ഇനി അർജൻറീനയുടെ നോട്ടിലുണ്ടാകും, ഇതിഹാസവും പിന്നെ നൂറ്റാണ്ടിൻെറ ഗോളും

ബ്വേനസ്​ എയ്​റിസ്​: വിടവാങ്ങിയ വിഖ്യാത ഫുട്​ബാളർ മറഡോണയുടെ സ്​മരണ പുതുക്കുക​യാണ്​ ഓരോ ദിവസവും ഫുട്​ബാൾ ലോകം. ഇപ്പോൾ തങ്ങളുടെ ദേശീയ ഹീറോയുടെ ചിത്രം ആലേഖനം ചെയ്​ത ബാങ്ക്​ നോട്ടുകൾ പുറത്തിറക്കാൻ ഒരുങ്ങുകയാണ്​ അർജൻറീന. ഇതിൻെറ ആദ്യ പടിയെന്നോണം സെനറ്റിൽ പ്രമേയം അവതരിപ്പിച്ചിരിക്കുകയാണ്​ ഫ്രെൻെറ ഡി ടോഡോസ്​ പാർട്ടി സെനറ്ററായ നോർമ ഡുരംഗോ.

1986 ലോകകപ്പ്​ ക്വാർട്ടറിൽ ഇംഗ്ലണ്ടിനെതിരെ മറഡോണ നേടിയ നൂറ്റാണ്ടിൻെറ ഗോളിലേക്കുള്ള ഓട്ടവും മറഡോണയുടെ ചിത്രവുമാകും 1000 പെസോ നോട്ടിൽ ആലേഖനം ചെയ്യപ്പെടുക.

2021 സാമ്പത്തിക വർഷത്തിൽ പുറത്തിറക്കുന്ന 1000 പെസോയോ അതിന്​ മുകളിലോ ഉള്ള വലിയ നോട്ടുകളിൽ കുറഞ്ഞത്​ 50 ശതമാനമെങ്കിലും മറഡോണയെ വെച്ച്​ അച്ചടിക്കാനാണ്​ നിർദേശം വെച്ചത്​. ഒരു വശത്ത് ഡീഗോ മറഡോണയുടെ ചിത്രവും മറുവശത്ത്​ 1986 ജൂൺ 22ന് മെക്സിക്കോയിൽ അഞ്ച്​ ഇംഗ്ലീഷ്​ ഡിഫൻഡർമാരെ ​കബളിപ്പിച്ച്​ നേടിയ രണ്ടാം ഗോളിൻെറ ചിത്രവും അച്ചടിക്കാനാണ്​ പദ്ധതി.

ഡുരംഗോയുടെ പ്രമേയം സെനറ്റ്​ അംഗീകരിച്ചാൽ 2021ൽ മറഡോണയുടെ ചിത്രം ആ​േലഖനം ചെയ്​ത നോട്ടുകളാകും അർജൻറീനയിൽ അച്ചടിക്കുക. താരത്തിൻെറ സ്​മരണക്കായി അട​ുത്ത വർഷം തപാൽ സ്​റ്റാമ്പുകൾ പുറത്തിറക്കാനും സർക്കാർ പദ്ധതിയിടുന്നുണ്ട്.

1986ൽ അർജൻറീനക്ക്​ ലോകകപ്പ്​ നേടിക്കൊടുത്ത ഇതിഹാസ താരം നവംബർ 25ന്​ ഹൃദയാഘാതം മൂലമാണ്​ മരണപ്പെട്ടത്​. കഴിഞ്ഞ ദിവസം മറഡോണയോടുള്ള ആദരസൂചകമായി ഇറ്റാലിയൻ ക്ലബായ നാപോളി അവരുടെ ഹോംമൈതാനത്തെ താരത്തിൻെറ പേരിൽ പുനർനാമകരണം ചെയ്​തിരുന്നു.