ചാമ്പ്യൻ റയലിനെ വീഴ്​ത്തി ചെൽസി; ചാമ്പ്യൻസ് ​ലീഗിൽ ഇംഗ്ലീഷ്​ ഫൈനൽ

ലണ്ടൻ: 13 തവണ ചാമ്പ്യന്മാരെന്ന അത്യപൂർവ റെക്കോഡിന്‍റെ കരുത്തുമായി ഇംഗ്ലീഷ്​ മണ്ണിൽ വിജയം തേടിയെത്തിയ റയൽ മഡ്രിഡിനെ എതിരില്ലാത്ത രണ്ടു ഗോളിനു വീഴ്​ത്തി നീലക്കുപ്പായക്കാർ ചാമ്പ്യൻസ്​ ലീഗ്​ കലാശപ്പോരിന്​. പരിശീലകൻ ടക്കലിനു കീഴിൽ എല്ലാം മാറിയ സ്റ്റാംഫോഡ്​ ബ്രിഡ്​ജിൽ സ്​പാനിഷ്​ കൊമ്പന്മാർ മുട്ടുകുത്തിയ​േതാടെ ഇടവേളക്കു ശേഷം ചാമ്പ്യൻസ്​ ലീഗിൽ ഇംഗ്ലീഷ്​ ഫൈനൽ. പി.എസ്​.ജിയെ വീഴ്​ത്തി നേരത്തെ ഇടമുറപ്പിച്ച മാഞ്ചസ്റ്റർ സിറ്റിയാണ്​ ഇസ്​റ്റാംബൂൾ മൈതാനത്ത്​ ചാമ്പ്യന്മാരെ തേടിയുള്ള വലിയ പോരിൽ ചെൽസിക്ക്​ എതിരാളികൾ.

ആദ്യ പകുതിയിൽ തിമോ വേർണറിലൂടെ ഒരു ഗോളിന്​ ലീഡ്​ പിടിച്ചിട്ടും ശ്വാസമടക്കിപ്പിടിച്ചായിരുന്നു കുമ്മായവരക്കരികെ സ്വന്തം താരങ്ങളുടെ കളിക്കൊപ്പം കണ്ണുപായിച്ച്​ ടക്കൽ നിലയുറപ്പിച്ചത്​. ഏത്​ ആംഗിളിലും ഗോൾ അടിച്ചുകയറ്റാൻ ശേഷിയുള്ള കരീം ബെൻസേമയും സംഘവും എപ്പോഴും സമനില പിടിക്കുമെന്നും കളി കൊണ്ടുപോകുമെന്നുമായിരുന്നു ആധി. കളിയിലുടനീളം നിയന്ത്രണം പിടിക്കുകയും ഗോളവസരങ്ങൾ പലതു തുറക്കുകയും ചെയ്​തിട്ടും ആധി തുടർന്നു. അതിനിടെ പിറന്ന എണ്ണംപറഞ്ഞ ഷോട്ടുകൾ ക്രോസ്​ബാറിലോ തിബോ കുർ​ട്ടോയുടെ വിശ്വസ്​ത കരങ്ങളിലോ തട്ടി മടങ്ങുകയും ചെയ്​തതും ആശങ്കയേറ്റി. പക്ഷേ, എല്ലാം അസ്​ഥാനത്താക്കിയായിരുന്നു കളിയവസാനിക്കാൻ മിനിറ്റുകൾ ശേഷിക്കെ ക്രിസ്റ്റ്യൻ പുലിസിച്ച്​ സ്വയം ടിച്ചുകയറ്റാമായിരുന്ന അവസരം മേസൺ മൗണ്ടിൻെ കാലിലേക്ക്​ നൽകുന്നതും ലീഡ്​ രണ്ടായി ഉയരുന്നതും.

അതോടെ തുടങ്ങിയ ആഘോഷം കളിയവസാനിച്ചിട്ടും മൈതാനത്തു തുടർന്നു.

ചാമ്പ്യൻസ്​ ലീഗിൽ ഏഴുവട്ടം സെമിയിലെത്തിയ ചെൽസിക്ക്​ അഞ്ചുവട്ടവും തോറ്റതാണ്​ ചരിത്രം. മൊണാക്കോയും ലിവർപൂളും മുതൽ ബാഴ്​സലോണയും അത്​ലറ്റികോ മഡ്രിഡും വരെ പലരായിരുന്നു എതിരാളികളെന്നു മാത്രം. ഇത്തവണ പക്ഷേ, ഓർമയിലെ കറകൾ തീർത്ത്​ ഏകപക്ഷീയമായി ടീം ജയിച്ചു. മൊത്തം സ്​കോർ 3-1.

​േഗാളവസരങ്ങളിലേറെയും സൃഷ്​ടിച്ച നീലക്കുപ്പായക്കാർക്കു തന്നെയായിരുന്നു സ്വന്തം ​ൈമതാനത്ത്​ കളിമികവും. പതിവു ശൈലിയായ 3-5-2നു പകരം 4-3-3 എന്നതിലേക്കു മാറിയിട്ടും സിദാൻ സംഘം വലിയ വെല്ലുവിളി ഉയർത്തിയില്ല. 18ാം മിനിറ്റിൽ ആദ്യ അവസരം ക്രോസ്​ബാറിൽ തട്ടിയതും വൈകാതെ ബെൻസേമയുടെ പൊള്ളുന്ന ഷോട്ട്​ ഗോളി ആയാസപ്പെട്ട്​ രക്ഷപ്പെടുത്തിയതും മാത്രമായിരുന്നു എടുത്തുപറയാവുന്നത്​. മറുവശത്ത്​, തിമോ വേർണറും സംഘവും പലവട്ടം റയൽ ഗോൾമുഖത്ത്​ മിന്നായം തീർത്തു. കാന്‍റെയായിരുന്നു വേർണറുടെ ആദ്യ ഗോളിന്‍റെ ശിൽപി. പതിയെ കാൽവെച്ച്​ വല ചലിപ്പിക്കൽ മാത്രമേ വേർണർക്ക്​ വേണ്ടിവന്നുള്ളൂ. രണ്ടാമത്തേതിൽ പുലിസിച്ച്​ ഒറ്റക്ക്​ അടിക്കുമെന്ന്​ തോന്നിച്ചെങ്കിലും കൈകൾ വിരിച്ച്​ മുന്നിലെത്തിയ കുർ​ട്ടോയെ കണ്ട്​ പതിയെ മൗണ്ടിന്​ ക്രോസ്​ ചെയ്യുകയായിരുന്നു.

ഒരു മാസം മുമ്പ്​ എഫ്​.എ ​കപ്പ്​ സെമിയിൽ ചെൽസി തോൽപിച്ചുവിട്ട സംഘമാണ്​ സിറ്റിയെങ്കിലും ചരിത്രത്തിലാദ്യമായി തുറന്നുകിട്ടിയ അവസരം ഇനിയൊരു കാത്തിരിപ്പിന്​ വിട്ടുനൽകാതെ കിരീടവുമായി മടങ്ങാനാണ്​ ഗാർഡിയോള സംഘത്തിന്‍റെ പ്രതിജ്​ഞ. ഇരു ടീമുകളും സെമി മത്സരങ്ങൾ ആധികാരികമായി ജയിച്ചെത്തിയവരായതിനാൽ ഫൈനൽ പോരാട്ടം കനക്കും.

മേയ്​ 29നാണ്​ മത്സരം. ഇരു ടീമുകളുടെയും 4,000 വീതം കാണികൾക്ക്​ ഇസ്റ്റംബൂളിലെ അതാതുർക്ക്​ സ്​റ്റേഡിയത്തിൽ വീക്ഷിക്കാനെത്താം.