പരിക്ക്​; ബാഴ്​സ താരം കുട്ടീഞ്ഞോക്ക്​ മൂന്നു മാസം വിശ്രമം

ഐബറിനെതിരായ ലാ ലിഗ മത്സരത്തിൽ ചൊവ്വാഴ്​ച കാൽമുട്ടിന്​ പരിക്കേറ്റ്​ ശസ്​ത്രക്രിയക്കു വിധേയനായ ബാഴ്​സ താരം കുടീഞ്ഞോ മൂന്നു മാസം പുറത്ത്​. പരിക്ക്​ ഭേദമാകാൻ സമയമെടുക്കുമെന്നതിനാലാണ്​ ബ്രസീലിയൻ താരത്തിന്​ നീണ്ട വിശ്രമം. കളിയിൽ ബാഴ്​സ ഐബറിനെ 1-1ന്​ സമനിലയിൽ പിടിച്ചിരുന്നു.

റെക്കോഡ്​ തുകയായ 16 കോടി യൂറോ ചെലവിട്ട്​ ലിവർപൂളിൽനിന്ന്​ 2018ൽ ബാഴ്​സലോണയിലെത്തിയ താരം പക്ഷേ, തിളങ്ങാനാകാതെ ഉഴറിയത്​ അഭ്യുഹങ്ങൾക്കിടയാക്കിയിരുന്നു. ഇതോടെ, ചെറിയ ഇടവേളയിൽ ബയേൺ മ്യൂണിക്കിലെത്തി ടീമിനെ ചാമ്പ്യൻസ്​ ലീഗ്​ ചാമ്പ്യൻമാരാക്കുന്നതിൽ നിർണായകമായി. ക്വാർട്ടർ ഫൈനലിൽ ബാഴ്​സലോണയെ 8-2ന്​ ബയേൺ വീഴ്​ത്തിയപ്പോൾ രണ്ടു ഗോളടിച്ച്​ താരം ജയത്തിൽ നിർണായക പങ്ക്​ വഹിക്കുകയും ചെയ്​തു.

ഇതോടെ വീണ്ടും പഴയ തട്ടകത്തിൽ തിരിച്ചെത്തിയ കുടീഞ്ഞോ ഇതുവരെ ബാഴ്​സക്കായി മൂന്നു ഗോൾ നേടിയിട്ടുണ്ട്​. കുടീഞ്ഞോ കൂടി പോകുന്നതോടെ ബാഴ്​സയുടെ സ്വപ്​നങ്ങൾക്കുമേൽ കൂടുതൽ ഇരുൾ വീഴും. ​മുന്നേറ്റ നിരയിലെ അൻസു ഫാറ്റി, സഹതാരം ജെറാർഡ്​ പിക്വെ എന്നിവർ ഗുരുതര പരി​ക്കുകളോടെ നേരത്തെ വിശ്രമത്തിലാണ്​.