കോപ്പ കിരീടം; മെസ്സിക്ക്​ ഏഴാം ബാലൺ ഡി ഓർ ഉറപ്പെന്ന്​ ഫാൻസ്​ ​

ബ്രസീലിയ: 28 വർഷത്തെ ഇടവേളക്ക്​ ശേഷം ലയണൽ മെസ്സിയും കൂട്ടരും കോപ്പ അമേരിക്ക കിരീടം അർജന്‍റീനയിൽ എത്തിച്ചിരിക്കുകയാണ്​. നീലയും വെള്ളയും വരയുള്ള അർജന്‍റീന ജഴ്​സിയിലെ മെസ്സിയുടെ ആദ്യ അന്താരാഷ്​ട്ര കിരീടനേട്ടത്തിൽ ആരാധകർ അത്യാഹ്ലാദത്തിലാണ്​. ഇതിഹാസങ്ങളുടെ നിരയിൽ ഇരിപ്പുറപ്പിക്കു​േമ്പാഴും അന്താരാഷ്​ട്ര ട്രോഫിയുടെ അഭാവം എന്നും മെസ്സിക്ക്​ ഒരു വേദനയായിരുന്നു.

എന്നാൽ മാറക്കാന സ്​റ്റേഡിയത്തിൽ എയ്​ഞ്ചൽ ഡി മരിയയുടെ ഗോളിലൂടെ അർജന്‍റീന വൻകരയുടെ ജേതാക്കളായപ്പോൾ ദീർഘ നിശ്വാസമെടുത്തത്​ കാലങ്ങളായി ആ കാഴ്ച കാണാൻ കാത്തിരുന്നത്​ മലയാളക്കരയി​ലെ അടക്കമുള്ള ദശലക്ഷക്കണക്കിന്​ ആരാധകരായിരുന്നു.

നാല്​ ഗോളുമായി ടൂർണമെന്‍റിലെ ടോപ്​സ്​കോറർ, മികച്ച താരം എന്നീ പുരസ്​കാരങ്ങൾ സ്വന്തമാക്കിയ മെസ്സിക്ക് തന്നെയാകും​ ഈ വർഷത്തെ ബാലൺ ഡി ഓർ എന്ന്​ ഉറപ്പിക്കുകയാണ്​ ആരാധകർ. 'ബാലൺ ഡിഓർ' ഹാഷ്​ടാഗ്​ ട്വിറ്ററിൽ ട്രെൻഡിങ്ങാണ്​. ടൂർണമെന്‍റിലുടനീളം മികച്ച കളി കെട്ടഴിച്ച്​ വിട്ട മെസ്സിക്ക്​ ഫൈനലിന്‍റെ അന്ത്യ നിമിഷത്തിൽ ഗോളടിച്ച്​ പട്ടിക പൂർത്തിയാക്കാനുള സുവർണാവസരം ലഭിച്ചിരുന്നെങ്കിലും മുതലെടുക്കാനായില്ല.

വർഷങ്ങളായുള്ള ട്രോഫി വരൾച്ച അവസാനിപ്പിച്ചതിന്​ പിന്നാലെ എക്കാലത്തെയും മികച്ച കളിക്കാരൻ (GOAT) ആരെന്ന ചർച്ചകൾ ഇനി വേണ്ടെന്നും ഏഴാം ബാലൺ ഡി ഓർ മെസ്സിക്ക്​ നൽകണമെന്നുമാണ്​ ആരാധകർ സോഷ്യൽ മീഡിയയിലൂടെ ആവശ്യപ്പെടുന്നത്​. കണക്കുകൾ പലതും നിരത്തിയാണ്​ ആരാധകരുടെ വാദം.

2021ൽ ഇതുവരെ മെസ്സി 38 മത്സരങ്ങളിൽ നിന്നായി 33 ഗോളുകൾ സ്​കോർ ചെയ്​തിട്ടുണ്ട്​. കോപ അമേരിക്ക കൂടാതെ ബാഴ്​സലോണക്കൊപ്പം കോപ ഡെൽറേ കിരീടവും സ്വന്തമാക്കി. 14 ഗോളുകൾക്ക്​ പിന്നിൽ ചരടുവലിച്ച മെസ്സി 26 കളികളിൽ താരമായി. ഇക്കുറി ലാലിഗയിലെ ടോപ്​ സ്​കോററും മെസ്സിയായിരുന്നു.