മെസ്സിയില്ലാത്ത ബാഴ്​സക്ക്​ ദയനീയ തോൽവി; റൊണാൾഡോയില്ലെങ്കിലും തകർപ്പൻ വിജയവുമായി യുവന്‍റസ്​

ബാഴ്​സലോണ: ലയണൽ മെസ്സിയില്ലാത്ത ബാഴ്​സലോണക്ക്​ ചാമ്പ്യൻസ്​ ലീഗിൽ ദയനീയ തോൽവിയോടെ തുടക്കം. ഗ്രൂപ്പ്​ ഇയിലെ ആദ്യമത്സരത്തിൽ സ്വന്തം മൈതാനത്ത്​ ബാഴ്​സ ജർമൻ ചാമ്പ്യൻമാരായ ബയേൺ മ്യൂണിക്കിനോട്​​ 3-0ത്തിന്‍റെ ദയനീയ തോൽവി ഏറ്റുവാങ്ങി.

ബയേണിനായി റോബർട്ട്​ ലെവൻഡോസ്​കി ഇരട്​ഗോൾ നേടി. തോമസ്​ മുള്ളറിന്‍റെ വകയായിരുന്നു ശേഷിക്കുന്ന ഗോൾ. 33ാം മിനിറ്റിൽ പെനാൽറ്റി ബോക്​സിന്​ പുറത്ത്​ നിന്നുമാണ്​ ബയേൺ അക്കൗണ്ട്​ ഓപൺ ചെയ്​തത്​. ചാമ്പ്യൻസ്​ ലീഗിലെ മുള്ളറിന്‍റെ 49ാം ഗോളായിരുന്നു. രണ്ടാം പകുതിയിൽ 56, 85 മിനിറ്റുകളിലായിരുന്നു പോളിഷ്​ താരമായ ​ലെവൻഡോസ്​കിയുടെ ഗോളുകൾ.

ഏഴുതവണ​ ബയേൺ താരങ്ങൾ പോസ്റ്റ്​ ലക്ഷ്യമിട്ടിരുന്നു​വെങ്കിലും മൂന്ന്​ തവണ മാത്രമാണ്​ ഫലമുണ്ടായത്​. എന്നാൽ ബാഴ്​സ താരങ്ങൾക്ക്​ ഒരുതവണ പോലും ബയേൺ ഗോൾകീപ്പറെ വിറപ്പിക്കാനായില്ല. ഗ്രൂപ്പിലെ മറ്റൊരു മത്സരത്തിൽ ഡൈനാമോ കിയവും ബെനഫിക്കയും ഗോൾരഹിത സമിനലയിൽ പിരിഞ്ഞു.

ഗ്രൂപ്പ്​ എച്ചിൽ നിലവിലെ ജേതാക്കളായ ചെൽസിയും യുവന്‍റസും ജയിച്ചുകയറി. ചെൽസി 1-0ത്തിന്​ സെനിത്​ സെന്‍റ്​ പീറ്റേഴ്​സ്​ബർഗിനെ തോൽപിച്ചു. ഗോൾരഹിതമായ ആദ്യ പകുതിക്ക്​ ശേഷം 69ാം മിനിറ്റിൽ സൂപ്പർ താരം റൊമേലു ലുക്കാക്കുവാണ്​ ഇംഗ്ലീഷ് ക്ലബിന്​ വിജയം സമ്മാനിച്ചത്​.

ചെൽസി നായകൻ ആസ്പിലിക്വറ്റയുടെ ക്രോസിൽ നിന്ന് ഹെഡറിലൂടെയായിരുന്നു ബെൽജിയം താരമായ ലുകാകുവിന്‍റെ ഗോൾ. ചെൽസിക്ക് വേണ്ടി അവസാനം കളിച്ച നാല്​ കളികളിൽ ലുക്കാക്കു നേടുന്ന നാലാമ​െത്ത ഗോളാണിത്​.

അതേ സമയം ഇറ്റാലിയൻ സീരി എയിൽ ആദ്യ മൂന്ന്​ മത്സരങ്ങളിലും പച്ചതൊടാൻ സാധിക്കാതിരുന്ന യുവന്‍റസിന്​ സീസണിലെ ആദ്യ ജയം. സ്വീഡിഷ്​ ക്ലബായ മാൽമോക്കെതിരെ 3-0ത്തിനായിരുന്നു ​യുവെയുടെ വിജയം.

ആദ്യ പകുതിയിലായിരുന്നു അലഗ്രിയുടെ കുട്ടികളുടെ മൂന്ന്​ ഗോളുകളും. അലക്​സ്​ സാണ്ട്രോ (23), പൗളോ ഡിബാല (45), ആൽവരോ മൊറാട്ട (45+1) എന്നിവരാണ്​ സ്​കോർ ചെയ്​തത്​. ചാമ്പ്യൻസ്​ ലീഗിലെ ഡിബാലയുടെ 16ാം ഗോളാണിത്​.