജയം സ്വന്തമാക്കി ഗോവ.

ഞായറാഴ്ച കൊൽക്കത്തയിൽ നടക്കുന്ന നാലാം ക്വാർട്ടറിൽ മുംബൈ സിറ്റി എഫ്.സിയെ ആതിഥേയരായ മോഹൻ ബഗാൻ സൂപ്പർ ജയന്റ്സ് നേരിടും.