എറിക്​സ​ൻ കുഴഞ്ഞുവീണതിന്‍റെ 'എക്​സ്​ക്ലൂസീവ്​': മാപ്പുചോദിച്ച്​ ബി.ബി.സി

ലണ്ടൻ: ഫിൻലാൻഡുമായി യൂറോകപ്​ മത്സരത്തിനിടെ ഡെന്മാർക്ക്​ താരം ക്രിസ്റ്റ്യൻ എറിക്​സൺ മൈതാനത്തു കുഴഞ്ഞുവീഴുന്നതിന്‍റെയും മെഡിക്കൽ സംഘമെത്തി അടിയന്തര ചികിത്സ നൽകുന്നതിന്‍റെയും തത്സമയ ദൃശ്യങ്ങൾ ഏറെ നേരം കാണിച്ചു പഴി​േകട്ട ബി.ബി.സി മാപ്പുപറഞ്ഞു. മിനിറ്റുകളോളം ദൃ​ശ്യങ്ങൾ കാണിക്കുകയും ഇതേ കുറിച്ച്​ ചർച്ച നടത്തുകയും ചെയ്​താണ്​ ചാനൽ രംഗം കൊഴുപ്പിച്ചിരുന്നത്​. ദൃശ്യങ്ങൾ കാണാതിരിക്കാൻ ഡെൻമാർക്​ താരങ്ങൾ മനുഷ്യവലയം തീർത്തിരുന്നുവെങ്കിലും ഇതിനിടയിലൂടെ കാമറ ചലിപ്പിച്ചായിരുന്നു ബി.ബി.സി ചർച്ച.

''സംപ്രേഷണം ചെയ്​ത ദൃശ്യങ്ങൾ വേദനിപ്പിച്ചവരോട്​ മാപ്പു ചോദിക്കുന്നു. സ്​റ്റേഡിയം ദൃശ്യങ്ങളുടെ കവറേജ്​ യുവേഫയാണ്​ നിയന്ത്രിക്കുന്നത്​. കളി നിർത്തിവെച്ചതോടെ പരമാവധി വേഗത്തിൽ കാഴ്ചകൾ നിർത്തിവെച്ചിട്ടുണ്ട്​''- ബി.ബി.സി വാർത്ത കുറിപ്പ്​ പറയുന്നു.

സ്റ്റുഡിയോയിൽ മുൻ ഇംഗ്ലീഷ്​ താരം ഗാരി ലിനേക്കറാണ്​ കമെന്‍ററി നയിച്ചിരുന്നത്​. ചികിത്സ നൽകുന്നതിന്‍റെയും മൈതാനത്തെത്തിയ എറിക്​സന്‍റെ പത്​നിയെ ആശ്വസിപ്പിക്കുന്നതിന്‍റെയും ദൃശ്യങ്ങൾ ബി.ബി.സി കാണിച്ചിരുന്നു.

കളിയുടെ ആദ്യ പകുതി അവസാനിക്കാനിരിക്കെയാണ് എറിക്​സൺ ബോധരഹിതനായി മൈതാനത്തുവീണത്​. ആശുപത്രിയിലെത്തിച്ച താരം അതിവേഗം തിരിച്ചുവരികയാണെന്ന്​ അധികൃതർ അറിയിച്ചു. കരിയറിനിടെ ഒരിക്കൽ പോലും ഹൃദയസംബന്ധമായ പ്രശ്​നങ്ങൾ നേരിടാതിരുന്ന താരം 11 വർഷത്തെ പരിശോധനകളിലൊക്കെയും ആരോഗ്യവാനായിരുന്നുവെന്ന്​ ബന്ധപ്പെട്ടവർ പറഞ്ഞു. എന്നിട്ടും, കളിക്കിടെ കുഴഞ്ഞുവീണത്​ എന്തുകൊണ്ടാണെന്നറിയാൻ വിശദ പരിശോധന നടത്തിവരികയാണ്​.