മ​റഡോണയുടെ 'ദൈവത്തിൻെറ കൈ' ജഴ്​സിക്ക്​ 14.79 കോടി ?

ലണ്ടൻ: 1986​ൽ ഇംഗ്ലണ്ടിനെതിരായ ലോകകപ്പ്​ മൽസരത്തിലെ മറഡോണയുടെ ജഴ്​സിക്ക്​ വൻ ലേലതുക ലഭിക്കുമെന്ന്​ പ്രവചനം. 2 മില്യൺ ഡോളർ(14.79 കോടി) ലഭിക്കുമെന്ന്​ കായിക സ്​മരണികകളുടെ ലേലം നടത്തുന്ന വിദഗ്​ധരാണ്​ ഇക്കാര്യം വ്യക്​തമാക്കിയത്​.

ഇംഗ്ലണ്ടിൽ മാഞ്ചസ്​റ്ററിലെ നാഷണൽ ഫുട്​ബാൾ മ്യൂസിയത്തിലാണ്​ ​ജഴ്​സി ഇപ്പോൾ ഉള്ളത്​. മൽസരത്തിന്​ ശേഷം മുൻ ഇംഗ്ലീഷ്​ ഫുട്​ബാൾ താരമായ സ്​റ്റീവ്​ ഹോഡ്​ജിനാണ്​ മറഡോണ ജഴ്​സി കൈമാറിയത്​. മെക്​സികോ സിറ്റിയിൽ നടന്ന ക്വാർട്ടർ ഫൈനലിന്​ ശേഷം ഡ്രസിങ്​ റൂമിലേക്കുള്ള നടക്കുന്നതിനിടെയാണ്​ ഇരുവരും പരസ്​പരം ജഴ്​സ്​ ഊരി നൽകിയത്​.

ലേലം നടത്തുന്ന ഡേവിഡ്​ അമർമാൻ ഗോൾഡിൻ കമ്പനിയുടെ അനുമാനത്തിൽ മറഡോണയുടെ ജേഴ്സിക്ക്​ 2 മില്യൺ ഡോളർ വരെ ലഭിക്കാം. ഈ തുക കൂടാനല്ലാതെ കുറയാൻ സാധ്യതയില്ലെന്നാണ്​ ഏജൻസിയുടെ വിലയിരുത്തൽ. നേരത്തെ മറഡോണയുമായി ബന്ധപ്പെട്ട പല സ്​മരണികകളും ലേലത്തിന്​ വെച്ചപ്പോൾ വൻ തുക ലഭിച്ചതും ഇവർ ചൂണ്ടിക്കാണിക്കുന്നുണ്ട്​.

1986ൽ ഇംഗ്ലണ്ടിനെതിരായ ലോകകപ്പ്​ ക്വാർട്ടർ ഫൈനൽ മൽസരത്തിൽ മറഡോണ കൈ കൊണ്ട്​ നേടിയ ഗോൾ ദൈവത്തിൻെറ കൈ എന്ന പേരിൽ പിന്നീട്​ പ്രശസ്​തമായിരുന്നു. നൂറ്റാണ്ടിലെ ഏറ്റവും മികച്ച ഗോളും മറഡോണ ഈ മൽസരത്തിലാണ്​ നേടിയത്​.