ആൻഫീൽഡിൽ കരുത്തരുടെ പോര്​; ആൾബലം കുറഞ്ഞിട്ടും ലിവർപൂളിനെ പിടിച്ച്​ ചെൽസി

ലണ്ടൻ: ആദ്യ പകുതി അവസാനിക്കുംമുമ്പ്​ 10 പേരായി ചുരുങ്ങിയിട്ടും ആൻഫീൽഡിൽ ആതിഥേയരെ വിജയിക്കാൻ വിടാതെ നീലക്കുപ്പായക്കാർ. സ്വന്തം തട്ടകത്തിൽ ചാമ്പ്യൻസ്​ ലീഗ്​ ജേതാക്കൾക്കെതിരെ ഇറങ്ങിയ ലിവർപൂളിന്​ പെനാൽറ്റി ഗോൾ ആനുകൂല്യത്തിൽ സമനില- സ്​കോർ 1-1.

അതിവേഗ നീക്കങ്ങളുമായി ഗോളും വിജയവും ലക്ഷ്യമിട്ട്​ തുടങ്ങിയ ലിവർപൂളിനെ ഞെട്ടിച്ച്​ അരമണിക്കൂർ പിന്നിടുംമുമ്പ്​ ഗോൾ നേടിയത്​ ചെൽസി. ജെയിംസ്​ എടുത്ത കോർണറിൽ ​ കാൽ ഹാവെർട്​സായിരുന്നു സ്​കോറർ. പ്രതിരോധനിരക്കും മുന്നിൽനിന്ന്​ മനോഹരമായി തലവെച്ച്​ ഗോളിയെയും കടന്ന്​ പിറകിൽ വല ചുംബിക്കുകയായിരുന്നു. ആദ്യ പകുതി അവസാനിക്കാനിരി​ക്കെ ലിവർപൂൾ സൃഷ്​ടിച്ച അവസരം കൂട്ടപ്പൊരിച്ചിലിനിടെ ഗോൾലൈനിൽ ജെയിംസ്​ കൈകൊണ്ട്​ തടഞ്ഞിട്ടത്​ വില്ലനായി. 'വാറി'ൽ റഫറി പെനാൽറ്റിയും ചുവപ്പുകാർഡും വിധിച്ചപ്പോൾ മുഹമ്മദ്​ സലാഹ്​ അനായാസം ലക്ഷ്യത്തിലെത്തിച്ചു. സ്​കോർ 1-1.

രണ്ടാം പകുതിയിൽ ഇരുപാതികളിലും കയറിയിറങ്ങി നിരന്തരം ഗോൾമുഖം തുറന്ന നീക്കങ്ങൾ പക്ഷേ, എവിടെയും വല തുളച്ചില്ല. അതോടെ, മത്സരം സമനിലയിൽ. മൂന്നു കളികളിൽ ഏഴു​േപായിന്‍റുമായി ലിവർപൂളും ചെൽസിയും മുന്നിലാണ്​. ചാമ്പ്യൻ പോരാട്ടം ഇപ്പോഴേ കടുത്തുതുടങ്ങിയ പ്രിമിയർ ലീഗിൽ അത്രയും കളികളിൽ സിറ്റിക്ക്​ ആറു പോയിന്‍റാണുള്ളത്​.