ചാമ്പ്യൻസ്​ ലീഗ്​ അവസാന എട്ടിലേക്ക്​ ബയേണും ചെൽസിയും

ലണ്ടൻ: ലാ ലിഗ കരുത്തരായ അത്​ലറ്റികോ മഡ്രിഡിനെ വീഴ്​ത്തി നീണ്ട ഇടവേളക്കു ശേഷം ചെൽസിയും ചാമ്പ്യൻഷിപ്പ്​ നിലനിർത്താമെന്ന സ്വപ്​നങ്ങളിലേക്ക്​ പിന്നെയും പന്തടിച്ചുകയറ്റി ബയേൺ മ്യൂണിക്കും ചാമ്പ്യൻസ്​ ലീഗ്​ ക്വാർട്ടർ ഫൈനലിൽ. ഇരു പാദങ്ങളും ജയിച്ച്​ ​ ആധികാരികമായിട്ടായിരുന്നു ഇരു ടീമുകളുടെയും വിജയം.

അത്​ലറ്റിക്കോക്കെതിരെ ബുധനാഴ്ച ഏകപക്ഷീയമായ രണ്ടു ഗോളുകൾക്ക്​ ജയിച്ച ​നീലക്കുപ്പായക്കാർ ആദ്യപാദം ഒരു ഗോളിന്​ കടന്നിരുന്നു. ഇതോടെ സ്​കാർ- 3-0. നീണ്ട ഏഴുവർഷത്തിനിടെ ആദ്യമായാണ്​ ചെൽസി യൂറോപ്യൻ ചാമ്പ്യൻമാർക്കായുള്ള പോരാട്ടത്തിന്‍റെ അവസാന എട്ടിൽ ഇടംപിടിക്കുന്നത്​. ആദ്യ പകുതിയിൽ ഹകീം സിയെകിലൂടെ തുടക്കമിട്ട ഗോൾവേട്ട ഇഞ്ചുറി സമയത്ത്​ എമേഴ്​സൺ പൂർത്തിയാക്കി. പ്രീക്വാർട്ടറിൽ കഴിഞ്ഞ തവണ ലിവർപൂളിനെ നേരത്തെ കടന്ന അത്​ലറ്റികോ അതേ ആവേശവുമായാണ്​ ഇത്തവണ ഇറങ്ങിയതെങ്കിലും ചെൽസി നിലംതൊടാൻ അനുവദിച്ചില്ല. തോമസ്​ ടക്കൽ പരിശീലക കുപ്പായത്തിലെത്തിയ ശേഷം ഇതുവരെയും തോൽവിയറിയാതെ കുതിക്കുന്ന ചെൽസി പലവട്ടം ഗോൾ മുഖം തുറന്നെങ്കിലും ഗോൾ രണ്ടിലൊതുങ്ങി. ഇതോടെ, പ്രിമിയർ ലീഗ്​ നിരയിൽനിന്ന്​ ചാമ്പ്യൻസ്​ ലീഗ്​ ക്വാർട്ടർ യോഗ്യത നേടുന്ന മൂന്നാമത്തെ ടീമായി ചെൽസി. ലിവർപൂൾ, മാഞ്ചസ്റ്റർ സിറ്റി എന്നിവരാണ്​ നേരത്തെ അവസാന എട്ടിലെത്തിയത്​.

ബയേൺ മ്യൂണിക്കിനായി പിന്നെയും ലെവൻഡോവ്​സ്​കി ലക്ഷ്യം കണ്ട കളിയിൽ ചൂപോ മേ​ാട്ടിങ്​ ലീഡ്​ പൂർത്തിയാടകി. 82ാം മിനിറ്റിൽ ലാ​സിയോ ഒരു ഗോൾ മടക്കിയെങ്കിലും മൊത്തം സ്​കോർ 6-2ലെത്തിച്ചാണ്​ ബയേൺ ചാമ്പ്യൻഷിപ്പ്​ നിലനിർത്തുകയെന്ന വലിയ സ്വപ്​നങ്ങൾ പിന്നെയും ചേർത്തുപിടിച്ചത്​. ചാമ്പ്യൻസ്​ ലീഗിൽ ടീമിനായി 13 ഗോൾ എന്ന നേട്ടം ഇതോടെ ലെവൻഡോവ്​സ്​കിക്ക്​ സ്വന്തം. റോമിൽ നടന്ന ആദ്യ പാദം 4-1ന്​ ബയേൺ ജയിച്ചിരുന്നു. ഇത്തവണയും കളി പൂർണമായി നിയന്ത്രിച്ച്​ മുന്നിൽനിന്നത്​ ജർമൻ അതികായരായിരുന്നുവെങ്കിലും ഗോളുക​ളുടെ എണ്ണം കുറഞ്ഞു.

സ്വന്തം കളിമുറ്റത്ത്​ തുടർച്ചയായ 31 കളികളിൽ പരാജയമറിയാതെ കുതിക്കുകയാണ്​ ഇതോടെ ബയേൺ. ചാമ്പ്യൻസ്​ ലീഗിൽ ടീം ക്വാർട്ടറിലെത്തുന്നത്​ 19ാം തവണയും.