'കാതറിൻ ​മയോർഗയെ വിശ്വസിക്കുക'; റൊണാൾഡോക്കെതിരായ പീഡന പരാതി ഓർമിപ്പിച്ച്​ ഓൾഡ്​ ട്രാഫോഡിന്​ മുകളിലൂടെ ബാനർ

ലണ്ടൻ: മാഞ്ചസ്റ്റർ യു​ൈനറ്റഡിലേക്ക്​ സൂപ്പർ താരം ക്രിസ്റ്റ്യാനോ റെണാൾഡോയുടെ മടങ്ങി വരവിന്‍റെ അന്ന്​ തന്നെ താരത്തിനെതിരെ ലൈംഗികാതിക്രമ പരാതി ഉന്നയിച്ച യുവതിയെ പിന്തുണച്ച്​ ഓൾഡ്​ ട്രാഫോഡിന്​ മുകളിലൂടെ ബാനർ പറന്നു.

റൊണാൾഡോക്കെതിരായ ബലാത്സംഗ പരാതിയെ കുറിച്ച്​ കാണികളെ ഓർമിപ്പിക്കുകയായിരുന്നുവെന്ന്​ ലെവൽ അപ്​ ഫെമിനിസ്റ്റ്​ ഗ്രൂപ്പ്​ പറഞ്ഞു.

റൊണാള്‍ഡോ ലൈംഗികമായി പീഡിപ്പിച്ചെന്ന് ആരോപിച്ച് 2018 സെപ്റ്റംബറിലാണ് അമേരിക്കക്കാരിയായ മുൻ മോഡൽ കാതറിന്‍ മയോര്‍ഗ രംഗത്തെത്തിയത്. ന്യായമായ സംശയത്തിനപ്പുറം ഇത് തെളിയിക്കാനാവില്ലെന്നാണ്​ ലാസ് വെഗാസ് പ്രോസിക്യൂട്ടർ വ്യക്തമാക്കിയിരുന്നത്​.

ന്യൂകാസിൽ യുനൈറ്റഡിനെതിരായ മത്സരം തുടങ്ങിയ ശേഷമാണ്​ 'കാതറിൻ ​മയോർഗയെ വിശ്വസിക്കുക'- എന്ന്​ എഴുതിയ ബാനറുമായി ചെറുവിമാനം ഓൾഡ്​ ട്രാഫോഡിന്​ മുകളിലൂടെ പറന്നത്​. പോർചുഗീസ്​ താരമായ റൊണാൾഡോ ഇരട്ടഗോൾ നേടിയ മത്സരത്തിൽ 4-1നായിരുന്നു മാഞ്ചസ്റ്റർ യുനൈറ്റഡിന്‍റെ വിജയം.

2009 ജൂണ്‍ 13-ന് അമേരിക്കയിലെ ലാസ് വെഗാസിലെ ഒരു ഹോട്ടല്‍ മുറിയില്‍ വെച്ച് റൊണാള്‍ഡോ പീഡിപ്പിച്ചെന്ന പരാതിയുമായാണ്​ യുവതി കോടതിയെ സമീപിച്ചിരുന്നത്​. ഇക്കാര്യം പുറത്തറിയാതിരിക്കാന്‍ 3,75,000 ഡോളര്‍ നല്‍കിയെന്നും യുവതി വെളിപ്പെടുത്തിയിരുന്നു. മീടൂ മൂവ്​മെന്‍റിൽ നിന്ന്​ പ്രചോദനം ഉൾകൊണ്ടാണ്​ താൻ വെളിപ്പെടുത്തൽ നടത്തിയതെന്ന്​ അവർ ​അന്ന്​ വെളി​െപടുത്തി.

2009ൽ റൊണാള്‍ഡോ മാഞ്ചസ്റ്റര്‍ യു​ൈനറ്റഡ്​ വിട്ട് റയൽ മഡ്രിഡിലേക്ക്​ കൂടുമാറുന്ന സമയത്തായിരുന്നു സംഭവം നടന്നത്. ഇരുവരും കണ്ടുമുട്ടിയെന്ന കാര്യം റൊണാൾഡോ നിഷേധിച്ചിട്ടില്ല. ആരോപണം തള്ളാതെ പരസ്​പര സമ്മതത്തോടെയുള്ള ബന്ധമെന്നായിരുന്നു താരം നൽകിയ വിശദീകരണം.